រន្ទះបាញ់ សម្លាប់សត្វគោអស់ ១១ក្បាល នៅខេត្តបាត់ដំបង

យ៉ាងហោចណាស់ ក៏មានសត្វគោចំនួន ១១ក្បាលដែរ បានងាប់ភ្លាមៗ ដំណាលគ្នា ខណ:ដែលមានរន្ទះដ៏សាហាវមួយ បានកើតឡើងនៅពេលមេឃ កំពុងធ្លាក់ភ្លៀង។ ហេតុការណ៍នេះ បានកើតឡើងកាលពីវេលាម៉ោង ៩ និង ៣០នាទីព្រឹក ថ្ងៃទី២០ ខែតុលា ឆ្នាំ២០២១ ត្រង់ចំណុច វាលបង្គោលអង់តែនទូរស័ព្ទ ដូនប្រេ ស្ថិតក្នុងភូមិបឹងទឹម ឃុំតាប៉ុន ស្រុកសង្កែ ខេត្តបាត់ដំបង។

បើតាមសម្តីប្រជាពលរដ្ឋ ដែលរស់នៅក្នុងតំបន់នោះ បាននិយាយថា នៅពេលនោះ គឺមេឃកំពុងធ្លាក់ភ្លៀងយ៉ាងខ្លាំង ស្រាប់តែគេបានឮសម្លេងរន្ទះ ស្ទើរបែកក្រដាសត្រចៀក ព្រមទាំងមានក្លិនឈ្លៀមផងដែរ ស្រាប់តែឃើញសត្វគោដែលពួកគាត់ចិញ្ចឹម នៅក្នុងក្រោលបានដួលដេករដូករណែល ទើបបង្កទៅជាការភ្ញាក់ផ្អើលតែម្តង។

សរុបសត្វគោ ដែលងាប់មានចំនួន ១១ក្បាលនោះ ជារបស់ឈ្មោះ ម៉ៅ រឿត ងាប់ចំនួន ៤ក្បាល (ញី៣ក្បាល)។ ម៉ៅ រ័ត្ន ងាប់ចំនួន ២ក្បាល (ញី១ក្បាល)។ ម៉ៅ ណា ងាប់ចំនួន ២ក្បាល (ញីទាំង២ក្បាល)។ ម៉ៅ រុន ងាប់ចំនួន ១ក្បាល (ញី)។ និង ម៉ៅ រ: ងាប់ចំនួន ២ក្បាល (ញីទាំង២ក្បាល) ៕

អត្ថបទ៖ សោ និយមរ័ត្ន

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត