លោក ឃឹម ហ្វីណង់ ៖ «ផ្សារក្រមួនព្រះដាក់» កំពុងដើរតួនាទីសំខាន់ ដើម្បីបម្រើពលរដ្ឋ តាមបែបគន្លងថ្មី

លោក ឃឹម ហ្វីណង់ អភិបាល នៃគណៈអភិបាលស្រុកបន្ទាយស្រី បានលើកឡើងថា «ផ្សារក្រមួនព្រះដាក់» កំពុងតែដើរតួនាទីយ៉ាងសំខាន់ ដើម្បីបម្រើឲ្យប្រជាពលរដ្ឋ នៅក្នុងសហគមន៍តាមបែបគន្លងថ្មី ប្រកបដោយសុវត្ថិភាពខ្ពស់ ដោយមិនបង្កឲ្យមាន ការចំណាយថវិការៀបចំអ្វីទាំងអស់ ស្របពេលដែលយុទ្ធនាការ ចាក់វ៉ាក់សាំងដូសទី២កំពុងតែប្រព្រឹត្តទៅយ៉ាងរលូន នៅតាមមូលដ្ឋាននានា ក្នុងស្រុកបន្ទាយស្រី។

លោក ឃឹម ហ្វីណង់ បានសរសេរនៅលើទំព័រហ្វេសប៊ុករបស់លោក នៅថ្ងៃទី៦ ខែសីហា ឆ្នាំ២០២១ថា សំរា​ម អនាម័យ សណ្តាប់ធ្នាប់ និងសុវត្ថិភាព សុទ្ធតែត្រូវបានធានា នៅក្នុងផ្សារប្រភេទថ្មីនេះ ដោយ​សហគ​មន៍ខ្លួនឯង បើទោះជា មិនអាចធ្វើទៅតាមទម្លាប់ចាស់ ដែលខ្លួនមាន តែអ្នកលក់ដូរនៅតែអាច រកប្រាក់ចំណូលប្រចាំថ្ងៃបាន ប្រជាពលរដ្ឋទូទៅ ក៏នៅតែអាចទៅរកទិញ របស់របរត្រូវការចាំបាច់ របស់ខ្លួនបានដដែល ហើយសហគមន៍ ក៏ត្រូវបានការពារសុវត្ថិភាព ពីមេរោគកូវីដ-១៩ទៀត។

អភិបាលស្រុកបន្ទាយស្រី បានលើកឡើងថា «នៅក្នុងកាលៈទេសៈ ដែលការរីករាលដាល នៃមេរោគកូវីដ កំពុងតែបន្តគំរាមកំហែង ដល់ជីវភាពរស់នៅប្រចាំថ្ងៃរ បស់បងប្អូនប្រជាពលរដ្ឋ នៅក្នុងស្រុក ការរៀនរស់នៅតាមបែបគន្លងថ្មី និងការប្រយត្ន័ប្រយែងខ្ពស់ ទៅលើបញ្ហាសុវត្ថិភាព នឹងក្លាយទៅជារឿង ដែលយើងត្រូវធ្វើ ជាប្រចាំនិងជាទម្លាប់ហើយ មិនមែនគ្រាន់តែធ្វើម្តងម្កាល ឬធ្វើតែពេល ដែលគេនាំគ្នាផ្អើលមួយភ្លែតៗនោះទេ។ សូមបន្តអនុវត្តវិធានការសុវត្ថិភាព ៣ការពារ-៣កុំ និងចាក់វ៉ាក់សាំង ឲ្យបាន២ដូសគ្រប់ៗគ្នា ដើម្បីសុវត្ថិ​ភាពខ្លួនយើង ក្រុមគ្រួសារយើង និងសហគមន៍យើង ទាំងអស់គ្នា»។

សូមជម្រាបថា កាលពីថ្ងៃទី២១ ខែកក្កដា ឆ្នាំ២០២១ទៅនេះ លោក ឃឹម ហ្វីណង់ អភិបាល នៃគណៈអភិ​បាលស្រុកបន្ទាយស្រី បានដាក់ឲ្យដំណើរការ «ផ្សារក្រមួន» ក្នុងភូមិព្រះដាក់ជាបណ្តោះអាសន្ន តែមានសុវត្ថិភាព សា​មញ្ញតែមានរបៀបរៀបរយ ហើយផ្សារក្រមួននេះ នឹងអាចជួយដោះស្រាយបញ្ហាប្រឈម នៃជីវភាពរស់នៅប្រចាំថ្ងៃរបស់ប្រជាពលរដ្ឋ ដែលជាអាជីវករ និងប្រជាពលរដ្ឋទូទៅ នៅក្នុងឃុំព្រះដាក់ បានមួយគ្រាដែរ ខណៈដែលទីតាំង​ផ្សារចាស់ ត្រូវបិទរយៈពេល១ខែ ដើម្បីទប់ស្កាត់ការរាតត្បាត នៃជំងឺកូវីដ​-១៩៕ (ដោយ)៖ ឃួន សុភ័ក្រ