ព័ត៌មានជាតិ

ឃាត់ខ្លួនមុខសញ្ញាគ្រឿងញៀនជាស្ត្រីពីរនាក់ ដកហូតរថយន្ដទំនើបមួយគ្រឿង

បានផុស

២ years មុន

នៅ

ថ្ងៃពុធ ១៣ តុលា ២០២១

ដោយ

កម្លាំងមន្ទីរប្រឆាំងគ្រឿងញៀន (ក៤) ក្រសួងមហាផ្ទៃ បានសហការជាមួយកម្លាំងនគរបាលនៃស្នងការនគរបាលខេត្តកំពង់ស្ពឺ ដោយមានការសម្របសម្រួលនីតិវិធីដោយលោកស្រី ចាត សូរស្មី ព្រះរាជអាជ្ញាអមសាលាដំបូងខេត្តកំពង់ស្ពឺ ធ្វើការបង្ក្រាបមុខសញ្ញាជួញដូរគ្រឿងញៀនជាស្ត្រីចំនួន០២នាក់ ដកហូតបានរថយន្តមួយគ្រឿង និងគ្រឿងញៀនចំនួន១៦កញ្ចប់ធំ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រតិបត្តិការ បង្ក្រាបមុខសញ្ញាជួញដូរគ្រឿងញៀនជាស្ត្រីទាំង០២នាក់ ខាងលើ ធ្វើឡើងនៅវេលាម៉ោង២៣ នឹង១៥នាទី រំលងអាធ្រាត្រឈានចូលថៃ្ងទី១៣ ខែតុលា ឆ្នាំ២០២១ ស្ថិតក្នុងផ្ទះរបស់ឈ្មោះ គង់ សំណាង ភេទស្រី អាយុ៤២ឆ្នាំ រស់នៅភូមិទី១ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ ដឹកនាំដោយលោកឧត្តមសេនីយ៍ទោ ឃិន សារ៉ាត់ នាយករងមន្ទីរប្រឆាំងគ្រឿងញៀន សហការជាមួយកម្លាំងស្នងការនគរបាលខេត្តកំពង់ស្ពឺ ស្ថិតក្រោមការសម្របសម្រួលនីតិវិធីពីលោកស្រី ចាត សូរស្មី ព្រះរាជអាជ្ញាអមសាលាដំបូងខេត្តកំពង់ស្ពឺ ។

ប្រតិបត្តិការនេះ កម្លាំងចម្រុះរកឃើញម្សៅក្រាមពណ៌ថ្លាសចំនួន ១៦កញ្ចប់ធំ សង្ស័យថា គ្រឿងញៀន និងឧបករណ៍ សម្រាប់វេចខ្ចប់គ្រឿងញៀនមួយចំនួន ដកហូតរថយន្តមួយគ្រឿង ម៉ាក FORD EV E REST សេរីឆ្នាំ២០២១ ពណ៌ស មានស្លាក លេខភ្នំពេញ 2BP-6979 ។

នគរបាលបានប្រាប់ឱ្យដឹងថា ជនសង្ស័យចំនួន០២នាក់ ពាក់ព័ន្ធក្នុងករណីជួញដូរគ្រឿងញៀនខាងលើ ត្រូវបានឃាត់ខ្លួនរួមមានទី១- ឈ្មោះ គង់ សំណាង ភេទស្រី អាយុ៤២ឆ្នាំ រស់នៅភូមិទី១ ឃុំត្រែងត្រយឹង ស្រុកភ្នំស្រួច និងទី២- ឈ្មោះ សុខ ស្រីនិត ភេទស្រី អាយុ៣៥ឆ្នាំ រស់នៅភូមិទី១ ឃុំត្រែងត្រយឹង ស្រុកភ្នំស្រួច ។

បច្ចុប្បន្ន កន្លែងកើតហេតុត្រូវបានហ៊ុមព័ទ្ធដើម្បីបន្តនិតិវិធី ចំណែកជនសង្ស័យទាំង០២នាក់ និងវត្ថុតាងត្រូវបានបញ្ជូនទៅមន្ទីរប្រឆាំងគ្រឿងញៀន នៅរាជធានីភ្នំពេញ ដើម្បីចំណាត់ការបន្ដទៀត ៕

អត្ថបទ៖ ភួង រដ្ឋា