ព័ត៌មានជាតិ

ឃាត់ខ្លួនអ្នកលួចដោះដែកប៉ាណូ៣នាក់ធ្វើការសួរនាំ

បានផុស

៤ years មុន

នៅ

ថ្ងៃពុធ ១០ វិច្ឆិកា ២០២១

ដោយ

កម្លាំងនគរបាលប៉ុស្តិ៍រដ្ឋបាលចតុមុខ នៃអធិការដ្ឋាននគរបាលខណ្ឌដូនពេញ បានឃាត់ខ្លួនជនសង្ស័យចំនួន៣នាក់ដែលលួចដោះដែកប៉ាណូនៅចំណុចខាងលិចគល់ស្ពានកោះពេជ្រ។

ហេតុការណ៍បានកើតឡើងកាលពីវេលាម៉ោង២០យប់ថ្ងៃទី០៩ ខែវិច្ឆិកា ឆ្នាំ២០២១ នៅចំណុចខាងលិចគល់ស្ពានកោះពេជ្រ ផ្លូវសួនថ្មី ភូមិ២ សង្កាត់ចតុមុខ ខណ្ឌដូនពេញ រាជធានីភ្នំពេញ ។

សមត្ថកិច្ចឲ្យដឹងថា ជនសង្ស័យដែលឃាត់ខ្លួនមានឈ្មោះទី១-ឈ្មោះ លី ប៊ុនហេង ភេទប្រុស អាយុ១៧ឆ្នាំ ជនជាតិខ្មែរ មុខរបរមិនពិតប្រាកដ ទីលំនៅមិនពិតប្រាកដ។ ទី២-ឈ្មោះ កែវ បូរី ភេទប្រុស អាយុ២៨ឆ្នាំ ជនជាតិខ្មែរ មុខរបរមិនពិតប្រាកដ ទីលំនៅមិនពិតប្រាកដ ។ ទី៣-ឈ្មោះ ថា តឿរ ភេទប្រុស អាយុ៣២ឆ្នាំ ជនជាតិខ្មែរ មុខរបរមិនពិតប្រាកដ ទីលំនៅមិនពិតប្រាកដ ។ ក្រោយឃាត់ខ្លួនសមត្ថកិច្ចបានដកហូតដែកផ្លាកប៉ាណូចំនួន៥ដើម ប្រវែង០៣ម៉ែត្រ ។

សមត្ថកិច្ចបន្តទៀតថា កាលពីថ្ងៃទី០៩ ខែវិច្ឆិកា ឆ្នាំ២០២១ វេលាម៉ោង១៣និង០០នាទី មុនពេលកើតហេតុជនសង្ស័យឈ្មោះ លី ប៊ុនហេង បានដើរទៅដាស់ឈ្មោះ កែវ បូរី និងឈ្មោះ ថា តឿរ ដែលកំពុងដេកនៅខាងក្រោមគល់ស្ពានកោះពេជ្រ អោយមកលួចដោះដែកស្លាកប៉ាណូជាមួយ នៅចំណុចខាងលិចគល់ស្ពានកោះពេជ្រ។ លុះពេលមកដល់ចំណុចខាងលើឈ្មោះ លី ប៊ុនហេង បានអោយបក្ខពួករបស់ខ្លួនចំនួន០២ នាក់ឈ្មោះ កែវ បូរី និងឈ្មោះ ថា តឿរ ជាអ្នកចាំនៅខាងក្រោមផ្លាកប៉ាណូ ហើយខ្លួនជាអ្នកឡើងទៅខាងលើដើម្បីដោះដែក។ ពេលដោះបានហើយក៏ទម្លាក់ដែកចុះមកខាងក្រោមអោយឈ្មោះ កែវ បូរី និងឈ្មោះ ថា តឿរ ជាអ្នកចាំទទួល ដោយដោះបានចំនួន០៥ដើម ក្នុង០១ដើមមានប្រវែង០៣ម៉ែត្រ។ ពេលដោះបានអស់ហើយឈ្មោះ លី ប៊ុនហេង បានកំពុងតែចុះមកខាងក្រោមវិញ ក៏ត្រូវបានសមត្ថកិច្ចល្បាតនៅក្បែរនោះទៅដល់ បានឃើញនិងធ្វើការឃាត់ខ្លួនជនសង្ស័យទាំង៣នាក់ រួមទាំងវត្ថុតាងដែកចំនួន០៥ដើម យកមកកាន់ទីស្នាក់ការប៉ុស្តិ៍នគរបាលរដ្ឋបាលចតុមុខ ដើម្បីធ្វើការសាកសួរ និងកសាងនិតិវិធី៕

អត្ថបទ៖ រស្មី