សមត្ថកិច្ចចាប់ខ្លួនក្មេងទំនើង ៤នាក់ ក្រោយធ្វើសកម្មភាពគប់កញ្ចក់រថយន្ត នៅលើកំណាត់ផ្លូវជាតិលេខ ៥

សកម្មភាពគប់កញ្ចក់រថយន្ត បានកើតឡើងជាញឹកញាប់ នៅលើកំណាត់ផ្លូវជាតិលេខ ៥ ក្នុងភូមិសាស្ត្រស្រុកថ្មគោល ខេត្តបាត់ដំបង ដែលតម្រូវឲ្យសមត្ថកិច្ចបើកការស្រាវជ្រាវ រហូតឈានដល់ការចាប់ខ្លួនក្មេងទំនើង បានចំនួន ៤នាក់។

គួររំលឹកថា កាលពីថ្ងៃទី១៣ ខែកញ្ញា ឆ្នាំ២០២១ វេលាម៉ោង ៨យប់ នៅចំណុចលើផ្លូវជាតិលេខ ៥ ក្នុងភូមិជ្រោយស្ដៅ ឃុំជ្រោយស្ដៅ ស្រុកថ្មគោល មានករណីគប់កញ្ចក់រថយន្តមួយ កើតឡើងបង្កដោយជនសង្ស័យមិនស្គាល់អត្តសញ្ញាណ បានធ្វើសកម្មភាពយកដុំថ្មគប់កញ្ចក់រថយន្តម៉ាក Fuso បណ្តាលឲ្យ បែកកញ្ចក់ខាងមុខខ្ទេច។

លុះដល់ថ្ងៃទី១ ខែតុលា ឆ្នាំ២០២១ វេលាម៉ោង ៨ និង៣០នាទី នៅចំណុចភូមិជ្រោយស្ដៅដដែល ក្នុងឃុំជ្រោយស្ដៅ ស្រុកថ្មគោល ក៏មានករណីគប់កញ្ចក់រថយន្ត ១លើកទៀត បណ្ដាលឲ្យបែកកញ្ចក់រថយន្តចំនួន ៣គ្រឿង។

ក្រោយពេលកើតហេតុ ករណីគប់កញ្ចក់រថយន្តទាំង ២លើកខាងលើ កម្លាំងជំនាញបានចុះធ្វើការស៊ើបអង្កេតស្រាវជ្រាវ និងកំណត់បានមុខសញ្ញាចំនួន ៤នាក់៖

១.ឈ្មោះ ឡោ សុជាតិ ហៅ បឿក ភេទប្រុសអាយុ២០ឆ្នាំ ២.ឈ្មោះ សុវណ្ណ ពេជ្រ ភេទប្រុស អាយុ១៧ឆ្នាំ ៣.ឈ្មោះ ជួន សុខសាន្ត ហៅ ម៉ៅ ភេទប្រុស អាយុ១៦ឆ្នាំ និង៤.ឈ្មោះ ចាន់ សុជា ភេទប្រុស អាយុ១៩ឆ្នាំ។ ជនទាំង៤នាក់ រស់នៅភូមិជ្រោយស្តៅ ឃុំជ្រោយស្ដៅ ស្រុកថ្មគោល ខេត្តបាត់ដំបង ដោយមានការឯកភាពពីលោកព្រះរាជអាជ្ញា កែវ សុជាតិ ទើបសមត្ថកិច្ចចុះឃាត់ខ្លួនតែម្តង។

ក្រោយពីបានធ្វើការសាកសួរ គឺជនសង្ស័យទាំង ៤នាក់ខាងលើ បានឆ្លើយភាពថា ពួកខ្លួនពិតជាបានធ្វើសកម្មភាពគប់កញ្ចក់រថយន្តទាំង ២លើកពិតប្រាកដមែន ដោយបច្ចុប្បន្នជនសង្ស័យ ត្រូវកម្លាំងជំនាញរៀបចំឯកសារ ដើម្បីអនុវត្តតាមនីតិវិធី៕

អត្ថបទ៖ សោ និយមរ័ត្ន