សម្ដេចតេជោ ហ៊ុន សែន ស្នើឲ្យពិភាក្សាកំណត់ អំពីការបើកសាលារៀន នៅទីតាំង ដែលពុំមានការឆ្លងកូវីដ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានស្នើឲ្យរដ្ឋមន្ត្រីក្រសួងអប់រំ យុវជន និងកីឡា ពិភាក្សាជាមួយ​អភិ​បាលរាជធានី-ខេត្តនានា ដើម្បីកំណត់អំពីការ បើកដំណើរការសាលារៀន នៅតាមទីតាំងមួយចំនួន ដែលពុំមានការឆ្លងរាលដាល នៃជំងឺកូវីដ-១៩។  

យោងតាមសារជាសំឡេង របស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅព្រឹកថ្ងៃទី៣១ ខែសីហានេះ បានលើកឡើងថា កន្លងទៅសម្ដេចតេជោ ធ្លាប់បានផ្ដល់មតិខ្លះៗ ជូនរដ្ឋមន្ត្រីក្រសួងអប់រំ យុវជន និងកីឡា ពាក់ព័ន្ធនឹងការបើកដំណើរការ សាលារៀនឡើងវិញ។ បើតាមសម្ដេចតេជោ កន្លងទៅយើងបានផ្អាក ដំណើរការសាលារៀន ដើម្បីការពារគ្រូបង្រៀន ក៏ដូចជាសិស្សានុសិស្សរបស់យើង នៅក្នុងក្របខណ្ឌទូទាំងប្រទេស ហើយជាការចាំបាច់ សម្រាប់ការពារអាយុជីវិត របស់គ្រូបង្រៀន និងយុវជន-យុវនារី ព្រមទាំងសិស្សានុសិស្សរបស់យើង។

ប៉ុន្តែអាស្រ័យ ដោយពិនិត្យឃើញថា នៅក្នុងទូទាំងប្រទេសកម្ពុជា ជំងឺកូវីដ-១៩ បានឆ្លងដោយដាច់ដោយដុំ ហើយ​ប្រមូលផ្ដុំនៅតាមទីក្រុង និងទីប្រជុំជនភាគច្រើន។ ចំណែកឯតំបន់ជនបទ គឺហាក់ដូចជាបានកើតឡើង តិចតួច​ណាស់ ហើយខេត្តខ្លះ ស្ទើរតែពុំមានទៀតផង តែសាលារៀនទាំងនោះ យើងក៏បានផ្អាកដំណើរការផងដែរ។ ត្រង់​ចំណុចនេះ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានស្នើឲ្យលោក ហង់ ជួនណារ៉ុន រដ្ឋមន្ត្រីក្រសួង​អប់រំ យុវជន និងកីឡា ពិភាក្សាជាមួយបណ្ដារាជធានី-ខេត្តនានា ដើម្បីកំណត់បើកដំណើរការសាលារៀន នៅ​តាមទីតាំងមួយចំនួន ដែលពុំមានការឆ្លងជំងឺកូវីដ-១៩ កើតឡើង។

ជាមួយគ្នានេះ សម្ដេចតេជោនាយករដ្ឋមន្ត្រី បានបញ្ជាក់ថា «យើងកំពុងចាក់វ៉ាក់សាំង សម្រាប់កុមារ និងយុវ វ័យ អាយុពី១២ឆ្នាំ ដល់១៨ឆ្នាំ ស្ថានភាពចាក់វ៉ាក់សាំង មកដល់ពេលនេះ ក្នុងចំណោមកុមារ និងយុវវ័យ ដែល​មាន​អាយុ១២ឆ្នាំ ដល់អាយុ១៥ឆ្នាំ ប្រមាណ២លាននាក់ យើងចាក់បានជាង១លាន ៥សែននាក់ រួចស្រេចទៅហើយ»។

សម្ដេចតេជោ ហ៊ុន សែន បានបញ្ជាក់ទៀតថា បន្ថែមពីលើនេះ ដោយសង្កេតឃើញថា នៅតាមសាលារៀនជន​បទ​របស់​យើង ដែលពុំមានការឆ្លង យើងមានលទ្ធភាពបើកនូវសាលារៀននោះ ដោយមិនរង់ចាំ ទាល់តែបើកទូទាំងប្រទេស ឬទាល់តែខេត្ត ឬស្រុកទាំងមូល ​ត្រូវតែបើកនោះទេ។ សម្ដេចតេជោ បានផ្ដល់អនុសាសន៍ថា «យើងគួរជ្រើសរើស​នៅតាមភូមិ តាមឃុំ ដែលពុំមានការកើត នូវជំងឺឆ្លងនេះ ឲ្យកុមារា-កុមារី របស់យើង បានចូលសិក្សា ដោយសាររក្សា នូវគម្លាតសុវត្ថិភាព រក្សានូវវិធានការសុខាភិបាល ចាំបាច់នានា ដើម្បីឲ្យកុមារា-កុមារី របស់យើង បានចូលរៀន»។

ប្រមុខរាជរដ្ឋាភិបាល បានលើកឡើងទៀតថា យើងកំពុងស្ថិតនៅ ក្នុងស្ថានភាពដ៏លំបាក ដោយប្រសិនបើ យើង​នៅបន្តផ្អាកដំណើការសាលារៀន បន្តទៅទៀត ដោយមិនបានពិនិត្យ ឬញែក រវាងកន្លែងដែលមានការឆ្លងរាលដាល និងកន្លែងដែលពុំមានការឆ្លងរាលដាល ដែលអាចនាំឲ្យសិស្សានុសិស្ស បោះបង់ចោលសាលារៀន ឬក៏អាចឈាន​ទៅដល់ភ្លេចអក្សរជាដើម៕

អត្ថបទ៖ ឃួន សុភ័ក្រ