ព្រះសង្ឃវ័យក្មេងមួយអង្គនៅខេត្តព្រៃវែងសុគតដោយជំងឺកូវីដ-១៩

ព្រះតេជគុណ គន់ គីមហ៊ាង គង់នៅវត្តពោធិ៍ស្នាយ ភូមិគ្រួស ឃុំឃ្នេស ស្រុកមេសាង ខេត្តព្រៃវែង បានសុគតនៅថ្ងៃទី២១ ខែមិថុនា ឆ្នាំ២០២១ នេះក្នុងជន្មាយុ២៣ព្រះវស្សា ដោយសារជំងឺកូវីដ-១៩ នេះបើ​តាម​ហ្វេសប៊ុកផេកផ្លូវការរបស់ឯកឧត្ដម ជា សុមេធី អភិបាល នៃគណៈអភិបាលខេត្តព្រៃវែង​បង្ហោះ​មុននេះ។

មុនពេល​សុគត់​ព្រះសង្ឃ គន់ គីមហ៊ាង បានចូលពីនិត្យជំងឺនៅមន្ទីរពេទ្យបង្អែកមេសាង ជាមួយ​អាការៈ​ហត់ ដង្ហក់ខ្លាំង និងរវើរវាយ និងបាត់បង់ស្មារតីរយៈពេល៣ថ្ងៃមកហើយ ។ ក្រុមគ្រូពេទ្យបាន​យក​សំណាកធ្វើតេស្ដរហ័ស(Rapid Test) ​លទ្ធផលវិជ្ជមានកូវីដ-១៩ និងបានដាក់​ឲ្យសម្រាកព្យាបាល​នៅមន្ទីរពេទ្យបង្អែក មេសាង ។

ដោយស្ថានភាពជំងឺកាន់តែធ្ងន់ធ្ងរ នៅថ្ងៃទី១៩ ខែមិថុនា ក្រុមគ្រួពេទ្យបានបញ្ជូនអ្នកជំងឺ​មកព្យា​បាល​បន្តនៅមន្ទីរពេទ្យបង្អែកខេត្ត ដោយមានការយកចិត្តទុកដាក់ពីក្រុមគ្រូពេទ្យ។ នៅថ្ងៃទី២១ ខែមិថុនា​ ស្ថានភាពជំងឺកាន់តែធ្ងន់ធ្ងរ អ្នកជំងឺក៏បានសុគតនៅវេលាម៉ោង៨និង០០នាទីព្រឹក ដោយ​សារវិបត្តិផ្លូវដង្ហើមធ្ងន់ធ្ងរ និងរលាកសួតទាំងសងខាងដោយជំងឺកូវីដ-១៩ ។

សូមបញ្ចាក់ថា នៅថ្ងៃទី២១ ខែមិថុនា ឆ្នាំ២០២១ នេះ ខេត្តព្រៃវែងមានករណីអ្នកជំងឺកូវីដ-១៩ ចំនួន​២​អង្គ\នាក់ហើយបានស្លាប់ក្នុងរយៈពេលតែមួយថ្ងៃ ដោយករណីទី១ កើតឡើងលើស្ត្រីវ័យ៥១ឆ្នាំ ឈ្មោះ សន់ សុភាព រស់នៅភូមិក្រសាំងទង ឃុំអង្គររាជ្យ ស្រុកព្រះស្ដេច ដែលបានទទួលមរណភាព​ដោយជំងឺកូវីដ នៅវេលាម៉ោង២និង៥០នាទី ទាបភ្លឺ ថ្ងៃទី២១ ខែមិថុនា​ នេះ៕

អត្ថបទ ៖ សុខុម