កិច្ចប្រជុំប្រចាំឆ្នាំលើកទី ២៩ នៃវេទិកាសភាអាស៊ី-ប៉ាស៊ីហ្វិក APPF29 នឹងបើក​ជាផ្លូវការ​នៅព្រឹក​ស្អែក​​​​​​

កិច្ចប្រជុំប្រចាំឆ្នាំលើកទី ២៩ នៃវេទិកាសភាអាស៊ី-ប៉ាស៊ីហ្វិក APPF29 ដែលសភានៃសាធា​រណរដ្ឋកូរ៉េធ្វើជាម្ចាស់ផ្ទះ មានរយៈពេល ៣ថ្ងៃ ចាប់ពីថ្ងៃទី ១៣ ដល់ថ្ងៃទី ១៥ ខែធ្នូ ឆ្នាំ២០២១ ក្រោមមូលបទ “តួនាទីសភាក្នុងការពង្រឹងភាពធន់ ក្រោយសម័យកូវីដ-១៩” ហើយ​ពិធីបើកកិច្ចប្រជុំនេះជាផ្លូវការ ​នឹងប្រព្រឹត្តទៅនៅព្រឹកថ្ងៃទី ១៤ ខែធ្នូ ឆ្នាំ ២០២១ស្អែកនេះ។​

ចំណែកនៅរសៀលថ្ងៃទី ១៣ ខែធ្នូ ឆ្នាំ២០២១​នេះ ​គឺជាការកិច្ចប្រជុំសមាជិកសភាជាស្ត្រី នៃកិច្ច​ប្រជុំប្រចាំឆ្នាំនៃវេទិ​កា​សភាអាស៊ី-ប៉ាស៊ីហ្វិកលើកទី ២៩ ​ក្រោមប្រធានបទ “ការធ្វើឱ្យបានសម្រេចសមភាពយេនឌ័រ តាម​រយៈការបង្កើន​ការចូលរួម និងភាពជាតំណាងរបស់ស្ត្រី” ហើយកិច្ចប្រជុំ​​បានចាប់ផ្តើម​​ក្រោមការដឹកនាំកិច្ចប្រជុំដោយ​លោកស្រី ណាំ អ៊ីន ស៊ុន (Hon. Nam In-soon) សមាជិការដ្ឋសភានៃសាធារណរដ្ឋកូរ៉េ​។​

លោកស្រី ឡោក ខេង ប្រធានគណៈកម្មការសុខាភិបាល សង្គមកិច្ច អតីត​យុទ្ធជន យុវនីតិសម្បទា ការងារ បណ្ដុះបណ្ដាលវិជ្ជាជីវៈ និងកិច្ចការនារីនៃរដ្ឋសភា​ បានដឹកនាំសហការីចូលរួមកិច្ចប្រជុំនេះ ​តាមរយៈប្រព័ន្ធវីដេអូ ដែលភ្ជាប់ពីវិមានរដ្ឋសភា​ទៅកាន់រដ្ឋធានីសេអ៊ូល នៃ​សា​ធារណរដ្ឋកូរ៉េ។

តាមព័ត៌មានពីរដ្ឋសភា​ បានឲ្យដឹងថា ប្រតិភូដែលបាន​ចូលរួមផ្ដល់បទអន្តរាគមន៍ ក្នុងកិច្ចប្រជុំសមាជិក​សភាជាស្ត្រី បានធ្វើការកត់សម្គាល់ថា វិបត្តិកូវីដ-១៩ បានធ្វើឲ្យមានភាពប្រឈមកាន់តែខ្លាំងឡើងទៅនឹងការរើសអើង និងការព្រងើយកន្តើយចំពោះស្ត្រី ហើយកិច្ចប្រជុំបានជំរុញឲ្យសមាជិកសភា ពង្រឹងកិច្ចសហប្រតិបត្តិការអន្តរជាតិ និងអន្តរសភា ដើម្បីកសាងសង្គម ដែលកាន់តែមានភាពស៊ាំ និងធន់ជាងមុន ក្នុងរយៈពេលវែង និងរួមគ្នាប្រើវិធីសាស្ត្រដែលឆ្លើយតបទៅនឹងយេនឌ័រ សម្រាប់ដោះស្រាយវិបត្តិនានានៅពេលអនាគត។​

កិច្ចប្រជុំក៏បានអះអាងឡើងវិញ ​នូវ​អនុសញ្ញា​អង្គការ​សហប្រជាជាតិឆ្នាំ១៩៧៩​ ស្តីពីការលុបបំ​បាត់រាល់ទម្រង់នៃការរើសអើងប្រឆាំងនឹងស្ត្រី (CEDAW) 1995 សេចក្តីប្រកាសប៉េកាំង និងវេទិកា​សម្រាប់​សកម្មភាព និងដំណោះស្រាយនៃកិច្ចប្រជុំប្រចាំឆ្នាំ APPF លើកទី២៧ និង​២៨  ស្តីពីការ​សម្រេច​បានសមភាពយេនឌ័រ និងការពង្រឹង​ភាពអង់អាចរបស់ស្ត្រីនៅគ្រប់កម្រិតនៃការ​សម្រេចចិត្ត និងបានជំរុញឲ្យប្រទេសជាសមាជិកធានា ឲ្យមានការចូលរួមពីតំណាងរបស់ស្ត្រី ដើម្បីសម្រេចបាននូវគោលដៅអភិវឌ្ឍន៍ប្រកបដោយចីរភាពទី៥ របស់អង្គការសហប្រជាជាតិស្តីពីសមភាពយេនឌ័រ។​

តាងនាមគណៈប្រតិភូសភាកម្ពុជា ​លោកស្រី ឡោក ខេង បានធ្វើការចែករំលែកបទពិសោធន៍ពីវឌ្ឍនភាព បញ្ហាប្រឈម និងទិសដៅទៅមុខ ​ដើម្បីសម្រេចបាននូវសមភាពយេនឌ័រ តាមរយៈការបង្កើនការចូលរួម និងភាពជាតំណាងរបស់ស្ត្រី ដោយសារតែកម្ពុជាបានដាក់សមភាពយេនឌ័រជាចំណុចអាទិភាពមួយ ក្នុងចំណោមចំណុចអាទិភាពជាច្រើន ពិសេសរាជរដ្ឋាភិបាលកម្ពុជាបានប្តេជ្ញាជួយជំរុញស្រ្តីចូលរួមទាំងក្នុងថ្នាក់ជាតិ និងថ្នាក់ក្រោមជាតិ។​ ​

លោកស្រី ឡោក ខេង បានលើកឡើងទៀតថា សភា និងរាជរដ្ឋាភិបាលកម្ពុជា ដែលមានក្រ​សួង​កិច្ចការនារីបានរួមគ្នាដើរតួនាទីដ៏សំខាន់ សហការគ្រប់ភាគីពាក់ព័ន្ធ គ្រប់ស្ថាប័ន គណបក្ស​នយោបាយ សង្គមស៊ីវិល វិស័យឯកជន ក្រុមគ្រួសារ ជាពិសេសបុរសៗ គឺជាអ្នករួមចំណែ​កសំខាន់ក្នុងការចូលរួមបញ្ជ្រាបយេនឌ័រលើគ្រប់វិស័យ និងគ្រប់ទីកន្លែង ដោយប្រកាន់ខ្ជាប់ថា “ជួយស្ត្រី គឺជួយខ្លួនយើង” ដែលធ្វើឱ្យកម្ពុជាសម្រេចបាននូវវឌ្ឍនភាពសំខាន់ៗ ក្នុងការផ្តល់ភាពអង់អាចដល់ស្រ្តី ក្នុងវិស័យអប់រំ សុខាភិបាល និងធុរកិច្ច​៕

អត្ថបទ៖ កោះកែវ​