ព័ត៌មានជាតិ

ក្រសួងអប់រំប្រកាសឱ្យគ្រឹះស្ថានសិក្សាឯកជនត្រៀមចូលរួមប្រឡងបាក់ឌុបនៅថ្ងៃទី២៧ ធ្នូខាងមុខ

បានផុស

៤ years មុន

នៅ

ថ្ងៃអង្គារ ៩ វិច្ឆិកា ២០២១

ដោយ

ក្រសួងអប់រំយុវជន និងកីឡាបានប្រកាសឱ្យគ្រឹះស្ថានសិក្សាឯកជនដែលមិនមានលទ្ធភាពរៀបចំការប្រឡងដោយខ្លួនឯងត្រៀមចូលរួមប្រឡងបាក់ឌុបនៅថ្ងៃទី២៧ ធ្នូនាពេលខាងមុខនេះ។

យោងតាមសេចក្តីជួនដំណឹងរបស់ក្រសួងអប់រំយុវជន និងកីឡាចុះថ្ងៃទី០៨វិច្ឆិកាបានស្នើឱ្យសមាគមគ្រឹះស្ថានឧត្តមសិក្សាកម្ពុជាធ្វើការសម្របផ្ទៃក្នុងនិងផ្តល់ព័ត៌មានដល់គ្រឹះស្ថានសិក្សាឯកជនដែលមិនមានលទ្ធភាពប្រឡងដោយខ្លួនឯងឱ្យបានជ្រាបនិងត្រៀមចូលរួមឱ្យមានប្រសិទ្ធភាពខ្ពស់។

លោក ហេង វ៉ាន់ដា ប្រធានក្រុមប្រឹក្សាភិបាលសមាគមគ្រឹះស្ថានឧត្តមសិក្សាកម្ពុជាបានមានប្រសាសន៍នៅព្រឹកថ្ងៃទី០៩វិច្ឆិកានេះថាកន្លងមកក្រសួងអប់រំបានអនុញ្ញាតឱ្យគ្រឹះស្ថានសិក្សាឯកជននីមួយៗរៀបចំការប្រឡងបាក់ឌុបដោយខ្លួនឯងតែនៅមិនទាន់មានសាលាណាមួយរៀបចំដោយខ្លួនឯងនោះទេ។

លោកបានបន្តថា« រហូតមកដល់ពេលនេះនៅមិនទាន់មានសាលាណាមួយចិត្តសឿងហ៊ានរៀបចំការប្រឡងដោយខ្លួននោះដែរ។ដោយសារការចំណាយច្រើននិងគុណភាពសញ្ញាបត្រព្រោះថាការសញ្ញាបត្រត្រឹមនាយកសាលាវាអត់សូវមានតម្លៃព្រោះថានៅក្នុងផ្នត់គំនិតខ្មែរយើងនៅតែរដ្ឋមន្ត្រីក្រសួងអប់រំយុវជន និងកីឡានៅតែល្អជាងល្អដាច់ហ្មង។អីចឹងមានតែទៅចូលរួមប្រឡងជាមួយថ្នាក់ជាតិដដែលហ្នឹង»។

ក្រសួងអប់រំ យុវជន និងកីឡានឹងរៀបចំការប្រឡងសញ្ញាបត្រ មធ្យមសិក្សាទុតិយភូមិ សម្រាប់ឆ្នាំសិក្សា ២០២០-២០២១នៅថ្ងៃទី២៧ ធ្នូខាងមុខនេះដោយមានបេក្ខជនបានដាក់ពាក្យប្រឡងសរុប ១១៥,១៣៩នាក់ នារី ៦០,៦៦១នាក់ចែកជា២០៤មណ្ឌល និង៤៦៥១បន្ទប់។ ជាមួយគ្នានេះដែរ ក្រសួងនឹងចេញសេចក្ដីណែនាំលម្អិតស្តីពីការរៀបចំ និងការប្រព្រឹត្តិទៅនៃការប្រឡងសញ្ញាបត្រមធ្យមសិក្សាទុតិយភូមិឬបាក់ឌុបតាមដំណាក់កាលសំណេរ ដំណាក់កាល កំណែ ដំណាក់កាលស្រង់បូកពិន្ទុ និងដំណាក់កាលប្រកាសលទ្ធផល ក្នុងពេលឆាប់ៗនេះ។

គួរបញ្ជាក់ថា កាលដើមឡើយ ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប ត្រូវបានក្រសួងអប់រំយុវជននិងកីឡាគ្រោងធ្វើនៅថ្ងៃទី៦ធ្នូ និងប្រកាសលទ្ធផលនៅថ្ងៃទី២៨និង ២៩ខែធ្នូឆ្នាំ២០២១៕

អត្ថបទ៖ សំអឿន