ព័ត៌មានជាតិ

ភ្នំពេញមានអ្នកឆ្លងវីរុសដែលតាកើន ៥ ករណីហើយ សូមបងប្អូនប្រុងប្រយ័ត្ន

បានផុស

៥ years មុន

នៅ

ថ្ងៃចន្ទ ២ សីហា ២០២១

ដោយ

ក្រសួងសុខាភិបាលបានបញ្ជាក់ថា ពីថ្ងៃទី៣១ មីនា ដល់ថ្ងៃទី១ សីហា កម្ពុជារកឃើញមេរោគបំប្លែងថ្មីដែលតាសរុប ២២៣ករណីទូទាំងប្រទេស ក្នុងនោះភ្នំពេញមាន ៥ករណី។

ក្រសួងសុខាភិបាលបានព្រមានថា មេរោគដែលតាដែលមានប្រភពមកពីឥណ្ឌា ពេលនេះបានឆ្លងរាលដាលចូលសហគមន៍ហើយ។ ការព្រួយបារម្ភមេរោគនេះ មានលទ្ធភាពចម្លងរហ័សអាចបង្កផលប៉ះពាល់ធ្ងន់ធ្ងរ បង្កើនការស្លាប់និងអ្នកសម្រាកចូលមន្ទីរពេទ្យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រមុខរដ្ឋាភិបាលក៏បានក្រើនរំលឹកដល់ពលរដ្ឋ កុំអាងវ៉ាក់សាំងតែមួយមុខ ទោះចាក់ហើយក៏ដោយ ៣ការពារ និង ៣កុំ ត្រូវតែអនុវត្ត។

មន្រ្តីក្រសួងសុខាភិបាលក៏បញ្ជាក់ដែរថា កម្ពុជាកំពុងឈានទៅបន្ទាត់ក្រហមនៃការវាយលុកនៃមេរោគស៊ីសួតកូវីដ១៩។

រដ្ឋាភិបាលបានប្រកាសបិទខ្ទប់ខេត្តជាប់ព្រំដែនថៃទាំងអស់មានដូចជាខេត្តកោះកុង, ខេត្តពោធិ៍សាត់, ខេត្តបាត់ដំបង, ខេត្តប៉ៃលិន, ខេត្តបន្ទាយមានជ័យ, ខេត្តឧត្តរមានជ័យ, ខេត្តព្រះវិហារ រួមទាំងខេត្តសៀមរាប ជាបណ្តោះអាសន្នរយៈពេល ១៤ ថ្ងៃ រហូតដល់ថ្ងៃទី១២ ខែសីហា ឆ្នាំ២០២១ ដោយសារប្រទេសថៃកំពុងរាតត្បាតនៃការវាយលុកមេរោគកូវីដប្រភេទថ្មីដែលតា។

ការប្រកាសបិទខ្ទប់ខេត្តមានភូមិសាស្រ្តជាប់ថៃ ដោយសារមានការបារម្ភពីការហូរចូលពលករនិងអ្នកដំណើរមកពីថៃ រាប់រយនាក់ត្រូវបានរកឃើញមានឆ្លងកូវីដបំប្លែងថ្មីដែលតា។ រដ្ឋាភិបាលបានផ្តល់សិទ្ធិដល់អាជ្ញាធរខេត្តបិទខ្ទប់ អាចបែងចែក “តំបន់ក្រហម” “តំបន់លឿងទុំ” ឬ *តំបន់លឿង” អាស្រ័យតាមកម្រិតនៃការឆ្លងរាលដាលនៃជំងឺនេះ នៅក្នុងភូមិសាស្ត្របិទខ្ទប់នីមួយៗ សំដៅទប់ស្កាត់ការឆ្លងរាលដាលក្នុងសហគមន៍ដែលបណ្តាលមកពីមេរោគកូវីដ-១៩ ប្រភេទដែលតា (Delta)៕

អត្ថបទ៖ ប៊ុណ្ណារ៉ា

Related Topics:កូវីដ-១៩