នាវាចម្បាំងអូស្ត្រាលី HMAS Anzac នឹងមកទស្សនកិច្ចនៅខេត្តព្រះសីហនុ នាថ្ងៃច័ន្ទសប្ដាហ៍ក្រោយនេះ

នាវាចម្បាំងអូស្ត្រាលីឈ្មោះ HMAS Anzac នឹងមកទស្សនកិច្ចនៅខេត្តព្រះសីហនុ នៃប្រទេសកម្ពុជា នៅថ្ងៃច័ន្ទ​សប្ដាហ៍​ក្រោយ។ នេះបើយោងតាមការបង្ហោះឲ្យដឹង នៅលើទំព័រហ្វេសប៊ុកផ្លូវការ របស់ស្ថានទូតអូស្ត្រាលី​ប្រចាំ​កម្ពុជា​ នៅព្រឹកថ្ងៃទី១៧​ ខែតុលានេះ។

ស្ថានទូតអូស្រ្តាលី បានលើកឡើងថា អូស្ត្រាលី​រីករាយក្នុងការនាំយកសកម្មភាព ចូលរួមក្នុងតំបន់របស់ខ្លួន ដែលមានឈ្មោះថា សកម្មភាពចូលរួម ក្នុងតំបន់របស់នាវាបញ្ជាការ Indo-Pacific Endeavour 2021 ត្រឡប់មកអាស៊ីអាគ្នេយ៍នៅឆ្នាំនេះ។

បើតាមស្ថានទូតអូស្ត្រាលី នាវាចម្បាំង HMAS Anzac នឹងធ្វើទស្សនកិច្ចនៅខេត្តព្រះសីហនុ ចាប់ពីថ្ងៃទី១៨ ដល់ថ្ងៃទី២០ ខែតុលា ដែលជាផ្នែកមួយ នៃសកម្មភាពចូលរួមក្នុងតំបន់របស់នាវាបញ្ជាការ IPE 21។ នេះជាដំណើរទស្សនកិច្ចរបស់កងនាវាចរភូមិន្ទអូស្រ្តាលី លើកដំបូងមកកាន់ប្រទេសកម្ពុជា ចាប់តាំងពីឆ្នាំ ២០១៦ មក ហើយនឹងធ្វើដំណើរទស្សនកិច្ចដោយគ្មានការប៉ះពាល់ផ្ទាល់ ដោយសារជំងឺកូវីដ-១៩។

ជាមួយគ្នានេះ នាវា HMAS Anzac នឹងនាំយកមកជាមួយនូវសម្ភារៈការពារផ្ទាល់ខ្លួន (PPE) និងសម្ភារៈវេជ្ជសាស្រ្តទាក់ទងនឹងជំងឺកូវីដ-១៩ មួយចំនួនទៀត ដើម្បីជួយដល់ខេត្តព្រះសីហនុ និងកងយោធពលខេមរភូមិន្ទកម្ពុជា ក្នុងការប្រយុទ្ធប្រឆាំងនឹងជំងឺកូវីដ-១៩។

ប្រភពដដែល បានបញ្ជាក់បន្ថែមថា ដំណើរទស្សនកិច្ចនេះ ក៏ផ្តល់ឱកាសសម្រាប់យើង ក្នុងការបង្កើតកិច្ចសហប្រតិ​បត្តិការ កងទ័ពជើងទឹកជាក់ស្តែងរបស់យើង និងផ្លាស់ប្តូរយោបល់អំពីសន្តិភាព និងសន្តិសុខស្ត្រី តាមរយៈសិក្ខាសាលា​អនឡាញ ដែលនឹងត្រូវរៀបចំឡើងក្នុងអំឡុងពេលដំណើរទស្សនកិច្ចនេះ។ ស្ថានទូតអូស្ដ្រាលី បានថ្លែងអំណរគុណដល់ប្រទេសកម្ពុជា ដែលបានជួយសម្រួលដល់ដំណើរទស្សនកិច្ចនេះ ក្នុងពេលកំពុងតែមានបញ្ហាប្រឈមនានា ក្នុងការរៀបចំដោយសារតែជំងឺកូវីដ-១៩៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត