អ្នកកាសែតចុះយកព័ត៌មាន មិនសហការជាមួយអាជ្ញាធរ ត្រូវក្រុមអ្នកលេងល្បែងជល់មាន់វាយ

មិនមែនជាករណីដែលកើតឡើងជាលើកទីមួយនោះទេ ដែលអ្នកកាសែតត្រូវគេវាយ ខណៈពួកគេចុះយកព័ត៌មានតាមវង់ល្បែង ដែលជនខិលខូចលួចលាក់បើកលេង ដោយមិនបានសហការណ៍ជាមួយអាជ្ញាធរ។

មានការមិនអស់ចម្ងល់ជាច្រើន រវាងអ្នកកាសែត និងអ្នកបើកកន្លែងជល់មាន់ ក្រោយបែកធ្លាយវីដេអូក្រុមអ្នកលេងមាន់ ជល់វាយអ្នកកាសែត ដោយខឹងរឿងឡាយកន្លែងជល់មាន់ ថាតើជាការចរចាលាភសក្ការៈមិនត្រូវគ្នា រវាងពួកគេ ឬយ៉ាង ណា បានជាកើតករណីនេះឡើង ហើយតើមុននឹងចុះទៅយកព័ត៌មាននេះ ពួកគេមានរាយករណ៍ និងសហករណ៍ជាមួយអាជ្ញាធរដែរ ឬទេ? ព្រោះអ្នកកាសែតគ្រាន់តែជា អ្នកជូនដំណឹងទៅមហាជន និងធ្វើការសំណូមពរទៅអាជ្ញាធរប៉ុណ្ណោះ។

បន្ទាប់ពីកើតហេតុរួចរាល់ចប់សព្វគ្រប់ នៅរសៀលថ្ងៃទី១៦ ខែតុលា ឆ្នាំ២០២១ ទើបឃើញអភិបាលស្រុកបាទី លោក ភួន ឈីម និងលោកអធិការនគរបាលស្រុក និងកម្លាំងពាក់ព័ន្ធ ចុះទៅដល់កន្លែងកើតហេតុ គឺសង្វៀនជល់មាន់ ដែល​ជន​ខិលខូចលួចលេង។

សូមបញ្ជាក់ថា ទីតាំងសង្វៀនជល់មាន់មួយកន្លែង ស្ថិតនៅភូមិត្បែង ឃុំក្រាំងធ្នង់ ស្រុកបាទី ខេត្តតាកែវ ត្រូវបានបែកធ្លាយ កាលពីរសៀលថ្ងៃទី១៦ ខែតុលា ឆ្នាំ២០២១ ក្រោយមានអ្នកសារព័ត៌មានចុះទៅដល់ និងធ្វើការឡាយចូលបណ្តាញសង្គមហ្វេសប៊ុក៕

អត្ថបទ៖ វីរៈ

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត