ចិននឹងផ្ដល់ជំនួយវ៉ាក់សាំង ៣ លានដូសបន្ថែមទៀត ដល់កម្ពុជា

រដ្ឋាភិបាលចិន នឹងផ្ដល់ជំនួយវ៉ាក់សាំង ការពារជំងឺកូវីដ-១៩ ចំនួន៣លានដូសបន្ថែមទៀត ខណៈចិនបានផ្ដល់​ជំនួ​យវ៉ាក់សាំងនេះ មកដល់ប្រទេសកម្ពុជា ចំនួន៤លាន ៣សែនដូសរួចទៅហើយ។ នេះបើតាមការឲ្យដឹងពីលោក​ឧប​នាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេសកម្ពុជា បន្ទាប់ពីបញ្ចប់ជំនួបពិភាក្សា ជាមួយលោក វ៉ាង យី រដ្ឋមន្ត្រី​ការបរទេសចិន នៅរសៀលថ្ងៃទី១២ ខែកញ្ញា ឆ្នាំ២០២១នេះ។

លោកឧប​នាយករដ្ឋមន្ត្រី ប្រាក់ សុខុន បានមានប្រសាសន៍បន្តថា គិតមកដល់ពេលនេះ ប្រទេសកម្ពុជា ទទួ លបាន​វ៉ាក់​សាំងការពារជំងឺកូវីដ-១៩ ចំនួន២៦លាន ៨សែនដូស ពីប្រទេសចិន។ ក្នុងនោះ មានជំនួយឧបត្ថម្ភ ចំនួន៤​លាន ៣សែនដូស។ ជាមួយគ្នានេះ បើតាមរដ្ឋមន្ត្រីការបរទេសកម្ពុជាដដែល គឺលោក វ៉ាង យី បានប្រកាសថា រដ្ឋា​ភិបាលចិន នឹងផ្ដល់ជំនួយវ៉ាក់សាំង ចំនួន៣លានដូសបន្ថែមទៀត ដល់ប្រទេសកម្ពុជា។

លោកឧប​នាយករដ្ឋមន្ត្រី ប្រាក់ សុខុន បានបញ្ជាក់បន្ថែមថា «គ្មានប្រទេសណាទេ នៅលើលោក បានជួយកម្ពុជា ដូចការដែលចិន ជួយយើងនេះ»៕