បាត់​ក្របី ៣ ក្បាល រត់​​ទៅ​ប្តឹងសមត្ថកិច្ចពីរ​ស្រុក​ចុះ​ស្រាវជ្រាវ​ទើប​រកឃើញ

ខេត្តបាត់ដំបង÷ លោកវរសេនីយ៍ឯកស៊ុន សុវណ្ណ អធិការនគរបាលស្រុកសង្កែបានឲ្យដឹងថា ក្រោយពីបានទទួលពាក្យ​បណ្តឹង​ពីជនរងគ្រោះជាម្ចាស់សត្វក្របីទាំង៣ក្បាល សមត្ថកិច្ចជំនាញនៃអធិការស្រុកសង្កែខិតខំស្រាវជ្រាវរកមុខសញ្ញាគ្រប់តំបន់ ដើម្បីជាប្រយោជន៍ដល់ប្រជាពលរដ្ឋជាជនរងគ្រោះជាបន្តបន្ទាប់។

រហូតដល់ថ្ងៃទី២៥ខែឧសភាឆ្នាំ២០២១ វេលាម៉ោង១៥និ១០នាទី នគរបាលស្រុកគាស់ក្រឡ ដែលមានលោវិរសេនីយ៍ឯកប៉ាង ហៀង ជាអធិការនគរបាលស្រុក បានធ្វេីការស្រាវជ្រាវ រកឃេីញសត្វក្របីចំនួន០៣ក្បាល ដែលបានបាត់បង់ដោយករណីចោរកម្ម ក្នុងមូលដ្ឋានស្រុកសង្កែកន្លងមក ក៏បានសហការរវាងសមត្ថកិច្ចទាំង២ស្រុក ដើម្បីនាំយកសត្វក្របីមកប្រគល់ជូនម្ចាស់វិញ។

ប្រភពដដែលខាងលើ បានបញ្ជាក់បន្តថា ករណីចោរកម្ម(លួចសត្វក្របី)ខាងលើ បានកើតឡើងកាលពីថ្ងៃទី២០ខែឧសភា​ឆ្នាំ២០២១ វេលាចន្លោះពីម៉ោង០៦និង០០នាទីយប់ រហូតដល់វេលាម៉ោង០៨និង០០នាទី ឈានចូលថ្ងៃទី២១ខែឧសភាឆ្នាំ២០២១ នៅចំណុចអូរដៃអំពិលទឹក ភូមិកំពង់ព្រះ ឃុំកំពង់ព្រះស្រុកសង្កែខេត្តបាត់ដំបង បង្កឡើងដោយជនមិន​ស្គាល់អត្ដសញ្ញាណបានធ្វើសកម្មភាពលួចយកសត្វក្របីឈ្មោលចំនួន០៣ក្បាល ដែលជារបស់ជនរងគ្រោះឈ្មោះ​យឹង ឈៀក ភេទប្រុសអាយុ៥៦ឆ្នាំ មានទីលំនៅក្រុម០៦ ភូមិកំពង់ព្រះ ឃុំកំពង់ព្រះស្រុកសង្កែ ខេត្ដបាត់ដំបង។

ក្រោយកេីតហេតុជនរងគ្រោះ បានប្តឹងចូលមកសមត្ថកិច្ចនគរបាលស្រុកសង្កែ ហេីយឆ្លងតាមរយៈការសហការណ៍ស្រាវជ្រាវយ៉ាងយកចិត្តទុកដាក់ ទេីបឈានដល់ការរកឃេីញសត្វក្របីទាំង៣ និងបានប្រគល់ជូនជនរងគ្រោះជាម្ចាស់ក្របីវិញ។

លោកអធិការស្រុកបានបញ្ជាក់បន្តថា ចំណែកមុខសញ្ញាដែលជាជនសង័្សយក្នុងករណីខាងលើនេះ សមត្ថកិច្ចជំនាញនៃអធិការស្រុកបានកំណត់អត្តសញ្ញាណបានរួចរាល់ដែរ កំពុងរៀបចំកសាងសំណុំរឿងបញ្ជូនទៅតុលាការអនុវត្តតាមផ្លូវច្បាប់៕

អត្ថបទ៖ សៅ សារិទ្ធ