មន្ត្រីសុខាភិបាល ប្រាប់ពលរដ្ឋកុំផ្អើលទិញថ្នាំការពារកូវីដ​ ខណៈពិភពលោក​ មិនទាន់រកឃើញអ្វីក្រៅតែពីវ៉ាក់សាំងទេ

លោក ស្រី ឱ វណ្ណឌីន រដ្ឋលេខាធិការនិងជា អ្នកនាំពាក្យក្រសួងសុខាភិបាល បានមានប្រសាសន៍ថា រហូតមកដល់ពេលនេះ ក្រៅតែពីមានវ៉ាក់សាំងចាក់សម្រាប់បង្ការជំងឺកូវីដ-១៩ គឺមិនមានឱសថណាដែលអាចការពារ ឬព្យាបាលជំងឺនេះបានឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងនេះធ្វើឡើងបន្ទាប់ពីមានប្រជាពលរដ្ឋមួយចំនួនបាននាំគ្នាផ្អើលទៅទិញថ្នាំព្យាបាលជំងឺកូវីដ ១៩នៅតាមឱសថស្ថាននានាទុកសម្រាប់ព្យាបាលជំងឺដោយខ្លួនឯងនៅពេលមានអាការៈផ្តាសាយ ក្តៅខ្លួន ហៀសំបោរ ក្អក និង​ឈឺបំពង់កដោយមិនចាំបាច់ធ្វើសំណាកឡើយដែលផ្ទុយពីក្រសួងសុខាភិបាលដែលមានណែនាំទៅយកសំណាករកវីរុសកូវីដ១៩ ដើម្បីធ្វើការព្យាបាលឱ្យបានទាន់ពេលវេលាកុំឱ្យជំងឺវិវត្តន៍ទៅជាធ្ងន់ធ្ងរ។

 តាមរយៈផ្ញើសារជាសំឡេង លោក ស្រី វេជ្ជបណ្ឌិត បានអំពាវនាវដល់ប្រជាពលរដ្ឋទាំងអស់ កុំជឿទៅតាមការឃោសនានានារបស់បុគ្គលមួយចំនួនហើយនាំគ្នាផ្អើលទៅទិញថ្នាំការពារកូវីដ-១៩ នៅតាមឱសស្ថាននានាដែលធ្វើឱ្យបាត់បង់ថវិកា និងមានបញ្ហាលើសុខភាពថែមទៀត។

គិតត្រឹមព្រឹក ថ្ងៃទី២៤ ខែមិថុនា ឆ្នាំ២០២១កម្ពុជាមានអ្នកឆ្លងជំងឺកូវីដ១៩សរុបចំនួន៤៥៣៦៦នាក់ អ្នកជាសះស្បើយចំនួន៤០០១០នាក់អ្នកកំពុងសម្រាកព្យាបាលចំនួន៥៣៥៦នាក់និងអ្នកស្លាប់ចំនួន៤៩៣នាក់នាក់៕អត្ថបទ៖ សំអឿន