លោក ទីវ តារារិទ្ធ សោកស្តាយ ក្រោយឃើញក្រុមហ៊ុនធំៗមួយចំនួន ឧបត្ថម្ភមាតិកាលេងសើចខ្វះគុណតម្លៃ

ក្រោយវិលត្រឡប់ពីដំណើរជិះកង់ផ្សងព្រេង លោក ទីវ តារារិទ្ធ បានបង្ហាញក្តីបារម្ភជាខ្លាំងចំពោះនិន្នាការមាតិកាឌីជីថលនៅកម្ពុជា បន្ទាប់ពីសង្កេតឃើញថា មាតិកាបែបលេងសើច ខ្វះក្រមសីលធម៌ និងវិជ្ជាជីវៈ កំពុងទទួលបានការគាំទ្រ និងឧបត្ថម្ភពីក្រុមហ៊ុនធំៗ។ ផ្ទុយទៅវិញ អ្នកផលិតមាតិកាប្រកបដោយគុណភាព និងផ្តល់ប្រយោជន៍ដល់សង្គម ហាក់កំពុងបាត់បង់ឱកាសបន្តិចម្តងៗ។

តាមរយៈការសារលើបណ្តាញសង្គម នៅព្រឹកថ្ងៃទី២១ ខែកក្កដា ឆ្នាំ២០២៦ លោក ទីវ តារារិទ្ធ បានរៀបរាប់ថា រឿងដែលលោកចាប់អារម្មណ៍បំផុត គឺការផលិតមាតិកា ឬខ្លឹមសារបែបឌីជីថលជាលក្ខណៈលេងសើចច្រើន ហើយប្រាស់ចាកពីក្រមសីលធម៌ និងគ្មានវិជ្ជាជីវៈ ហើយរឿងដែលមិនគួរឲ្យជឿនោះ គឺក្រុមហ៊ុនធំជាច្រើននៅកម្ពុជា កំពុងសហការ និងឧបត្ថម្ភសកម្មភាពទាំងអស់នោះ ។

លោកបានសម្តែងការសោកស្តាយជាខ្លាំង ពិសេសគឺនៅពេលក្រុមហ៊ុនធំៗជាច្រើនកំពុងចំណាយថវិកាឧបត្ថម្ភលើមាតិកាបែបនេះ ស្របពេលសង្គមកម្ពុជានៅមានបញ្ហាជាច្រើនដែលត្រូវការការយកចិត្តទុកដាក់។ ប៉ុន្តែបើក្រឡេកមើលសកម្មភាពជាក់ស្តែង បែរជាផុសផុលផលិតមាតិកាដែលគ្មានគុណតម្លៃដល់សង្គម និងសាធារណជនទៅវិញ។ ហើយអ្វីដែលកាន់តែមិនគួរឱ្យជឿសម្រាប់លោក ការលេងសើចមិនសមរម្យទាំងនោះ មានក្រុមហ៊ុនធំៗជាច្រើនចំណាយថវិកាឧបត្ថម្ភថែមទៀត។

លោកជឿថា ការគាំទ្របែបនេះ នឹងអាចធ្វើឱ្យអ្នកផលិតមាតិកាប្រកបដោយវិជ្ជាជីវៈ និងអ្នកដែលខិតខំបង្កើតខ្លឹមសារដែលមានប្រយោជន៍ដល់សង្គម ប្រឈមនឹងការបាត់បង់ឱកាសកាន់តែច្រើន។

ក្រោយការលើកឡើងនេះ ក៏មានអ្នកប្រើប្រាស់បណ្ដាញសង្គមមួយចំនួនបានបញ្ចេញមតិគាំទ្រ និងយល់ស្របថា មាតិកាដែលមានគុណភាព និងផ្តល់ចំណេះដឹង គួរតែទទួលបានការលើកទឹកចិត្ត និងការគាំទ្របន្ថែមពីស្ថាប័ន និងក្រុមហ៊ុនឯកជន។

ជាមួយគ្នានេះ លោក ទីវ តារារិទ្ធ បានសម្តែងក្តីសង្ឃឹមថា និន្នាការនៃការផលិត និងការគាំទ្រមាតិកាឌីជីថលនៅកម្ពុជា នឹងអាចផ្លាស់ប្តូរទៅក្នុងទិសដៅវិជ្ជមាន ដោយផ្តល់តម្លៃកាន់តែច្រើនដល់ខ្លឹមសារដែលរួមចំណែកអភិវឌ្ឍសង្គម អប់រំ និងលើកកម្ពស់ប្រយោជន៍សាធារណៈ ជាជាងផ្តោតលើមាតិកាកម្សាន្តដែលគ្មានតម្លៃជាសារសំខាន់៕