ព័ត៌មានជាតិ

ឃាត់ខ្លួនជនល្មោភកាមម្នាក់ ពាក់ព័ន្ធនឹងការរួមភេទជាមួយអនីតិជន

បានផុស

៥ years មុន

នៅ

ថ្ងៃព្រហស្បតិ៍ ៦ ឧសភា ២០២១

ដោយ

បាត់ដំបង ៖ បុរសម្នាក់ដែលជាជនល្មោភកាម ត្រូវបានកម្លាំងសមត្ថកិច្ចមូលដ្ឋាន ធ្វើការឃាត់ខ្លួនដើម្បីបញ្ជូនទៅតុលាការ តាមពាក្យបណ្តឹងរបស់ម្តាយក្មេងស្រីរងគ្រោះ ដោយសារតែជនសង្ស័យរូបនេះ បានធ្វើសកម្មភាពរួមភេទជាមួយអនីតិជនជាច្រើនលើកច្រើនសាររួចមក។

ការឃាត់ខ្លួនបានធ្វើឡើង កាលពីវេលាម៉ោង ១ និង ៣០ នាទី រសៀល ថ្ងៃទី ៦ ខែឧសភា ឆ្នាំ២០២១ ត្រង់ចំណុច ភូមិស្ពានទំនាប ឃុំបួរ ស្រុកភ្នំព្រឹក ខេត្តបាត់ដំបង ដោយពាក់ព័ន្ធពីបទ រួមភេទជាមួយអនីតិជនអាយុក្រោម ១៥ឆ្នាំ។

ជនសង្ស័យ ដែលត្រូវនគរបាលស្រុកភ្នំព្រឹក ឃាត់ខ្លួនមានឈ្មោះ ពៅ ទូច ហៅ ពៀញ ភេទប្រុស អាយុ ៣១ឆ្នាំ មានទីលំនៅភូមិ ស្ពានទំនាប ឃុំបួរ ស្រុកភ្នំព្រឹក ខេត្តបាត់ដំបង។

ការឃាត់ខ្លួន គឺដោយយោងតាមពាក្យបណ្តឹងរបស់ស្ត្រីឈ្មោះ សុខ សារី អាយុ ៦៨ឆ្នាំ មានទីលំនៅភូមិស្ពានទំនាប ឃុំបួរ ស្រុកភ្នំព្រឹក ខេត្តបាត់ដំបង បានប្តឹងជនសង្ស័យខាងលើដែលធ្វើសកម្មភាព លួងលោមកូនស្រីបង្កើតរបស់គាត់ឈ្មោះ ច.ស.រ អាយុ១៥ឆ្នាំ រស់នៅជាមួយគាត់ ដើម្បីរួមភេទបានសម្រេចជាច្រើនដង។

បច្ចុប្បន្នករណីនេះ ជនសង្ស័យខាងលើត្រូវបានសមត្ថកិច្ចកសាងសំណុំរឿង ដើម្បីបញ្ជូនទៅសាលាដំបូងខេត្តបាត់ដំបងក្នុងការចាត់វិធានការតាមនីតិវិធីច្បាប់ ៕

ដោយ ៖ សោ និយមរ័ត្ន