ព័ត៌មានជាតិ

ពីវេទិកាធុរកិច្ចកម្ពុជា-ចិន៖ ម្ចាស់សហគ្រាសចិនសួរមន្រ្តីជំនាញកម្ពុជាពីនីតិវិធីនាំសាច់គោចេញទៅក្រៅប្រទេស

បានផុស

៦ ម៉ោង មុន

នៅ

ថ្ងៃព្រហស្បតិ៍ ២៣ កក្កដា ២០២៦

ដោយ

ក្នុងវេទិកាកិច្ចសហប្រតិបត្តិការធុរកិច្ចកម្ពុជាចិន ក្នុងចំណោមសំនួរដេញដោលជាច្រើន ម្ចាស់សហគ្រាសចិនបានសាកសួរមន្រ្តីជំនាញកម្ពុជាពីនីតិវិធីសម្រាប់ការនាំសាច់គោចេញទៅបរទេស ជាពិសេសទៅកាន់ទីផ្សារប្រទេសចិន។

ជាការឆ្លើយតប មន្រ្តីជំនាញតំណាងមកពីក្រសួងកសិកម្ម និងក្រសួងពាណិជ្ជកម្មបានពន្យល់ពីដំណើរការជុំវិញការអនុវត្តនីតិវិធី សម្រាប់ការនាំចេញសាច់គោទៅបរទេស និងក៏ដូចជាទៅកាន់ប្រទេសចិនជាដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហុក គីមធួន ប្រធាននាយកដ្ឋានផែនការ និងស្ថិតិក្រសួងក្រសួងកសិកម្ម រុក្ខាប្រមាញ់ និងនេសាទបានគូសបញ្ជាក់ថា ការនាំចេញសាច់គោចេញទៅក្រៅប្រទេស ធ្វើឡើងផ្អែកលើពិធីសារឬអនុស្សរណៈនៃការយោគយល់គ្នារវាងប្រទេសនាំចេញនិងប្រទេសនាំចូល។

ដោយអនុវត្តតាមកិច្ចព្រមព្រៀង ភាគីកម្ពុជាត្រូវធ្វើសកម្មភាព និងរៀបចំឯកសារទៅតាមលក្ខខណ្ឌតម្រូវរបស់ប្រទេសនាំចូលជាចម្បង។ ក្នុងនោះមានដូចជាត្រូវមានវិញ្ញាបនបត្របញ្ជាក់ភូតគាមអនាម័យ (SPS) ដើម្បីធានាថាសាច់គោមានសុវត្ថិភាព និងគ្មានជំងឺឆ្លងផ្សេងៗ។

ដោយឡែកតំណាងក្រសួងពាណិជ្ជកម្ម លោកស្រី ប៊ុន ចំណាន បានលើកឡើងពីឯកសារ និងលិខិតអនុញ្ញាតចាំបាច់ផ្សេងៗសម្រាប់ការនាំសាច់គោចេញមានដូចជា វិញ្ញាបនបត្របញ្ជាក់ដើមកំណើតទំនិញ (Certificate of Origin – C/O) ដែលត្រូវស្នើសុំចេញពីក្រសួងពាណិជ្ជកម្ម ក្នុងនាមជាសមាជិកអាស៊ាន ឬអាសិប (RCEP)។

លិខិតអនុញ្ញាតនាំចេញ (Export Permit) ប្រសិនបើភាគីនៃប្រទេសនាំចូលដូចជាប្រទេសចិន មានតម្រូវការបន្ថែម។

ជាមួយគ្នានេះ មន្រ្តីជំនាញបានផ្តល់ការណែនាំសម្រាប់អ្នកវិនិយោគ ឬអ្នកនាំចេញក៏ត្រូវសិក្សា និងសាកសួរទៅភាគីក្រុមហ៊ុន ឬប្រទេសសាមីឱ្យបានច្បាស់អំពីច្បាប់ និងលក្ខខណ្ឌតម្រូវនៃការនាំចូល។

បន្ថែមពីនេះ មន្រ្តីក្រសួងកសិកម្មផ្តល់យោបល់ឲ្យអ្នកវិនិយោគ អាចទាក់ទងផ្ទាល់ជាមួយអគ្គនាយកដ្ឋានសុខភាពសត្វនិងផលិតកម្មសត្វ ដើម្បីទទួលបានការសម្របសម្រួលលើនីតិវិធីក្នុងការនាំចេញសាច់គោទៅក្រៅប្រទេស៕

Related Topics: