មនុស្សប្រុស-ស្រី ចំនួន៣៨៥ នាក់ ត្រូវបានឃាត់ខ្លួន និងតេស្ដរកកូវីដភ្លាមៗ ក្រោយជុំគ្នារៀន វគ្គលក់អាហារបំប៉ន

(តាកែវ)៖ មនុស្សប្រុស-ស្រី ចំនួន៣៨៥នាក់ ត្រូវបានសមត្ថកិច្ច និងក្រុមគ្រូពេទ្យ ចុះឃាត់ខ្លួនយកទៅធ្វើសំណាកតេស្ត រកមេរោគកូវីដ-១៩ ក្រោយពីពួកគេប្រមូលផ្តុំគ្នា ដោយមិនស្តាប់តាមការណែរនាំ របស់ក្រសួងសុខាភិបាល និងអាជ្ញាធរមូលដ្ឋាន។

ការចុះឃាត់ខ្លួននេះ ធ្វើឡើងនៅល្ងាចថ្ងៃទី១៥ ខែសីហា ឆ្នាំ២០២១ វេលាម៉ោង៤ និង៥០នាទី នៅចំណុចបុរីរស្មី សង្កាត់រកាក្នុង ក្រុងដូនកែវ ខេត្តតាកែវ។ ក្នុងនោះ សមត្ថកិច្ចបានធ្វើការឡោមព័ទ្ធ និងឃាត់ខ្លួនមនុស្សប្រុស-ស្រីបានចំនួន៣៨៥នាក់ ដែលប្រមូលផ្តុំគ្នា មកសិក្សាវគ្គផ្នែកលក់អាហារបំប៉ន ជាមួយក្រុមហ៊ុក «យូនីស៊ីធី» ខេមបូឌា ដោយមិនបានស្តាប់តាមការណែនាំ របស់ក្រសួងសុខាភិបាល ក៏ដូចជាអាជ្ញាធរ និងបានផ្គើនពីច្បាប់ ស្តីពីវិធានការទប់ស្កាត់ ការឆ្លងរាលដាលជំងឺកូវីដ-១៩ និងជំងឺឆ្លងកាចសាហាវផ្សេងទៀត។

លោក ឥន្ធ មណ្ឌល អធិការនគរបាលក្រុងដូនកែវ បានបញ្ជាក់ថា មនុស្ស៥៨នាក់ បានធ្វើតេស្តភ្លាមៗ។ ក្នុងនោះមានមេការ៦នាក់ លទ្ធផលអវិជ្ជមាន និងត្រូវបានបញ្ជូនខ្លួនទៅស្នងការដ្ឋាន នគរបាលខេត្តដើម្បីសួរនាំបន្ត។ ចំណែ​កមនុស្សទាំងអស់ គឺត្រូវបានដាក់ឲ្យនៅដាច់ដោយឡែកៗពីគ្នា ក្នុងផ្ទះ៨ល្វែងក្នុងបុរីរស្មី ដែលជាទីតាំងក្រុមហ៊ុនអាហាបំប៉ននោះ ដើម្បីក្រុមគ្រូពេទ្យធ្វើតេស្ត និងយកសំណាកពិនិត្យរកមេរោគកូវីដ-១៩ បន្តទៀត៕ (ដោយ)៖ វីរៈ