១០ថ្ងៃ រាប់ទាំងថ្ងៃចូលឆ្នាំ មានមនុស្ស៥០នាក់បានស្លាប់ដោយគ្រោះថ្នាក់ចរាចរណ៍

រយៈពេល១០ថ្ងៃ រាប់ទាំងក្នុងថ្ងៃបុណ្យចូលឆ្នាំខ្មែរ មានករណីគ្រោះថ្នាក់ចរាចរណ៍ផ្លូវគោកបានកើតឡើង៨២ករណីនៅទូទាំងប្រទេស ដែលបណ្តាលឱ្យមនុស្សយ៉ាងហោច៥០នាក់បានបាត់បង់ជីវិត និងរងរបួសធ្ងន់ស្រាល១៤៣នាក់។ នេះបើតាមលោក ទូច សុឃៈ អ្នកនាំពាក្យរងក្រសួងមហាផ្ទៃ ដោយរាប់ចាប់ពីថ្ងៃទី១០ ដល់ថ្ងៃទី១៩ ខែមេសា ឆ្នាំ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

និយាយដោយឡែក ក្នុងចន្លោះពេល៣ថ្ងៃ នៃពិធីបុណ្យចូលឆ្នាំថ្មី ប្រពៃណីជាតិខ្មែរ ពីថ្ងៃទី១៤ ដល់ថ្ងៃទី១៦ ខែមេសា បើតាមលោក ទូច សុឃៈ មានករណីគ្រោះថ្នាក់ចរាចរណ៍កើតឡើង២៧ករណី ដែលបណ្ដាលឱ្យមានមនុស្សស្លាប់១៧នាក់ និង៤៥នាក់បានរបួសធ្ងន់-ស្រាល។ ធៀបនឹងឆ្នាំ២០២៥ ថយចុះ៣ករណី ដោយអ្នកស្លាប់ថយចុះ៩នាក់ និងរបួសថយចុះ២នាក់។

អ្នកនាំពាក្យរងក្រសួងមហាផ្ទៃបានឱ្យដឹងថា មូលហេតុបង្កឱ្យកើតមានគ្រោះថ្នាក់ចរាចរណ៍ក្នុងពេល១០ថ្ងៃមកនេះ រួមមាន ការបើកបរលើសល្បឿនកំណត់ មិនគោរពសិទ្ធិអាទិភាព មិនប្រកាន់ស្ដាំ បត់មិនប្រយ័ត្ន ស្រវឹង និងកត្តាយានយន្ត។

គួររម្លឹកថា ក្នុងរយៈពេល៣ថ្ងៃ នៃពិធីបុណ្យចូលឆ្នាំថ្មីប្រពៃណីជាតិ ឆ្នាំ២០២៥ មានករណីគ្រោះថ្នាក់ចរាចរណ៍នៅទូទាំងប្រទេសកើតឡើង៣០ករណី បណ្ដាលឱ្យមនុស្សស្លាប់ចំនួន២៦នាក់ និងរបួសធ្ងន់ស្រាលចំនួន៤៧នាក់៕