ព័ត៌មានជាតិ

គ្រោងឆ្អឹងសត្វផ្សោត ត្រូវប្រជាសហគមន៍អេកូទេសចរណ៍ព្រះរំកិល រៀបចំអភិរក្សទុក ដាក់ក្នុងទូកញ្ចក់

បានផុស

២ years មុន

នៅ

ថ្ងៃអង្គារ ២១ កញ្ញា ២០២១

ដោយ

សហគមន៍អេកូទេសចរណ៍ព្រះរំកិល ស្រុកបុរីអូស្វាយសែនជ័យ ខេត្តស្ទឹងត្រែង រៀបចំធ្វើទូរកញ្ចក់ដាក់ រូបសំណាកគ្រោងឆ្អឹងសត្វផ្សោត អភិរក្សទុកជាមរតក ចំពោះសត្វទឹកសាបមួយប្រភេទនេះ សម្រាប់ថ្ងៃអនាគតឱ្យកូនចៅ និងភ្ញៀវទេសចរ បានឃើញនឹងបានស្គាល់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ផយ វណ្ណា សមាជិកសហគមន៍អេកូទេសចរណ៍ផ្សោតព្រះរំកិលបានបញ្ជាក់ថា ពេលវេលាខិតខំអភិរក្សសត្វផ្សោតក្នុងទន្លេមេគង្គ សមាជិកសហគមន៍បានប្រឹងប្រែងអស់លទ្ធភាពហើយ តែមិនទទួលបានផលល្អទេ សត្វផ្សោតចេះតែស្លាប់ម្តងមួយៗរហូតមកដល់បច្ចុប្បន្ននៅសល់តែមួយក្បាលតែប៉ុណ្ណោះ ដែលកំពុងនៅរស់ក្នុងទឹក។ លោកបន្តថា អាជ្ញាធរស្រុក និងសមាជិកសហគមន៍បានឯកភាពគ្នា រៀបចំធ្វើជាទូកញ្ចក់ខ្នាតធំដាក់គ្រោងឆ្អឹងរក្សាទុក ហើយកិច្ចការងារនេះ មន្ទីរទេសចរណ៍ ក៏បានអន្តរាគមន៍ជួយដែរ បច្ចុប្បន្នសហគមន៍ទទួលបានថវិកា ពីសប្បុរសជននានាបានជាង១លាន៤សែនរៀលហើយ។

លោក រឹទ្ធ ណារឿន ប្រធានប្រចាំតំបន់ទន្លេមេគង្គលើ នៃអង្គការដៃគូ(WWF )អភិរក្សសត្វផ្សោត បានគាំទ្រគំនិតផ្តួចផ្តើមនេះ ព្រោះវាជាយន្តការមួយបន្ថែម បានជួយរក្សានិរន្តភាពតំបន់ទេសចរណ៍ផ្សោតព្រះរំកិលនេះ កុំឱ្យបាត់បង់ទៅថ្ងៃអនាគត។ លោកបន្តថា កិច្ចការអភិរក្សគ្រោងឆ្អឹងសត្វផ្សោតមេគង្គនេះ លោកនិងពិគ្រោះយោបល់ជាមួយផ្នែកពាក់ព័ន្ធនឹងអង្គការដៃគូផ្សេងៗទៀត ដើម្បីរិះរកវិធីសាស្ត្រល្អៗ និងថវិកា ដើម្បីជួយទំនុកបម្រុងឱ្យដំណើរការអភិរក្សប្រព្រឹត្តទៅប្រកបដោយជោគជ័យ។

សូមបញ្ជាក់ថា តំបន់រមណីយដ្ឋានអេកូទេសចរណ៍ធម្មជាតិសត្វផ្សោតអន្លង់កោះឈើទាលព្រះរំកិលនេះ បានបើកដំណើរការជូនភ្ញៀវទស្សនាបានជិត២០ឆ្នាំមកហើយ ដែលភ្ញៀវទេសចរនិយមមកទស្សនាសត្វផ្សោត តែបច្ចុប្បន្ននៅសល់សត្វផ្សោតតែមួយក្បាលតែប៉ុណ្ណោះ ទើបប្រជាសហគមន៍រៀបចំរក្សាគ្រោងឆ្អឹងនេះទុក សម្រាប់ប្រើឲ្យវិស័យទេសចរណ៍វិញម្តង៕

អត្ថបទ៖ ងិន លីម