បុរស​ម្នាក់​ដេក​ស្លាប់ក្បែរ​គល់​​ស្ពាន ប្រភព​អ្នក​ជិត​ខាង​ប្រាប់​ថា​ ជនរងគ្រោះ​ទើប​មក​ពី​ថៃ

ខេត្តបាត់ដំបង៖ សពមនុស្សប្រុសម្នាក់ ត្រូវបានគេប្រទះឃើញដេកស្លាប់ នៅលើស្មៅគល់ស្ពានមួយកន្លែង ដែលគេសង្ស័យថា អាចបណ្តាលមកពីការផឹកសុរា រហូតដាច់បាយទើបបណ្តាលអោយកើតជាខ្យល់គ។ ការប្រទះឃើញនេះគឺនៅថ្ងៃទី០១ ខែមិថុនា ឆ្នាំ២០២១ វេលាម៉ោងប្រមាណ២និង៣០នាទី  ត្រង់ចំណុចក្រុមទី១ ភូមិអន្លង់វិល ឃុំអន្លង់វិល ស្រុកសង្កែ ខេត្តបាត់ដំបង ។

បន្ទាប់ពីមានការចុះពិនិត្យពីសំណាក់កម្លាំងសមត្ថកិច្ច ក៏ដូចជាក្រុមគ្រូពេទ្យមូលដ្ឋាន ទើបអាចកំណត់អត្តសញ្ញាណបានថា ជនរងគ្រោះឈ្មោះទិត្យ ខួច ភេទប្រុស អាយុ៤៧ឆ្នាំ មានទីលំនៅភូមិទួលល្វៀង ឃុំអូរដំបង២ ស្រុកសង្កែ ខេត្តបាត់ដំបង។

បើតាមការអះអាងពីប្រភពមួយចំនួនបាន​ឲ្យ​ដឹងថា កន្លងមកបុរសរូបនេះធ្លាប់ទៅធ្វើការនៅប្រទេសថៃរាប់ឆ្នាំ ដោយបានផ្ញើប្រាក់កាសមក​ឲ្យ​ភរិយាជាហូរហែរផងដែរ ប៉ុន្តែក្រោយពីបានវិលត្រឡប់មកផ្ទះវិញ ស្រាប់តែគេឃើញបុរសរូបនេះលែង​ចូលផ្ទះ គឺគិតតែពីដើរផឹកស្រា និងអត់អាហារជាញឹកញាប់រហូតដល់ស្លាប់តែម្តង ដែលបញ្ហានេះត្រូវបានមជ្ឈដ្ឋានជាច្រើននិយាយថា អាចមានវិបត្តិក្នុងគ្រួសារ។

ដោយឡែកក្រុមគ្រូពេទ្យបានអះអាងថា ការផឹកគ្រឿងស្រវឹងនិងអត់អាហារបែបនេះអាចធ្វើ​ឲ្យ​មនុស្សកើតជាខ្យល់គ។ នៅល្ងាចថ្ងៃដដែលសពក៏បានប្រគល់ទៅអោយក្រុមគ្រួសារ នាំយកទៅបូជាក្នុងទីអារាមវត្តអន្លង់វិល៕

អត្ថបទ៖ សោ និយមរ័ត្ន