អាជ្ញាធរខណ្ឌពោធិ៍សែនជ័យដាក់កម្លាំងចុះរុះរើសំណង់មួយកន្លែងដែលសង់រំលោភចំណីផ្លូវជាតិលេខ៣

កម្លាំងគណបញ្ជាការឯកភាពខណ្ឌពោធិ៍សែនជ័យ ដឹកនាំដោយលោក ឈួន ឆាយ៉ារិទ្ធ នាយករដ្ឋបាលខណ្ឌ កាលពីរសៀលថ្ងៃទី២០ ខែកក្កដា ឆ្នាំ២០២៤ បានចុះរុះរើសំណង់ខុសច្បាប់មួយកន្លែងដែលសាងសង់រំលោភចំណីផ្លូវជាតិលេខ​ស្ថិតនៅភូមិព្រៃព្រីងខាត្បូង២ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។ ការចុះរុះរើនេះបានធ្វើឡើងបន្ទាប់ពីអាជ្ញាធរបានជូនដំណឹងឲ្យម្ចាស់ទីតាំងរុះរើដោយខ្លួនឯងដោយសារការសាងសងនេះបានរំលោភលើចំណីផ្លូវធ្វើឲ្យប៉ះពាល់ដល់សណ្ដាប់ធ្នាប់សាធារណៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាជ្ញាធរខណ្ឌពោធិ៍សែនជ័យបានឲ្យដឹងថា កាលពីរសៀលថ្ងៃទី១៩ ខែកក្កដា កម្លាំងអាជ្ញាធរបានជូនដំណឹងដល់ឈ្មោះហ៊ុល ភា ជាម្ចាស់សំណង់សង់រំលោភផ្លូវសាធារណៈឲ្យរុះរើចេញតែត្រូវបានម្ចាស់ទីតាំងចេញមកស្រែកឡូឡា ដោយមិនព្រមធ្វើតាមការណែនាំរបស់អាជ្ញាធរនោះទេ។ អាជ្ញាធរបញ្ជាក់ថា សំណង់នេះបានសង់រំលោភចំណីផ្លូវ៥,៥០ម៉ែត្រ ហើយតម្រូវឲ្យម្ចាស់ទីតាំងធ្វើកិច្ចសន្យាបញ្ឈប់ការសាងសង់ និងត្រូវរុះរើចេញជាបន្ទាន់។

លោក សក់ ច័ន្ទកាញ្ញារិទ្ធ អភិបាលខណ្ឌពោធិ៍សែនជ័យបានថ្លែងថា ក្នុងឆ្នាំ២០២៤នេះ ត្រូវបញ្ឈប់ឲ្យមានការសាងសង់សំណង់រំលោភចំណីផ្លូវកើតឡើងថ្មីទៀត ហើយអាជ្ញាធរខណ្ឌពោធិ៍សែនជ័យត្រូវមានវិធានការរក្សាចាស់ មិនឲ្យបង្កើតថ្មីនោះទេ។ ដើម្បីងាយស្រួលចាត់វិធានការរុះរើសំណង់ចាស់ដែលសង់រំលោភចំណីផ្លូវរួចកន្លងមក ធ្វើយ៉ាងណាសម្អាតឲ្យស្អាតចេញពីដំណីផ្លូវ ឲ្យផ្លូវមានសោភ័ណភាព លុបបំបាត់ភាពអនាធិបតេយ្យ៕

អត្ថបទ៖ ម៉េង