អាជ្ញាធរចុះវាយកម្ទេច សំណង់ប្រជាពលរដ្ឋមួយកន្លែង សាង​សង់រំលោភចំណីផ្លូវ

អាជ្ញាធរបានសម្រេចបង្កើតគណៈកម្មការវាយកម្ទេចសំណង់រឹងមួយកន្លែង ដែលម្ចាស់សំណង់ខាងលើមិនព្រមស្តាប់តាមការណែនាំរបស់អាជ្ញាធរឡើយ បើទោះជាមានការហាមឃាត់យ៉ាងណាក៏ដោយ ក៏គេនៅតែបន្តសកម្មភាពលួចសាងសង់ទាំងយប់ទាំងថ្ងៃរហូតបានសម្រេចតែម្តង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពព័ត៌មានពីកន្លែងកើតហេតុបានឲ្យដឹងថា ស្ត្រីម្ចាស់ផ្ទះឈ្មោះ ម៉ែន ណារិន ជាអាជីវកររស់នៅភូមិ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។

ក្រុមការងារអាជ្ញាធរសមត្ថកិច្ចបានចុះធ្វើការអប់រំណែនាំច្រើនលើកច្រើនសាររួចហើយ តែម្ចាស់សំណង់ខាងលើនៅតែលួចសាងសង់រហូតបានជោគជ័យ ហើយសាងសង់ខុសស្តង់ដារទៀតផង មិនត្រឹមតែប៉ុណ្ណោះម្ចាស់សំណង់ខាងលើបានជេរប្រមាថសមត្ថកិច្ចអាជ្ញាធរថែមទៀតផង ដោយសារតែមានបញ្ហាដូចខាងលើទើបអាជ្ញាធរសម្រេចបង្កើតគណៈកម្មការចម្រុះចុះធ្វើសកម្មភាពវាយកម្ទេចរបងនិងសំណង់មួយចំនួនចោលកាលពីនៅព្រឹកថ្ងៃទី១២ ខែវិច្ឆិកា ឆ្នាំ២០២១តែម្តង។

លោក កែវ តារារស្មី អភិបាលរងក្រុងប៉ោយប៉ែត បានបញ្ជាក់ថា នេះជាលើកទី២ហើយ ដែលអាជ្ញាធរក្រុង រួមទាំងសមត្ថកិច្ចចម្រុះ ចុះមកហាមឃាត់ សំណង់រឹងដែលមានទទឹង ២៩ម៉ែត្រ បណ្តោយ ១៤៩ម៉ែត្រ កំពស់៣៤ម៉ែត្រ ដោយ​សង់ចាក់ជាធ្នឹមរៀបឥដ្ឋ ២០ លោកថា ក្រុមការងារចម្រុះចុះធ្វើកំណត់ហេតុហៅម្ចាស់មកផ្តិតមេដៃឱ្យរុះរើចេញម្តងហើយកាលពីម្សិលមិញ ករណីខាងលើនេះ ម្ចាស់ផ្ទះ ឈ្មោះ ម៉ែន ណារិន មិនព្រមរុះរើតាមការណែនាំរបស់អាជ្ញាធរមានសមត្ថកិច្ចនោះឡើយ ថែមទាំងផ្គើនឲ្យជាងសាងសង់បន្តបន្ថែមទៀត ទើបកម្លាំងចម្រុះ ធ្វើការដកហូតសម្ភារ​សាងសង់មួយចំនួនតែម្តង។

ម្យ៉ាងវិញទៀត អាជ្ញាធរពិនិត្យឃើញថា សំណង់អាគារធំទំហំ ៥ល្វែង មានកំពស់៧ជាន់ របស់លោក ស្រី ម៉ែន ណារិន នេះ ក៏ពុំមានច្បាប់អនុញ្ញាតសាងសង់ដែរ លោកបញ្ជាក់ថា ករណីខាងលើនេះ ក្រុមការងារជំនាញ និងរៀបចំសំណុំរឿងបញ្ជូនទៅតុលាការដើម្បីចុះមកស្រាវជ្រាវអនុវត្តទៅតាមច្បាប់នាពេលខាងមុខ៕

អត្ថបទៈ ពៅរី