ព័ត៌មានជាតិ

សាលាជាង១០០នៅខេត្តតាកែវបើកដំណើរការសាកល្បងថ្ងៃដំបូង

បានផុស

២ years មុន

នៅ

ថ្ងៃចន្ទ ២០ កញ្ញា ២០២១

ដោយ

រដ្ឋបាលខេត្តតាកែវបានប្រកាសបើកដំណើរការសាកល្បងសាលារៀនថ្នាក់ទី៩ និងថ្នាក់ទី១២ ដែលមានហានិភ័យទាបនៅទូទាំងខេត្តជាថ្ងៃដំបូងប្រមាណជាង១០០សាលា ហើយគ្រោងនឹងបើកជាបន្តបន្ទាប់ទៀតទៅតាមស្ថានភាពជាក់ស្តែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងឱកាសបើកសាលារៀនជាលើកដំបូងនៅព្រឹកថ្ងៃទី២០ ខែកញ្ញានេះ នៅវិទ្យាល័យ សុខ អាន ១ឧសភា លោក ឡោ វីរិទ្ធ ប្រធានមន្ទីរអប់រំ យុវជននិងកីឡាខេត្ត បានឱ្យដឹងថា មានគ្រឹះស្ថានសិក្សារដ្ឋ និងឯកជន ថ្នាក់ទី៩ និងថ្នាក់ទី១២ ដែលមានហានិភ័យទាប ដែលអនុញ្ញាតឱ្យដំណើរសិក្សាមានចំនួន ១១២សាលា ក្នុងនោះមានវិទ្យាល័យ៤១សាលា អនុវិទ្យាល័យ ៦៣សាលា និងសាលាឯកជន០៨សាលា។

លោកប្រធានមន្ទីរអប់រំខេត្តបានបន្តថា ចំណែកសាលាចំនួន៨៣៧សាលា ក្នុងនោះ មានមេត្តយ្យរដ្ឋ២៩៧សាលា និងមេត្តយ្យឯកជននិងមេត្តយ្យសហគម ១២៦សាលា បឋមសិក្សា ចំនួន ៣៨១សាលា និងសាលាឯកជន១៨ អនុវិទ្យាល័យរដ្ឋ ០៣សាលា និងវិទ្យាល័យរដ្ឋ ១២សាលាត្រូវសិក្សាតាមរយៈពីចម្ងាយ ឬតាមប្រព័ន្ធអេឡិច ឬការចែក សន្លឹកកិច្ចការដល់សិស្ស ឬការសិក្សាតាមបែបចម្រុះ ។

លោក អ៊ូច ភា អភិបាល នៃគណៈអភិបាលខេត្តតាកែវបានធ្វើការណែនាំអាជ្ញាធរមូលដ្ឋាន មាតាបិតាសិស្សលោកគ្រូ អ្នកគ្រូ ត្រូវអនុវត្តន៍តាមសេចក្តីណែនាំរបស់ក្រសួងសុខាភិបាល ហើយលោកនាយក នាយិកាសាលា ដែលជាអ្នកគ្រប់គ្រង សាលារៀននីមួយៗ ត្រូវសហការជាមួយស្ថាប័នជំនាញពាក់ព័ន្ធ ត្រូវអនុវត្តឱ្យបានខ្ជាប់ខ្ជួននូវគោលការណ៍ប្រតិបត្តិស្តង់ដា (SOP) សម្រាប់ដំណើរការគ្រឹះស្ថានសិក្សាឡើងវិញ។

អភិបាលខេត្តក៏បានធ្វើការអំពាវនាវដល់លោកគ្រូ អ្នកគ្រូ សិស្សានុសិស្សទាំងអស់ សូមចូលរួមបន្តអនុវត្តតាមការណែនាំរបស់ក្រសួងសុខាភិបាល ជាពិសេសប្រសាសន៍ណែនាំដ៏ខ្ពស់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា គឺ៣ការពារ និង៣កុំ ឲ្យបានត្រឹមត្រូវ ខ្ជាប់ខ្ជួនទាំងគ្នា ដើម្បីការពារខ្លួនយើង គ្រួសារយើង សហគមន៍ យើងកុំឲ្យឆ្លងកូវីដ១៩ផងដែរ៕

អត្ថបទ៖ សំអឿន