ព័ត៌មានជាតិ

ឆេះ ដេប៉ូប្រេងឥន្ធនៈ រាលដាលដល់ផ្ទះកម្ពស់៣ជាន់ ពេលបង្ហូរប្រេងចូលស៊ីទែនស្តុក

បានផុស

៥ years មុន

នៅ

ថ្ងៃព្រហស្បតិ៍ ២១ តុលា ២០២១

ដោយ

ផ្ទះថ្មកម្ពស់៣ជាន់ ត្រូវបានអគ្គីភ័យឆាបឆេះយ៉ាងសន្ធោសន្ធៅ បន្ទាប់ពីភ្លើងនេះបានឆេះរាលដាលពីការបូមប្រេងចេញពីរថយន្តចូលទៅស៊ីទែនស្តុកប្រេង។

ករណីអគ្គីភ័យឆាបឆេះដេប៉ូសាំងនេះ បានកើតឡើងនាថ្ងៃទី២០ ខែតុលា ឆ្នាំ២០២១ នៅវេលាម៉ោង៤ល្ងាច ស្ថិតនៅចំណុចក្រុមទី១៥ ភូមិឈើទាល ឃុំឈើទាល ស្រុកបាណន់ ខេត្តបាត់ដំបង ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវរសេនីយ៍ឯក គឹម ប៊ុនធឿន នាយការិយាល័យបង្ការ ពន្លត់អគ្គីភ័យ នៃស្នងការដ្ឋាននគរបាលខេត្ត បានបញ្ជាក់ថា ករណីអគ្គិភ័យនេះ បានបណ្តាលឲ្យឆេះផ្ទះចំនួន០១ខ្នង ទំហំ១២មx៨ម កម្ពស់៣ជាន់ របស់ម្ចាស់ឈ្មោះ ម៉ាន់ ចៃ ភេទប្រុស អាយុ៤៩ឆ្នាំ ។

នៅក្នុងករណីនេះដែរក៏បានបង្កអោយរងរបួសមនុស្សចំនួន១នាក់ បានបញ្ជូនទៅមន្ទីរពេទ្យខេត្តបាត់ដំបង (ជាអ្នកបើកបររថយន្តដឹកសាំង)។

បើតាមសាក្សីបាននិយាយថា នៅពេលដែលអ្នកបើកបរចាប់ផ្តើមបើកបង្ហូរសាំងទៅក្នុងស៊ីទែនស្តុកសាំង ស្រាប់តែគេឃើញមានអណ្តាតភ្លើងឆាបឆេះឡើងតែម្តង ព្រមទាំងបានឆេះទាំងរថយន្ត និងឆេះទាំងស៊ីទែនស្តុកប្រេងសាំងដែលម្ចាស់បានដាក់តម្កល់នៅលើដី ដោយមិនបានដាក់បង្កប់ក្រោមដីឡើយ ហើយអណ្តាតភ្លើងក៏បានឆេះរាល់ដល់ផ្ទះតែម្តង ។

លោកនាយការិយាល័យបានបន្តថា រថយន្តពន្លត់អគ្គិភ័យបានចេញចំនួន០៥គ្រឿង(រថយន្តអធិការនគរបាលស្រុកបាណន់០១គ្រឿង,ស្នងការដ្ឋាននគរបាលខេត្តបាត់ដំបង ចំនួន០៣គ្រឿង និងអធិការនគរបាលស្រុកសង្កែ ចំនួន០១គ្រឿង) ប្រើប្រាស់ទឹកអស់ចំនួន១១ឡាន ដោយកិច្ចប្រតិបត្តិការនេះបញ្ចប់ត្រឹមម៉ោង ៨យប់ ៕

អត្ថបទ៖ សោ និយមរ័ត្ន