អាជ្ញាធរ ៖ ក្រុងប៉ោយប៉ែត អាចនឹងរងឥទ្ធិពលទឹកជំនន់ពីប្រទេសថៃ សូមប្រជាពលរដ្ឋបង្កើនការប្រុងប្រយ័ត្ន

យោងតាមការជូនដំណឹង របស់អាជ្ញាធរស្រុកអារញ្ញប្រាថេត ខេត្តស្រះកែវ ប្រទេសថៃ ដល់អាជ្ញាធរក្រុងប៉ោយប៉ែត នៃខេត្តបន្ទាយមានជ័យ បានកាលពីព្រឹកថ្ងៃទី២២ ខែកញ្ញា ឆ្នាំ២០២១ ពីស្ថានភាពទឹកនៅក្នុងស្រុកអារញ្ញប្រាថេត ប្រទេស ថៃ បាននិងកំពុងហក់ឡើងលឿនគួរឲ្យព្រួយបារម្ភ។ ក្នុងនោះកម្ពស់ទឹកហក់ឡើងខ្ពស់ដូចនេះ បណ្តាលមកពីឥទ្ធិពលកម្ពស់ទឹកហក់ឡើងខ្ពស់នៅតំបន់ខៅយ៉ៃ នៃខេត្តនគររាជសីម៉ា ប្រទេសថៃ។ លក្ខណៈបែបនេះ នឹងបង្កឲ្យផ្នែកខ្លះក្នុងភូមិ​សាស្រ្ត​ក្រុងប៉ោយប៉ែត ខេត្តបន្ទាយមានជ័យ នឹងទទួលរងឥទ្ធិពលទឹកជំនន់ ពីព្រះរាជាណាចក្រថៃឡង់ដ៏ ក្នុងកម្រិតធ្ងន់ធ្ងរផងដែរ។

លោក គាត ហ៊ុល អភិបាលក្រុងប៉ោយប៉ែត បានឲ្យដឹងថា ស្ថិតក្នុងស្ថានភាព ដែលភូមិសាស្ដ្រក្រុងប៉ោយប៉ែត អាចនឹងទទួលរងនូវការគំរាមកំហែង ពីទឹកជំនន់ហូរធ្លាក់មក ពីប្រទេសថៃតាមអូរព្រំដែនកម្ពុជា-ថៃ ក្នុងនាមរដ្ឋបាលក្រុងប៉ោយប៉ែត លោកបាននិងកំពុងបន្តចាត់វិធានការនានា ដើម្បីកាត់បន្ថយឲ្យបានជាអតិបរមា នូវការគំរាមកំហែងពីទឹកជំនន់ធ្លាក់មកពីប្រទេសថៃ។ ទន្ទឹមគ្នានេះលោកបានចាត់តាំងក្រុមការងារសង្កាត់ទាំង៣ រៀបចំទីទួលសុវត្ថិភាព ដើម្បីត្រៀមលក្ខណៈរួចជាស្រេច ​ក្នុងការជម្លៀសប្រជាពលរដ្ឋ ដែលអាចរងគ្រោះ ដោយគ្រោះទឹកជំនន់នេះ ប្រសិន​បើកម្ពស់ទឹក នៅតែបន្តហក់ឡើងបន្ថែមទៀត។

លោកអភិបាលក្រុង បានអំពាវនាវដល់សាធារណជន និងប្រជាពលរដ្ឋរស់នៅក្នុងភូមិសាស្រ្តក្រុង ជាពិសេសប្រជាពល រដ្ឋ រស់នៅតាមប្របមាត់អូរព្រំដែនកម្ពុជា-ថៃ ព្រមទាំងប្រជាពលរដ្ឋរស់នៅផ្នែកខ្លះ ក្នុងភូមិសាស្ដ្រសង្កាត់ប៉ោយប៉ែត, សង្កាត់ផ្សារកណ្ដាល និងសង្កាត់និមិត្ត មេត្តាបង្កើនការប្រុងប្រយ័ត្នខ្ពស់ ដើម្បីចៀសវាងនូវគ្រោះថ្នាក់ផ្សេងៗដែលអាចកើតមានឡើងជាយថាហេតុ។

សូមជម្រាបថា នៅដើមសប្តាហ៍នេះ ក្រុងប៉ោយប៉ែត បានរងនៅការជនលិច ពីជំនន់ទឹកភ្លៀងយ៉ាងខ្លាំង បណ្តាលឲ្យលិចផ្លូវជាតិលេខ៥ និងហេដ្ឋារចនាសម្ព័ន្ធជាច្រើនទៀត ទោះបីអាជ្ញាធរ និងកងកម្លាំងបានខិតខំ រំដោះទឹកចេញពីក្រុងប៉ោយប៉ែត និងជម្លៀសពលរដ្ឋក៏ដោយ ហើយអាជ្ញាធរនៅតែ មានក្តីបារម្ភយ៉ាងខ្លាំង បើទឹកពីថៃមកទៀតវានឹងកាន់តែធ្វើឲ្យលិច លង់៕

អត្ថបទ៖ ពៅ