មន្ត្រី​ជាន់ខ្ពស់​ក្រសួងឧស្សាហកម្ម៖ ​SME ជាឆ្អឹងខ្នងសេដ្ឋកិច្ច ដែលបានរួមចំណែកបង្កើតការងារ និង​ប្រាក់ចំណូល

លោក ញឹម ខេមារា រដ្ឋមន្ត្រីស្តីទីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ​មាន​ប្រសាសន៍ថា ​សហគ្រាស​ធុន​មីក្រូ តូច និង​មធ្យម គឺជា​ឆ្អឹងខ្នង​នៃ​សេដ្ឋកិច្ច​ ដែលបានរួមចំណែក​ដល់ការបង្កើត​ការងារ ប្រាក់ចំណូល និង​នវវានុវត្តន៍​។​

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

​យុទ្ធសាស្ត្រនេះនឹងបម្រើជាផែនទីបង្ហាញផ្លូវសម្រាប់ដឹកនាំកិច្ចខិតខំប្រឹងប្រែងរបស់យើង ក្នុងការ​ពង្រឹងភាពប្រកួតប្រជែង បង្កើនការចូលរួមក្នុងខ្សែច្រវាក់តម្លៃ និងគាំទ្រដល់គោលដៅ​អភិវឌ្ឍន៍​ជាតិ។​

​លោក ញឹម ខេមារា បានលើកឡើងនៅក្នុងកម្មវិធី​សិក្ខាសាលាពិគ្រោះ​យោបល់ស្តីពីយុទ្ធសាស្ត្រ​ជាតិអភិវឌ្ឍន៍សហគ្រាស​​​ធុនមីក្រូ តូច និងមធ្យម ដោយប្រមូលផ្តុំភាគីពាក់ព័ន្ធតំណាងក្រសួង-ស្ថាប័ន វិស័យឯកជន ដៃគូអភិវឌ្ឍន៍ អង្គការជាតិ និងអន្តរជាតិប្រមាណ ១០០ នាក់ នៅថ្ងៃទី ២៥ ខែវិច្ឆិកា ឆ្នាំ ២០២៥។​

លោក ញឹម ខេមារា បានលើកឡើងពីសារៈសំខាន់នៃសហគ្រាសធុនមីក្រូ តូច និងមធ្យម ក្នុងការ​បង្កើនភាពធន់ និងភាពប្រកួតប្រជែងរយៈពេលវែងនៃសេដ្ឋកិច្ចជាតិ។

​បច្ចុប្បន្ន ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ កំពុងប្រមូលធាតុចូល​ពីស្ថាប័ន​សាធារណៈ និងឯកជន ដើម្បីធានាថា យុទ្ធសាស្ត្រជាតិនេះនឹងដោះស្រាយតម្រូវការជាក់ស្តែង ដោយ​កែលម្អបរិយាកាសធុរកិច្ច ពង្រឹងសមត្ថភាពផលិត ពង្រីកឱកាសឈានចូលទីផ្សារ និងការ​ប្រើប្រាស់ហេដ្ឋារចនាសម្ព័ន្ធគាំទ្រ។​

លោក ដាវ អានសាន រដ្ឋលេខាធិការ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកឡើងថា៖ «តាមរយៈយុទ្ធសាស្ត្រនេះ រាជរដ្ឋាភិបាលមានគោលបំណង​ធ្វើទំនើប​កម្មសហគ្រាសធុនមីក្រូ តូច និងមធ្យម ឱ្យក្លាយជាសហគ្រាសដែលបង្កើតតម្លៃបន្ថែមខ្ពស់ មានភាពប្រកួតប្រជែង និងជំរុញដោយនវានុវត្តន៍»។​

យុទ្ធសាស្រ្តនេះរួមបញ្ចូល​ការលើកកម្ពស់​សហគ្រាស​ធុនមីក្រូ តូច និងមធ្យម ជាផ្នែកមួយនៃខ្សែច្រវាក់ផលិតកម្ម ពង្រឹងឧស្សាហកម្ម​ប្រតិ​គមន៍ អភិវឌ្ឍតំបន់ប្រមូលផ្តុំសហគ្រាសធុនតូច និងមធ្យម និងជំរុញការអនុវត្តអាជីវកម្ម​ប្រកបដោយ​ទំនួល​ខុសត្រូវផ្នែកសង្គម បរិស្ថាន និងអភិបាលកិច្ច។

ធាតុចូលដែលប្រមូលបានពីសិក្ខាសាលាពិគ្រោះយោបល់នេះ នឹងត្រូវបានប្រើប្រាស់ ដើម្បីកែលម្អសេចក្តីព្រាងយុទ្ធសាស្ត្រ មុននឹងដាក់ជូនរាជរដ្ឋាភិបាលពិនិត្យ និងអនុម័តសម្រាប់ការអនុវត្ត៕