កីឡា

Lionel Messi ខំប្រឹងទប់ទឹកភ្នែក នៅតែទប់មិនជាប់ ក្រោយឃើញ អេស្ប៉ាញ លើកពាន

បានផុស

២០ នាទី មុន

នៅ

ថ្ងៃចន្ទ ២០ កក្កដា ២០២៦

ដោយ

ក្រុមបាល់ទាត់ជម្រើសជាតិ អាហ្សង់ទីន ទទួលបានចំណាត់ថ្នាក់លេខ ២ ក្នុងព្រឹត្តិការណ៍បាល់ទាត់ពិភពលោក FIFA World Cup ឆ្នាំ ២០២៦ បន្ទាប់ពីចាញ់ ក្រុមជម្រើសជាតិ អេស្ប៉ាញ ដោយលទ្ធផល ១-០ សម្រាប់ការប្រកួតវគ្គផ្តាច់ព្រ័ត្ររយៈពេល ១២០ នាទី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតរយៈពេល ១២០ នាទីពិតជាតឹងតែងខ្លាំងដោយក្រុមទាំងពីរសុទ្ធតែដាក់សម្ពាធ ការពារ និងបង្កើតឱកាសល្អរៀងៗខ្លួន។ ទោះបីជាយ៉ាងណា នៅចុងវគ្គទី២ កីឡាករអាហ្សង់ទីន Enzo Fernández ទទួលបានពិន័យកាតក្រហម បន្ទាប់ពីរងពិន័យកាតលឿងពីរដង។ ការសល់គ្នាត្រឹម ១០ នាក់របស់ អាហ្សង់ទីន គឺជាឱកាសរបស់ អេស្ប៉ាញ ដែលព្យាយាមសម្រុកយ៉ាងខ្លាំង។

ប្រធានក្រុមអាហ្សង់ទីន Lionel Mess បានព្យាយាមយ៉ាងខ្លាំងដើម្បីឲ្យក្រុមអាចវាយបកតាមស្មើ ប៉ុន្តែនៅតែមិនអាចទម្លាយរបាំងការពាររបស់ អេស្ប៉ាញ បានឡើយ។ តាំងពីវគ្គសន្សំពិន្ទុក្នុងពូល រហូតដល់វគ្គពាក់កណ្តាលផ្តាច់ព្រ័ត្រ រូបគេតែងតែធ្វើបានល្អ និងរកបានគ្រាប់បាល់រហូតដល់ ៨ គ្រាប់ និងបញ្ជូនបាល់ឲ្យមិត្តរួមក្រុមស៊ុតបញ្ចូលមួយចំនួនថែមទៀត។

ទោះបីជាយ៉ាងណា ការប្រកួតវគ្គផ្តាច់ព្រ័ត្រ រូបគេមិនអាចជួយក្រុមបានឡើយ ដោយសារសល់គ្នាត្រឹមតែ ១០ នាក់ ដែលបង្ខំចុះការពារច្រើន។ ចប់ការប្រកួត អាហ្សង់ទីន ចាញ់ដោយលទ្ធផល ១-០។

កីឡាករ Lionel Messi ជាមួយប្រធានាធិបតីអាមេរិក Donald Trump និងប្រធាន FIFA លោក Gianni Infantino

ក្រោយចប់ការប្រកួត Lionel Messi ត្រូវបានគេចាប់អារម្មណ៍ខ្លាំង ហើយរូបគេមើលទៅមិនសូវជាបង្ហាញទឹកមុខសោកស្តាយ ក្រៀមក្រំខ្លាំងទេ។ រូបគេបានស្វាគមន៍ អោប និងនិយាយជាមួយកីឡាករដទៃ ក្នុងនោះមានកីឡាកររបស់អេស្ប៉ាញផងដោយទឹកស្មើមិនសូវជាក្រៀមក្រំខ្លាំងឡើយ។

បើទោះបីជារូបគេខំប្រឹងទប់អារម្មណ៍ ទប់ស្មារតី និងទប់ទឹកភ្នែកយ៉ាងណាក៏ដោយ ក៏នៅតែមិនអាចទប់ជាប់បានឡើយ ទឹកភ្នែកនៅតែហូរស្រក់មកទាល់តែបាន បន្ទាប់ពីរូបគេបានទទួលមេដាយប្រាក់រួច ហើយសម្លឹងមើលក្រុមអេស្ប៉ាញលើកពានដោយក្តីរំភើបរីករាយ។

ក្រៅពីក្រុមទទួលបានចំណាត់ថ្នាក់លេខ ២ គឺមេដាយប្រាក់ កីឡាករ Lionel Messi មិនទទួលពានរង្វាន់ឯកត្តជនសោះឡើយ ដោយសារពានស្បែកជើងមាស បានធ្លាក់ទៅកីឡាករបារាំង Kylian Mbappé ដែលរកបាន ១០ គ្រាប់ក្នុងព្រឹត្តិការណ៍នេះ ហើយពានកីឡាករល្អបំផុតបានទៅកីឡាករអេស្ប៉ាញ Rodri។ អ្វីដែលគួរឲ្យចាប់អារម្មណ៍មួយទៀតនោះ កីឡាករបារាំង Kylian Mbappé រកបាន ២២ គ្រាប់ ឡើងឈរលើ Messi ដែលរកបាន ២១ គ្រាប់ក្នុងគ្រប់សម័យកាលនៃព្រឹត្តិការណ៍ World Cup៕