លីវ ជីលី ចង្អុលបង្ហាញចំណុចដែលយល់ថា អយុត្តិធម៌សម្រាប់មនុស្សស្រី ពាក់ព័ន្ធសិទ្ធិ និងការរស់នៅក្នុងសង្គម

អតីតបវរកញ្ញា Miss Grand Cambodia 2020 កញ្ញា លីវ ជីលី បានបង្ហោះសារបង្ហាញទស្សនៈផ្ទាល់ខ្លួន ដោយលើកឡើងថា ស្ត្រីនៅតែជួបភាពអយុត្តិធម៌ និងការរិះគន់ខ្លាំងជាងបុរសក្នុងការរស់នៅប្រចាំថ្ងៃ ជាពិសេសទាក់ទងនឹងសេរីភាព ការកម្សាន្ត និងទំនាក់ទំនងស្នេហា។

តាមរយៈសារលើបណ្តាញសង្គម កញ្ញា លីវ ជីលី បានរៀបរាប់ ៧ ចំណុច ដែលកញ្ញាយល់ថា មានភាពអយុត្តិធម៌ចំពោះស្ត្រី។ ក្នុងនោះ កញ្ញាលើកឡើងថា ស្ត្រីតែងតែរងការរិះគន់ ពេលទៅកម្សាន្តនៅ Pub ទោះគ្រាន់តែរាំលេងធម្មតាក៏ដោយ ខណៈបុរសវិញមិនសូវត្រូវបានវាយតម្លៃដូចគ្នាទេ។ កញ្ញាអះអាងទៀតថា សូម្បីតែខ្លួនមិនចេះផឹកស្រា (គឺផឹកតែកូកា ទឹកសុទ្ធ) ក៏នៅតែមានពាក្យពេចន៍វាយតម្លៃបែបនេះបែបនោះ។

បន្ថែមពីនេះ កញ្ញាក៏បាននិយាយអំពីការវិនិច្ឆ័យរបស់សង្គមលើស្ត្រី ដោយការយកប្រពៃណី និងសីលធម៌មកដាក់គំនាបលើស្ត្រី ក៏ដូចជាការរិះគន់ដោយគ្មានមូលដ្ឋាន ជុំវិញសកម្មភាពកម្សាន្ត ឬការប្រើសិទ្ធសេរីភាពក្នុងការរស់នៅរបស់ស្ត្រីជាដើម។

អតីតម្ចាស់មកុដរូបនេះ បញ្ជាក់ទៀតថា ស្ត្រីសម័យថ្មីអាចរកចំណូល និងទទួលខុសត្រូវលើជីវិតខ្លួនឯងបាន ដូច្នេះគួរតែទទួលបានសិទ្ធ និងការគោរពស្មើភាពជាមួយបុរស ដោយមិនគួរត្រូវបានវាយតម្លៃខុសគ្នាតាមស្តង់ដារពីរនោះឡើយ។ កញ្ញាគូសបញ្ជាក់ទៀតថា មនុស្សបើចង់ខូច ទោះចាក់សោរប៉ុន្មានជាន់ ក៏ខូចបាន ដូច្នេះការផ្នត់គំនិតហួសសម័យកាល ដែលគ្រាន់ជាហេតុផលដើម្បីដាក់សម្ពាធលើសិទ្ធិសេរីភាពមនុស្សស្រីពុំគួរគប្បីលើសលុបពេកដែរ។

ក្រោយសារបង្ហោះនេះ មានមហាជនជាច្រើនចូលរួមបញ្ចេញមតិ។ អ្នកខ្លះបានសម្តែងការគាំទ្រ និងលើកទឹកចិត្តកញ្ញា កុំឱ្យខ្វល់នឹងការរិះគន់ ខណៈមួយចំនួនទៀតយល់ថា ការរិះគន់ខ្លះកើតចេញពីបំណងចង់ឃើញកញ្ញាកាន់តែប្រសើរ និងរក្សារូបភាពល្អក្នុងនាមជាបុគ្គលសាធារណៈអីជាដើម៕ អត្ថបទ៖ ចាន់រ៉ា