អ្នកនាំពាក្យក្រសួងអប់រំ៖ ការបង្រៀនតាមបែបចម្រុះនៅតែបន្ត ទោះបើកសាលាឡើងវិញ

មន្ត្រីក្រសួងអប់រំ យុវជន និងកីឡា បានអះអាងថា ទោះបីជាក្រសួង បានអនុញ្ញាតឱ្យបើកដំណើរការសាលារៀនរដ្ឋ និងឯកជនគ្រប់កម្រិតបើកដំណើរការឡើងវិញក្តី ក៏ការរៀន និងបង្រៀនតាមបែបចម្រុះ ទាំងក្នុងថ្នាក់ និងតាមអនឡាញនៅតែបន្តអនុវត្តដដែល។ 

លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានមានប្រសាសន៍នៅព្រឹកថ្ងៃទី១ ខែវិច្ឆិកានេះថា យោងលើលទ្ធផលអាចទទួលយកបាន នៃការបើកដំណើរការសាលារៀនសាកល្បងកន្លងមក ចាប់ពីថ្ងៃទី១ ខែវិច្ឆិកា ឆ្នាំ ២០២១ ក្រសួងអប់រំ យុវជន និងកីឡា បានពង្រីកវិសាលភាពបើកដំណើរការបង្រៀន និងរៀនតាមបណ្ដុំសម្រាប់គ្រឹះស្ថានសិក្សាចំណេះទូទៅគ្រប់កម្រិត គ្រឹះស្ថានឧត្តមសិក្សាសាធារណៈ និងឯកជន និងគ្រឹះស្ថានបណ្ដុះបណ្ដាលគ្រូ។

លោក រស់ សុវាចា បានបន្តថា ការពង្រីកវិសាលភាពនេះត្រូវអាស្រ័យលើស្ថានភាពជំងឺកូវីដ-១៩ ចំនួន២គឺ ភូមិសាស្រ្តដែលអាចគ្រប់គ្រងជំងឺកូវីដ-១៩ បាន និងភូមិសាស្រ្តដែលមានហានិភ័យមធ្យម និងខ្ពស់ ដូចមានចែងក្នុងលិខិតលេខ ៦០ ចុះថ្ងៃទី២១ ខែតុលា ឆ្នាំ២០២១ ដោយបន្តអនុវត្តគោលការណ៍ប្រតិបត្តិស្តង់ដារបស់ក្រសួងអប់រំ យុវជន និងកីឡាចុះថ្ងៃទី០៤ ខែសីហា ឆ្នាំ២០២០ ស្របតាមវិធានការសុខាភិបាល។

លោក រស់ សុវាចា បានបន្តទៀតថា៖ “បើទោះបីជាមានការបើកដំណើរការសាលារៀនគ្រប់កម្រិតឡើងវិញក្តី ការរៀន និងបង្រៀនត្រូវបន្តអនុវត្តតាមបែបចម្រុះ គឺរៀនក្នុងថ្នាក់ផង រៀនតាមអនឡាញផង ស្វ័យសិក្សាផង អមដោយសន្លឹកកិច្ចការជំនួយ ដោយកំណត់សិស្សពី ១៥ ទៅ ២០ នាក់ក្នុងមួយថ្នាក់ និងរៀនឆ្លាស់វេនគ្នា”។

ក្រសួងអប់រំ យុវជន និងកីឡា បានអនុញ្ញាតឱ្យបើកដំណើរការសិក្សាគ្រឹះស្ថានសិក្សារដ្ឋ និងឯកជនគ្រប់កម្រិតនៅទូទាំងប្រទេសចាប់ពីថ្ងៃទី១ ខែវិច្ឆិកា ឆ្នាំ២០២១ ហើយការបើកដំណើរការឡើងវិញគ្រប់សាលា គ្រប់កម្រិតដោយកំណត់ក្នុង១ថ្នាក់ដាក់សិស្សបានពី១៥ ទៅ ២០នាក់ និងឆ្លាស់វេនគ្នា និងបន្តអនុវត្តនូវគម្លាតសុវត្តិភាព និងវិធានការសុខាភិបាលចាំបាច់នានាចំពោះភូមិសាស្ត្រណាមានហានិភ័យទាប។

ចំពោះភូមិសាស្ត្រដែលមានហានិភ័យមធ្យម និងខ្ពស់ ផ្តល់អាទិភាពទៅលើសិស្សថ្នាក់ទី៩ និងទី១២ ហើយកម្រិតថ្នាក់ផ្សេងទៀតនៅមធ្យមសិក្សា និងបឋមសិក្សា ឱ្យរៀននៅតាមសាលារៀន ប៉ុន្តែក្នុងរូបភាពជាការរៀនតាមបណ្ដុំ ដែលមានចំនួនតិចជាង ១៥ ទៅ២០នាក់ និងឆ្លាស់វេនគ្នាដើម្បីងាយស្រួលក្នុងការបង្រៀន និងការគ្រប់គ្រង។

ចំពោះកម្រិតថ្នាក់ផ្សេងទៀត អាចរៀបចំការរៀនជាបណ្ដុំមិនឱ្យលើសពី១៥ ទៅ២០នាក់ ទៅតាមស្ថានភាពជាក់ស្ដែង ដោយអាចរៀបចំការរៀនតាមបណ្ដុំនៅសាលារៀន និងបែងចែកវេន ឬបណ្ដុំតាមចម្រុះថ្នាក់ ឬអាចរៀបចំបណ្ដុំបន្ថែមនៅតាមផ្ទះ វត្តអារាម ឬកន្លែងសមស្រប រៀបចំចងក្រងបញ្ជីឈ្មោះសិស្សតាមបណ្តុំ និងតាមកម្រិតថ្នាក់នីមួយៗ៕

អត្ថបទ៖ សំអឿន