នគរបាលខេត្តតាកែវបើកវគ្គបណ្ដុះបណ្ដាលបច្ចេកទេសសង្គ្រោះជីវិតជនរងគ្រោះដោយគ្រោះថ្នាក់ចរាចរណ៍

ព្រឹកថ្ងៃទី១៧ ខែមេសា ឆ្នាំ២០២៦ ស្នងការដ្ឋាននគរបាលខេត្តតាកែវ បានរៀបចំពិធីបើកវគ្គបណ្ដុះបណ្ដាលបំប៉នជំនាញស្ដីពី «បច្ចេកទេសសង្គ្រោះជីវិតជនរងគ្រោះដោយគ្រោះថ្នាក់ចរាចរណ៍ផ្លូវគោក» ដើម្បីពង្រឹងសមត្ថភាពមន្ត្រីក្នុងការជួយសង្គ្រោះបឋម និងកាត់បន្ថយការបាត់បង់ជីវិតនៅកន្លែងកើតហេតុ។

ពិធីបើកវគ្គនេះ ប្រព្រឹត្តទៅក្រោមអធិបតីភាពលោកឧត្តមសេនីយ៍ឯក ចេវ ហាក់ អគ្គស្នងការរងនគរបាលជាតិ និងលោក ជុន វ៉ាត រដ្ឋលេខាធិការក្រសួងប្រៃសណីយ៍ និងទូរគមនាគមន៍ ដោយមានការចូលរួមពីថ្នាក់ដឹកនាំនគរបាលជាតិ និងថ្នាក់ដឹកនាំនគរបាលខេត្តជាច្រើនរូប។

ក្នុងឱកាសនោះ មានការអញ្ជើញចូលរួមពីលោកឧត្តមសេនីយ៍ វរសេនីយ៍ ស្នងការរងពាក់ព័ន្ធ លោកនាយ និងនាយរងការិយាល័យ ព្រមទាំងមន្រ្តីនៃការិយាល័យនគរបាលចរាចរណ៍ផ្លូវគោក សរុបចំនួន ១០០នាក់ ក្នុងនោះមានស្រី ១៧នាក់។

វគ្គបណ្ដុះបណ្ដាលនេះ មានគោលបំណងលើកកម្ពស់ចំណេះដឹង និងជំនាញជាក់ស្តែង ដល់មន្ត្រីនគរបាលចរាចរណ៍ ក្នុងការឆ្លើយតបទាន់ពេលវេលា និងមានប្រសិទ្ធភាពចំពោះករណីគ្រោះថ្នាក់ចរាចរណ៍ផ្លូវគោក ដើម្បីជួយសង្គ្រោះជីវិតជនរងគ្រោះ និងកាត់បន្ថយហានិភ័យធ្ងន់ធ្ងរដែលអាចកើតមាន៕

​អត្ថបទ៖ វីរៈ