អភិបាលប៉ៃលិន អញ្ជើញបើកយុទ្ធនាការ ចាក់វ៉ាក់សាំង Astra Zeneca (ដូសទី៣) ដល់​មន្ត្រីរាជការស៊ីវិល និងមន្ត្រីជួរមុខទូទាំងខេត្ត

(ប៉ៃលិន)៖នៅព្រឹកថ្ងៃទី៨ ខែសីហា ឆ្នាំ២០២១ លោកស្រី បាន ស្រីមុំ អភិបាលខេត្តប៉ៃលិន និងលោក សៅ សារ៉ាត់ អ្នកតំណាងរាស្ត្រមណ្ឌលប៉ៃលិន បានអញ្ជើញបើកដំណើរការចាក់វ៉ាក់សាំងដូសទី៣ (ដូសជម្រុញ) ជូនមន្ត្រីរាជការជួរមុខទូទាំងខេត្ត ដើម្បីប្រឆាំងនឹងការវាយប្រហារពីវីរុសកូវីដ~១៩ បំលែងថ្មី ប្រភេទដែលតា(Delta) នៅមន្ទីរពេទ្យបង្អែកខេត្តប៉ៃលិន ដែលជាអំណោយដ៍ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន ប្រមុខនៃរាជរដ្ឋាភិបាលកម្ពុជា ។

លោកស្រី បាន ស្រីមុំ អភិបាលខេត្តប៉ៃលិន បានប្រសាសន៍លើកឡើងថា៖ វ៉ាក់សាំង ដែលចាក់ជូនបងប្អូនមន្ត្រីរាជការជួរមុខដូសទី៣ នាពេលនេះ គឺជាការផ្តល់ជូនដ៍ពិសិទ្ធ ពីសំណាក់សម្តេចតេជោ ហ៊ុន សែន នាយករដ្ឋមន្ត្រី ដែលសម្តេចបានខិតខំគ្រប់បែបយ៉ាង ដើម្បីរកវ៉ាក់សាំង និងបានដាក់ចេញវិធានការ សម្រាប់ចាក់ជូនមន្ត្រីរាជការ ប្រជាពលរដ្ឋរបស់យើងឲ្យបានគ្រប់ៗគ្នា ។ លោកស្រីអភិបាលខេត្ត មានប្រសាសន៍បន្តថា៖ក្នុងនាមរដ្ឋបាលខេត្ត និងក្នុងនាមមន្ត្រីរាជការទូទាំងខេត្តប៉ៃលិន សូមគោរពថ្លែងអំណរគុណយ៉ាងជ្រាលជ្រៅបំផុត ជូនចំពោះសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលជានិច្ចជាកាល សម្តេចតែងតែរួមសុខ រួមទុក្ខ ជាមួយមន្ត្រីរាជការក្រោមឪវាទ ដែលបំពេញភារកិច្ចនៅជួរមុខ និងប្រជាពលរដ្ឋគ្រប់កាលៈទេសៈ សូមគោរពជូនពរសម្តេចតេជោ និងសម្តេចកិត្តិព្រឹទ្ធបណ្ឌិត ទទួលបាននូវសុខភាពល្អបរិបូរណ៍ កម្លាំងមាំមួនខ្លាំងក្លា បញ្ញាញាណវាងវៃ ជន្មាយុយឺនយូរ និងទទួលបានជោគជ័យត្រចះត្រចង់ក្នុងដឹកនាំប្រទេសជាតិ កាន់តែមានការរីកចម្រើន ។

សូមបញ្ជាក់ថា៖ វ៉ាក់សាំងAstraZeneca (ដូសទី៣)ឬដូសជំរុញ សម្រាប់ចាក់ជូនមន្ត្រីរាជការស៊ីវិល និងមន្ត្រីជួរមុខទូទាំងខេត្តប៉ៃលិន ដែលជាអំណោយដ៍ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន ប្រមុខនៃរាជរដ្ឋាភិបាលកម្ពុជា មានចំនួន២៩០០ដូស ផងដែរ៕

អត្ថបទ៖​​ សេង សុវណ្ណារិទ្ធ