ព័ត៌មានជាតិ

ឃាតករម្នាក់ ជក់ថ្នាំញៀន ហិតកាវឡើងចង់ឆ្កួត វាយយុវជនអនាថាបែកខួរស្លាប់

បានផុស

៥ years មុន

នៅ

ថ្ងៃសៅរ៍ ៨ ឧសភា ២០២១

ដោយ

បន្ទាយមានជ័យ ៖ ឃាតករម្នាក់មានកម្លាំងដូចយក្ស ជក់ថ្នាំញៀន ហិតកាវប៉ះកង់ឡើងចង់ឆ្កួត បានវាយទៅលើយុវជនអនាថាម្នាក់ចង់បែកខួរបណ្តាលឲ្យស្លាប់នៅលើវេទិកាខេត្តបន្ទាយមានជ័យ នៅវេលាម៉ោង៣ រសៀល ថ្ងៃទី៨ ខែឧសភា ឆ្នាំ២០២១ នៅចំណុច សួនមានជ័យ នៅភូមិ៣ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។

លោក យ៉ាន់ សុវណ្ណ មេបញ្ជាការកងរាជអាវុធហត្ថក្រុងសេរីសោភ័ណបានប្រាប់អ្នកយកព័ត៌មានឲ្យដឹងថា ជនសង្ស័យ មានឈ្មោះ ហួយ រតនា ភេទប្រុស អាយុប្រហែល ៣២ឆ្នាំ រស់នៅភូមិ អូរតាគាំម២ ឃុំទួលតាឯក ស្រុកបាត់ដំបង ខេត្តបាត់ដំបង។

លោកយ៉ាន់ សុវណ្ណ បានបញ្ជាក់ឲ្យដឹងបន្តទៀតថា តាមការអះអាងរបស់អ្នកថែសួនបាននិយាយថា ឃាតករនេះគេបានឃើញវត្តមាននៅក្នុងសួនមានជ័យនេះតាំងពីថ្ងៃទី៧ ខែឧសភាមកម្ល៉េះ ជននេះជក់ថ្នាំញៀនផង ហិតកាវប៉ះកង់ទៀត ជននេះដូចមនុស្សឆ្កួតដើររករឿងគេពេញសួនមានជ័យតែម្តងគ្មានអ្នកហ៊ានតដៃនិងជននេះឡើយ។

លោកបានបញ្ជាក់ឲ្យដឹងទៀតថា លុះនៅម៉ោងជិត៣រសៀលស្រាប់តែឃើញឃាតករនោះបានធាក់ទៅលើជន មិនស្គាល់ឈ្មោះ ភេទប្រុស អាយុប្រហែល ៣៧ឆ្នាំ ជាជនអនាថាចំមុខឡើងចង់បែកខួរបណ្តាលឲ្យស្លាប់នៅលើវេទិកាតែម្តង។

ក្រោយពីធ្វើសកម្មភាពហើយបានរត់ចុះមកក្រោម សន្តិសុខភូមិ៣នាក់ដេញចាប់ទើបបាន។ ឃាតករត្រូវបានកម្លាំងអាវុធហត្ថក្រុងបញ្ជូនមកទីបញ្ជាការកងរាជអាវុធហត្ថខេត្តដើម្បីរៀបចំសំណុំរឿងបញ្ជូនទៅតុលាការនៅថ្ងៃស្អែកចំណែកសព ត្រូវកម្លាំងអាវុធហត្ថចាត់ចែងឲ្យគេបូជានៅវត្តទៅតាមប្រពៃណីហើយផងដែរ៕

ដោយ ៖ វ៉ាន់ ណាង

Related Topics:អំពើហិង្សា