អាជ្ញាធរ​ចុះពិនិត្យទីតាំងវិនិយោគ​ទេសចរណ៍ធម្មជាតិខ្នាត​តូច ឧទ្យានជាតិភ្នំគូលែន

ខេត្តសៀមរាប៖ អាជ្ញាធរ​ខេត្ត​សៀមរាប និងមន្រ្តីពាក់ព័ន្ធ​បាន​ចុះពិនិត្យទីតាំងជាក់ស្តែង លើករណីស្នើ​សុំ​វិនិយោគគម្រោងអភិវឌ្ឍន៍ ទេសចរណ៍ធម្មជាតិខ្នាតតូច នៅ​ក្នុងឧទ្យានជាតិព្រះជ័យវរ្ម័ន-នរោត្តម «ភ្នំគូលែន»។

ការចុះទៅពិនិត្យ​ទីតាំងគម្រោងអភិវឌ្ឍ មានការ​ចូលរួម​ពី​លោក ង៉ាន់ ភិរុណ អភិបាលរងខេត្ត​សៀមរាប លោក សៅ សុភាព រដ្ឋលេខាធិការក្រសួងបរិស្ថាន លោក រ័ត្ន វិរៈ អនុរដ្ឋលេខាធិការក្រសួងបរិស្ថាន លោក ខៀវ បូរិន អគ្គនាយក​នៃ​អគ្គនាយកដ្ឋានសហគមន៍មូលដ្ឋាន មន្ត្រីជំនាញមកពីអគ្គនាយកដ្ឋានពាក់ព័ន្ធចំណុះក្រសួងបរិស្ថាន អភិបាល​​ស្រុកស្វាយលេី​ និងស្រុកសូទ្រនិគម តំណាងអាជ្ញាធរជាតិអប្សរា​ លោកប្រធានមន្ទីខេត្តសៀមរាប​ អាជ្ញាធរមូលដ្ឋានពាក់ព័ន្ធ កាលពីថ្ងៃទី០២ ខែ កញ្ញា  ២០២១នេះ។

គម្រោង​​ស្នើសុំវិនិយោគទេសចរណ៍ធម្មជាតិខ្នាតតូច (ទំហំ​ដីមិនលេីសពី ១០ហិកតា ក្នុងមួយគម្រោង) សរុបចំនួន ០៥គម្រោង ស្ថិតក្នុងឧទ្យានជាតិព្រះជ័យវរ្ម័ន-នរោត្តម«ភ្នំគូលែន» ភូមិតាពេញ និងភូមិខ្នងភ្នំ ឃុំខ្នងភ្នំ ស្រុកស្វាយលើ និងភូមិបុស្សធំ ឃុំខ្នារពោធិ៍ ស្រុកសូទ្រនិគម​ ខេត្តសៀមរាប។ ជាលទ្ធផល​ ក្រុមការងារ​គាំទ្រចំពោះគម្រោងអភិវឌ្ឍន៍ខាងលេី​ ប៉ុន្តែក្រុមកាងារបច្ចេកទេសរបស់ក្រសួងបរិស្ថាន​ និងអាជ្ញាធរជាតិអប្សរា​ នឹងសិក្សាលម្អិតបន្ថែមទៀតអំពីផលប៉ះពាល់លេីបុរាណវិទ្យា​ និងអេកូឡូស៊ី​ មុននឹងដាក់ស្នេីសុំការពិនិត្យសម្រេចពីលោក​ រដ្ឋមន្ត្រីក្រសួងបរិស្ថាន។

អត្ថបទ៖ គឿនវេត