Messi ឡើងមកឈរ Top 3 ក្នុងបេក្ខភាពប្រជែងពាន Ballon d’Or ក្រោយ World Cup 2026 បញ្ចប់

សារព័ត៌មាន GOAL បានវាយតម្លៃខ្សែប្រយុទ្ធស្លាបរបស់ក្រុមជម្រើសជាតិ អាហ្សង់ទីន កីឡាករ Lionel Messi ឡើងមកចំណាត់ថ្នាក់កំពូលទាំង ៣ ក្នុងបេក្ខភាពប្រជែងពានរង្វាន់ Ballon d’Or 2026។

តាមការវាយតម្លៃរបស់ស្ថាប័នព័ត៌មានដ៏ធំមួយនេះ គឺខ្សែប្រយុទ្ធរបស់ Bayern Munich និងជម្រើសជាតិ អង់គ្លេស Harry Kane ឈរលេខ ១, ខ្សែប្រយុទ្ធរបស់ Barcelona និងក្រុមជម្រើសជាតិ អេស្ប៉ាញ កីឡាករ Lamine Yamal ឈរលេខ ២ និងខ្សែប្រយុទ្ធរបស់ Inter Miami និង អាហ្សង់ទីន កីឡាករ Lionel Messi ឈរលេខ ៣។

៣. Lionel Messi៖ នៅរដូវកាល ២០២៥-២០២៦ Messi បានបញ្ចូលទីសរុបចំនួន ៤៤ គ្រាប់ និងបញ្ជូន (assists) ៣០ លើក។ កីឡាករបានឈ្នះពាន MLS Cup ១ និងនាំអាហ្សង់ទីន ឡើងទៅកាន់វគ្គផ្តាច់ព្រ័ត្រ World Cup 2026។

២. Lamine Yamal៖ ទោះបីជា Yamal បានជួយឱ្យ អេស្ប៉ាញ លើកពាន World Cup 2026 ក៏ដោយ ក៏រូបគេមិនត្រូវបានចាត់ថ្នាក់ស្ថិតនៅលេខ ១ នោះដែរ ដោយសាររូបគេមានស្ថិតិនៅក្រោម Harry Kane។ នៅរដូវកាល ២០២៥-២០២៦ Yamal រកបាន ២៦ គ្រាប់ និង ២១ បញ្ជូន (assists)។​ កីឡាករបានឈ្នះពាន World Cup, La Liga និង Supercopa de Espana។

១. Harry Kane៖ ខ្សែប្រយុទ្ធរបស់ជម្រើសជាតិ អង់គ្លេស រូបនេះ មានសមិទ្ធផលជាលក្ខណៈបុគ្គលយ៉ាងអស្ចារ្យកាលពីរដូវកាល ២០២៥-២០២៦ ដោយរកបាន ៧៣ គ្រាប់, ៨ បញ្ជូន (assists)។ ជាមួយគ្នានេះ បានឈ្នះពាន Bundesliga ១, DFB-Pokal និង DFL-Supercup។

គួរបញ្ជាក់ជាថ្មី ថា ការលើកឡើងខាងលើ គឺជាការវាយតម្លៃចំណាត់ថ្នាក់ដោយស្ថាប័នសារព័ត៌មាន GOAL។ យ៉ាងណា សម្រាប់កីឡាករឈ្នះជាផ្លូវការ នឹងត្រូវប្រកាសនៅថ្ងៃ ចន្ទ ទី ២៦ ខែ តុលា ឆ្នាំ ២០២៦៕

ប្រែសម្រួល៖ សេម កុសល
ប្រភព៖ GOAL