ព័ត៌មានជាតិ
លោកស្រី ឱ វណ្ណឌីន ៖ ការចេះខ្លាចនិងមិនមើលស្រាលជំងឺកូវីដ១៩ គឺដើម្បីការពារអាយុជីវិតខ្លួនឯងនិងសហគមន៍ទាំងមូល
ភ្នំពេញ ៖ លោក ស្រី វេជ្ជបណ្ឌិត ឱវណ្ណ ឌីន រដ្ឋលេខាធិការនិងជាអ្នកនាំពាក្យក្រសួងសុខាភិបាលបានលើកឡើងថា ការចេះខ្លាចនិងមិនមើលស្រាលជំងឺកូវីដ១៩ គឺដើម្បីការពារអាយុជីវិតខ្លួនឯងក៏ដូចជាក្រុមគ្រួសារនិងសហគមន៍ផងដែរ។
លោកស្រី បានលើកឡើងនៅក្នុងអត្ថបទមួយដែលបានចុះផ្សាយនៅថ្ងៃនេះថា «ភាគច្រើនយើងតែងតែលឺថា មនុស្សខ្លាចកូវីដ១៩ ក៏ប៉ុន្តែការខ្លាចរបស់យើងហាក់ដូចជាមិនបានឆ្លើយតបទៅនឹងស្ថានភាពឆ្លងនៃជំងឺនេះដែលនៅតែមានការឆ្លងក្នុងចំនួនរាប់រយនាក់ជារៀងរាល់ថ្ងៃ។ បើយើងខ្លាចយើងត្រូវតែខិតខំធ្វើយ៉ាងណាកុំឱ្យមានការឆ្លងដោយមានការប្រុងប្រយ័ត្នខ្ពស់និងការពាររៀងៗខ្លួនជាពិសេសមិនត្រូវបង្កឲ្យមានការជួបជុំណាមួយ ឬ ការចល័តរបស់បុគ្គលជាច្រើនដែលមិនមានភារកិច្ចចាំបាច់ដែលបង្កជាការបរិយាកាសល្អសម្រាប់វីរុសកូវីដ១៩ធ្វើការចម្លងបន្ត ឬ ធ្វើចរាចរណ៍ដោយងាយស្រួល»។
លោកស្រីបានបន្តថា ការខ្លាចរបស់មនុស្សចាំបាច់ត្រូវសម្ដែងចេញជាសកម្មភាពការពារខ្លួនឲ្យបានម៉ត់ចត់ជាជាងការមើលស្រាលលើលទ្ធភាពចម្លងដ៏លឿននិងសាហាវរបស់វីរុសកូវីដ១៩ជាពិសេសពពួកបំលែងថ្មីដែលនាំអោយបុគ្គលនិងក្រុមគ្រួសារធ្លាក់ចូលទៅក្នុងជ្រោះមហន្តរាយនៃជំងឺកូវីដ១៩ និងឈានដល់ការហួសសមត្ថភាពទទួលគ្រប់គ្រងជំងឺនេះ នៅតាមមន្ទីរពេទ្យនានាផងក៏អាចថាបានដែរប្រសិនបើបុគ្គលខ្លះនៅមិនទាន់បានយល់ច្បាស់ចូលរួមការពារខ្លួន ឬ ការចម្លងឲ្យបានល្អទេនោះ។
លោកស្រី ឱវណ្ណឌីន ដែលជាប្រធានគណៈកម្មការចំពោះកិច្ចចាក់វ៉ាក់សាំងកូវី១៩ដែរនោះ បានបន្តទៀតថា «មានបុគ្គលខ្លះនៅតែគិតថា មិនអីទេៗមនុស្សមួយចំនួនអាចគិតថាខ្លួនមិនអីទេបើមិនពាក់ម៉ាសមិនរក្សាគម្លាតគ្នា ឬ ចូលទៅកន្លែងប្រមូលផ្ដុំគ្នាដែលបិទជិតមិនមានខ្យល់ចេញចូលដោយសារមិនឃើញមានកើតបញ្ហាអ្វីតែភ្លេចគិតថាការដែលគិតថាមិនអីទេៗនេះហើយ ដែលធ្វើឲ្យបុគ្គលភ្លេចខ្លួនភ្លេចពីការឆ្លងវីរុសកូវីដ១៩រហូតដល់គិតថា មិនមានជំងឺនេះពិតប្រាកដផងដែរក៏ប៉ុន្តែនៅពេលណាមួយនោះវីរុសនេះ បានចូលលុកលុយសួតរបស់បុគ្គលដែលបានឆ្លងរួចទៅហើយទម្រាំដឹងគឺចង់ហួសពេលឬក៏ហួសពេលបាត់ហើយក៏មានការឆ្លងមកដល់សមាជិកក្រុមគ្រួសារផងដែរ»។
លោកស្រីបានបន្ថែមទៀតថា មានបុគ្គលមួយចំនួនគាត់បានខិតខំការពារខ្លួនណាស់ដែរតែនៅមានចំណុចដែលប្រហែសតែមួយភ្លែតក៏រងនូវការវៃលុកពីវីរុសនេះដែលធ្វើឲ្យហាក់ដូចជាយល់ថា ខ្លួនបានការពារណាស់ដែរតែហេតុអ្វីក៏នៅតែឆ្លងដែលឃ្លាំងនេះបណ្តាលមកពីនៅមិនទាន់បានយល់និងអនុវត្តបានត្រឹមត្រូវអំពីវិធានការការពារដែលបានដាក់ចេញ។
តំណាងអង្គការសុខភាពពិភពលោកនៅកម្ពុជាបានលើករួចហើយថា ៣កុំ៣ការពារគឺជាវិធានការដ៏ល្អប្រសើរណាស់ដែលកម្ពុជាអាចទប់ស្កាត់បាននូវការចម្លងតៗគ្នាប្រសិនបើបុគ្គលអនុវត្តវិធានការទាំងនេះបានយ៉ាងត្រឹមត្រូវពិតប្រាកដ។
លោក ស្រីបានណែនាំទៀតថា ដើម្បីអាយុជីវិតផ្ទាល់ខ្លួនឯងសូមបងប្អូនប្រជាពលរដ្ឋចូលរួមអនុវត្តវិធានការខាងលើឲ្យបានគ្រប់គ្នាដោយការទទួលខុសត្រូវខ្ពស់របស់បុគ្គលនិងសហគមន៍នៅក្នុងការកាត់ផ្ដាច់ការចម្លងពីមនុស្សម្នាក់ទៅមនុស្សម្នាក់ដើម្បីជៀសវាងការចម្លងទ្រង់ទ្រាយធំក្នុងសហគមន៍ដែលអាចមានផលវិបាកធំធេង។
លោកស្រី ឱវណ្ណឌីន ដែលជាអនុប្រធានគណៈកម្មការអប់រំបណ្តុះបណ្តាលនិងទំនាក់ទំនងសាធារណៈផងនោះបានបញ្ជាក់ថា «យើងត្រូវហ៊ានប្រឈមនឹងសុខចិត្តលំបាកក្នុងពេលខ្លីជាជាងលំបាកក្នុងរយៈពេលវែងនៅពេលអនុវត្តវិធានការនានាដែលអាចឲ្យយើងបានរួចចាកផុតមុនធ្លាក់ចូលទៅក្នុងគ្រោះមហន្តរាយសុខភាពសាធារណៈនិងការប៉ះពាល់ធ្ងន់ធ្ងរដល់សេដ្ឋកិច្ចគ្រួសារនិងសង្គមក្នុងរយៈពេលយូរដែលយើងមិនអាចពិបាកនឹងស្តារមកវិញផងដែរ»។
បញ្ហានេះ លោក ស្រីបានពន្យល់ថា ចាំបាច់ណាស់ដែលបុគ្គលត្រូវតែគិតគូរពីសុខភាពផ្ទាល់ខ្លួនជាជាងគិតគូរពីការជួបជុំគ្នាការបើកដំណើរការទីតាំងណាមួយដែលខ្វះការរៀបចំបង្ការហានិភ័យនិងមានកិច្ចការការពារទុកជាមុននិងការធ្វើដំណើរចល័តច្រើនកោះករនៅក្នុងបរិបទនៃការរាតត្បាតនៃវីរុសកូវីដ១៩។
លោកស្រីបានបញ្ជាក់ទៀតថា បើយើងចេះខ្លាចវីរុសកូវីដ១៩ យើងមិនត្រូវមើលស្រាលពីលទ្ធភាពនៃការចម្លងវីរុសនេះឡើយ ដោយត្រូវចេះប្រើប្រាស់វិធានការ៣ការពារនិង៣កុំឱ្យបានគ្រប់គ្នាព្រមទាំងស្ម័គ្រចិត្តចាក់វ៉ាក់សាំងការពារជំងឺកូវីដ១៩ ហើយបន្ទាប់ពីចាក់វ៉ាក់សាំងរួចហើយក៏ត្រូវបន្តអនុវត្តវិធានការទាំងនេះឲ្យបានម៉ត់ចត់កុំឱ្យមានការឆ្លងបន្តគ្នា។
លោកស្រីបានលើកឡើងទៀតថា បច្ចុប្បន្នក៏នៅមានការខ្វះចន្លោះនូវការអនុវត្តវិធានការ៣កុំដែលប្រជាពលរដ្ឋត្រូវយកចិត្តទុកដាក់បន្ថែមទៀតលើការកែប្រែឥរិយាបថរបស់បុគ្គលនិងម្ចាស់ទីតាំងប្រមូលផ្តុំទាំងឡាយឲ្យមានការចូលរួមអនុវត្តវិធានការនេះជាចាំបាច់រួមជាមួយនឹងការអនុវត្តច្បាប់ជាធរមានផងដែរ។
លោកស្រី បានបន្ថែមទៀតថា ការទទួលខុសត្រូវរបស់បុគ្គលនិងសហគមន៍គឺជាចំណុចសំខាន់មួយនៅក្នុងបរិបទបច្ចុប្បន្ននេះ ដែលត្រូវតែជំរុញនិងមានវិធានការនិងមានឲ្យមានការអនុវត្តស្របតាមវិធីសាស្ត្ររដ្ឋាភិបាលនិងសង្គមជាតិទាំងមូលដើម្បីបំពេញនូវចន្លោះប្រហោងរបស់បុគ្គលនិងសហគមន៍ឬអាចនិយាយប្រៀបធៀបបានថាបំពេញដីកន្លែងក្រហុគដើម្បីឈានទៅរកការធ្វើដំណើរលើផ្លូវបានរលូនសំដៅកាត់ផ្ដាច់បាននូវការចម្លងជំងឺបន្តគ្នាជាពិសេសទប់ស្កាត់ការរាតត្បាតនៅក្នុងសហគមន៍ទ្រង់ទ្រាយធំ៕
ដោយ ៖ សំអឿន
-
ព័ត៌មានជាតិ៣ ថ្ងៃ ago
អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា
-
ព័ត៌មានជាតិ១៤ ម៉ោង ago
ទ្រព្យសកម្មរបស់ក្រុមហ៊ុន CIC Plc ប្រមាណ ៩០% នៃចំនួនទឹកប្រាក់សរុប ត្រូវបានប្រមូលមកវិញ
-
ព័ត៌មានអន្ដរជាតិ៦ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
កីឡា៦ ថ្ងៃ ago
ជើងឯកម៉ុងហ្គោលី Erdene អរគុណបុរសធ្លាប់ដឹកដៃ ឈឿង ល្វៃ ធ្វើឲ្យក្តីស្រមៃក្លាយជាការពិត
-
ជីវិតកម្សាន្ដ៥ ថ្ងៃ ago
ខេមរៈ សិរីមន្ត ៖ «ទោះខ្ញុំមិនមែនជាអ្នកធំ តែសុំធ្វើកិច្ចការធំខ្លះជូនជាតិតាមវិជ្ជាជីវៈសិល្បៈ បង្ហាញទៅពិភពលោក»
-
សន្តិសុខសង្គម២ ថ្ងៃ ago
សមត្ថកិច្ចស្រុកស្វាយលើ ឃាត់ខ្លួនប្តីប្រពន្ធ ១គូសង្ស័យរួមគំនិតសម្លាប់កូនខ្លួនឯង អាយុទើបតែ ២២ខែ
-
ព័ត៌មានជាតិ១ ថ្ងៃ ago
ដីជាង ៤៣ ហិកតា នៅភូមិសាស្ត្រភ្នំ ១៥០០ ត្រៀមដាំស្ដារព្រៃឈើឡើងវិញ
-
សន្តិសុខសង្គម២១ ម៉ោង ago
បឋម៖ អគ្គិភ័យកំពុងឆេះផ្ទះពលរដ្ឋក្នុងបុរីពិភពថ្មីកំបូល