រុស្ស៊ី ចាប់ផ្តើមផលិតគ្រាប់បែកគួរឲ្យខ្លាចខ្នាតធំ ទុកប្រើក្នុងសង្គ្រាម

តាមសេចក្តីរាយការណ៍របស់ Sputnik, ពេលនេះ ប្រទេសរុស្ស៊ី បានចាប់ផ្តើមការផលិតខ្នាតធំនូវគ្រាប់បែកទម្ងន់៣តោន ផ្ទុះសាហាវគួរឲ្យខ្លាច សម្រាប់ទុកប្រើប្រាស់ក្នុងសង្គ្រាមនៅប្រទេសអ៊ុយក្រែន និងកន្លែងផ្សេង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការពារជាតិរុស្ស៊ីបានប្រកាសកាលពីថ្ងៃព្រហស្បតិ៍ទី២១ខែមីនាថា តាមពិតទៅ ការផលិតគ្រាប់បែក FAB-3000 ឬគេដាក់រហស្សនាមឲ្យថា “ពេជ្ឈឃាដដែនអាកាស” នេះ បានចាប់ផ្តើមតាំងតែពីខែកុម្ភៈមកម្ល៉េះ ប៉ុន្តែទើបក្នុងខែមីនានេះប៉ុណ្ណោះ ដែលរុស្ស៊ី ចាប់ផ្តើមផលិតជាទ្រង់ទ្រាយធំ។

មិនត្រឹមតែ FAB-3000 ទេ, រដ្ឋមន្ត្រីក្រសួងការពារជាតិរុស្ស៊ីលោក Sergei Shoigu ក៏ត្រូវបានជូនដំណឹង អំពីការផលិតគ្រាប់បែកដ៏គួរឲ្យខ្លាចផ្សេងទៀត ដូចជា FAB-500 និង FAB-1500 ក្នុងចំនួនយ៉ាងច្រើនសន្ធឹកសន្ធាប់ លើសពីពេលមុនៗផងដែរ។

ស្របពេលជាមួយគ្នានោះដែរ កាសែត Washington Post បានរាយការណ៍ថា “រួមជាមួយនឹងយន្តហោះគ្មានមនុស្សបើក មីស៊ីល និងកាំភ្លើងធំរបស់រុស្ស៊ី, គ្រាប់បែកនេះនឹងបន្ថែមថាមពលបំផ្លិចបំផ្លាញថ្មី ដល់យុទ្ធនាការរបស់រុស្ស៊ីនៅភាគខាងកើតប្រទេសអ៊ុយក្រែន ដូចដែលគេបានឃើញពីជោគជ័យនៅទីក្រុង Avdeevka នាពេលថ្មីៗនេះ ដែលជាជ័យជម្នះដ៏សំខាន់លើកដំបូងរបស់រុស្ស៊ីក្នុងរយៈពេលជិតមួយឆ្នាំ”។

សូមបញ្ជាក់ FAB-3000 គឺជាគ្រាប់បែកដែលមានជាតិផ្ទុះខ្លាំង បង្កើតឡើងសម្រាប់យន្តហោះទម្លាក់គ្រាប់បែកធុន Tu-4 ក្នុងឆ្នាំ១៩៤៦ ហើយក្រោយមកយន្តហោះ Tu-16 និង Tu-22 ត្រូវបានផលិតដើម្បីបំពាក់ជាមួយគ្រាប់បែកនេះ។

FAB-3000 ​មាន​ទម្ងន់៣​តោន​និង​ប្រវែង​ជាង​បី​ម៉ែត្រ ជាមួយកម្លាំង​ផ្ទុះ១.៤តោន​។ គ្រាប់បែកនេះត្រូវបានបំពាក់ដោយហ្វុយហ្សីបចំនួន៣ ហើយផ្ទុះឡើងក្នុងពេលតែមួយ។

FAB-3000 គឺជាគ្រាប់បែកអាកាសដែលគេខ្លាច ព្រោះវាមានសមត្ថភាពបំផ្លាញរចនាសម្ព័ន្ធយោធា និងឧស្សាហកម្មទោះមានការការពារពីកំពែងរឹងមាំយ៉ាងណាក៏ដោយ៕

អត្ថបទ៖ សុខ សុវណ្ណ

ចុចអាន៖ រុស្ស៊ី ព្រមានម្តងទៀត! ជប៉ុន នឹងជួបផលវិបាក បើមីស៊ីល Patriot ធ្លាយដល់ដីអ៊ុយក្រែន មែន