ថៃលុបMoU2001៖ប្រមុខរដ្ឋស្ដីទីសោកស្ដាយតែក៏អរគុណចំពោះការត្រួសត្រាយផ្លូវឱ្យកម្ពុជាប្រើយន្តការផ្សះផ្សាដោយបង្ខំ

ប្រមុខរដ្ឋស្ដីទី សម្ដេចតេជោ ហ៊ុន សែន  រម្លឹករាជរដ្ឋាភិបាលកម្ពុជា កុំឱ្យបង្កើតយន្តការទ្វេភាគីចរចាជាមួយថៃម្ដងទៀតលើបញ្ហាវិវាទសមុទ្រ ដោយត្រូវឆ្ពោះទៅរកយន្តការអន្តរជាតិ ដើម្បីដោះស្រាយបញ្ហា ដោយមិនចាំបាច់ការយល់ព្រមពីសំណាក់ភាគីថៃ។ សម្ដេចថ្លែងម្ដងទៀតថា កម្ពុជា សោកស្ដាយចំពោះការលុបចោលអនុស្សរណៈឆ្នាំ២០០១ជាឯកតោភាគី ប៉ុន្តែក៏អរគុណថៃ ដែលជួយត្រួសត្រាយផ្លូវឱ្យកម្ពុជាបានប្រើប្រាស់យន្តការផ្សះផ្សាដោយចាប់បង្ខំ (Compulsory Conciliation)ស្ថិតក្រោមអនុសញ្ញាអង្គការសហប្រជាជាតិស្តីពីនីតិសមុទ្រ (UNCLOS)។

ការថ្លែងរបស់សម្ដេច ហ៊ុន សែន ធ្វើឡើងតាមរយៈទំព័រហ្វេសប៊ុកផ្លូវការនារសៀលថ្ងៃទី១២ ខែឧសភា នេះ ក្រោយសារព័ត៌មានថៃនៅថ្ងៃម្សិលមិញ ផ្សាយព្រោងព្រាតអំពីសម្ដីរបស់រដ្ឋមន្ត្រីការទេសថៃ ដែលនិយាយថា «ក្រោមអនុសញ្ញាច្បាប់សមុទ្រ បន្ទាប់ពីលុបចោលអនុស្សារណៈយោគយល់គ្នាឆ្នាំ២០០១ ត្រូវតែដំណើការក្នុងក្របខ័ណ្ឌនៃអនុសញ្ញាដែលមានច្រើនដំណាក់កាល ហើយវិធីសាស្ត្រចម្បងគួរតែជាការចរចារវាងកម្ពុជា-ថៃជាមុនសិន។

ចំពោះសម្ដីរបស់រដ្ឋមន្ត្រីការបរទេសថៃលើកឡើងបែបនេះ សម្ដេច ហ៊ុន សែន បានឆ្លើយតបទៅវិញថា ប្រសិនបើ រដ្ឋមន្ត្រីការបរទេសថៃលើកឡើងបែបនេះមែននោះ គឺវាផ្ទុយស្រឡះជាមួយសកម្មភាពរបស់ភាគីថៃ ដែលបានលុបចោល MOU2001 ដោយឯកតោភាគី ពោលគឺដែលបានលុបចោលក្របខណ្ឌនៃការចរចាទ្វេភាគីរួចស្រេចទៅហើយសម្រាប់ដែនសមុទ្រត្រួតស៉ីគ្នា។

សម្ដេច ហ៊ុន សែន សរសេរលើទំព័រហ្វេសប៊ុកដូច្នេះថា៖«ក្នុងឋានៈជាប្រមុខរដ្ឋស្តីទី ខ្ញុំសូមរំលឹកដល់រាជរដ្ឋាភិបាល សូមកុំបើកការចរចាទ្វេភាគីណាមួយជាមួយថៃលើបញ្ហាសមុទ្រ និងសូមដើរត្រង់ទៅរកយន្តការច្បាប់សមុទ្រ ឆ្នាំ១៩៨២តែម្តង ដោយមិនរង់ចាំការយល់ព្រមណាមួយពីភាគីថៃនោះឡើយ។ »។

សម្ដេច ហ៊ុន សែន បន្តសង្កត់ធ្ងន់ថា៖«យើងសោកស្តាយដែលថៃលុប MOU 2001 ចោល តែយើងក៏អរគុណថៃដែលបានជួយយើងឲ្យប្រើប្រាស់យន្តការអន្តរជាតិជំនួសវិញ។»។

គួររម្លឹកថា​ រដ្ឋាភិបាលថៃ បាន​សម្រេច​លុប​ជា​ឯកតោ​ភាគី​អនុស្សរណៈ​នៃការ​យោគយល់​ឆ្នាំ២០០១ (MoU-2001) កាលពីរសៀលថ្ងៃទី៥ ខែឧសភា ក្រោមហេតុផលអនុស្សរណៈឆ្នាំ2001សម្រាប់ដោះស្រាយតំបន់ទាមទារដែនសមុទ្រត្រួតគ្នា ដែលចុះហត្ថលេខា និងចរចារជាមួយជិត២៥ឆ្នាំមកនេះ គ្មានវឌ្ឍនភាព។ ភ្លាមៗ ក្រោយថៃលុបចោលកម្ពុជា បានសម្រេចថា នឹងប្រើប្រាស់យន្តការនៃការផ្សះផ្សារដោយចាប់បង្ខំ និងគូសបញ្ជាក់ថា ការបញ្ចប់ ឬការដកខ្លួនរបស់ថៃចេញពីMoU2001 នេះ មិនប៉ះពាល់ដល់សិទ្ធិស្របច្បាប់របស់កម្ពុជានៅលើដែនសមុទ្ររបស់ខ្លួនឡើយ។

នៅក្នុងជំនួបត្រីភាគីរវាងកម្ពុជា-ថៃ ក្រោមការសម្របសម្រួលរបស់ហ្វីលីពីន, រាជរដ្ឋាភិបាលកម្ពុជា អះអាងថា ខ្លួនបានប្រាប់ទៅកាន់នាយករដ្ឋមន្ត្រីថៃថា កម្ពុជា នឹងប្រើប្រាស់យន្តការផ្សះផ្សាដោយចាប់បង្ខំនេះ ដើម្បីដោះស្រាយវិវាទដែនសមុទ្រ។

បន្ទាប់នៅព្រឹកថ្ងៃទី១២ ខែឧសភា នេះ បន្ទាប់ពីការផ្សាយរបស់សារព័ត៌មានថៃ, នាយករដ្ឋមន្ត្រីកម្ពុជា ថ្លែងចេញពីវិមានរដ្ឋសភាបញ្ជាក់ថា កម្ពុជានៅតែប្រើយន្តការផ្សះផ្សាដោយបង្ខំលើព្រំដែនសមុទ្រជាមួយថៃដដែល បើទោះបីថៃប្ដូរជំហរចង់ចរចាទ្វេភាគីវិញក្ដី៕

ដោយ៖ ង៉ិល ណារ៉ាត់