អគារទីស្នាក់ការគណបក្សប្រជាជនកម្ពុជា ស្រុករមាសហែក តម្លៃជាង ១លានដុល្លារ ត្រូវបានសម្ពោធជាផ្លូវការ

អគារទីស្នាក់ការគណបក្សប្រជាជនកម្ពុជា ស្រុករមាសហែក ដែលមានតម្លៃជាង ១លានដុល្លារ ត្រូវបានសម្ពោធជាផ្លូវការ ក្រោមអធិបតីភាពលោកជំទាវ ម៉ែន សំអន អនុប្រធានគណបក្សប្រជាជនកម្ពុជា ដែលពិធីនេះធ្វើឡើង នៅស្រុករមាសហែក ខេត្តស្វាយរៀង នាព្រឹកថ្ងៃសុក្រ ថ្ងៃទី ៧ ខែមករា ឆ្នាំ២០២២នេះ។

លោកជំទាវ បាននាំយកសេចក្តីនឹករលឹក និងការផ្តាំផ្ញើសាកសួរសុខទុក្ខ ពីសំណាក់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា  និងសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាក​បា​ទ​ក្រហមកម្ពុជា ដែលជានិច្ចកាលសម្តេចទាំងទ្វេរ តែងតែយកចិត្តទុកដាក់ខ្ពស់ ក្នុងការគិតគូរពីសុខទុក្ខប្រជាពលរដ្ឋទូទាំងប្រទេស។

ពិធីនេះប្រារព្ធឡើង គឺស្របពេលដែលឆ្នាំនេះ ជាខួបលើកទី ៤៣ នៃទិវាជ័យជំនះលើរបបប្រល័យពូជសាសន៍ ដែលប្រទេសជាតិយើងបានរំដោះ និងផ្តួលរំលំរបបប្រល័យពូជសាសន៍ ប៉ុល ពត ក្រោមការដឹកនាំរបស់សម្តេតេជោ ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្រ្តី។ ឆ្នាំនេះ ក៏ជាខួបលើកទី ២៣ឆ្នាំ នៃការបញ្ចប់សង្គ្រាមនៅកម្ពុជា ក្រោមនយោបាយឈ្នះ-ឈ្នះ (២៩ ធ្នូ ១៩៩៨-២៩ ធ្នូ ២០២១) ដែលកម្ពុជារកបាន នូវសុខសន្តិភាពពេញលេញ និងមានការឯកភាពជាតិទាំងស្រុង ជាប្រវត្តិសាស្ត្រ។

អគារទីស្នាក់ការគណបក្សប្រជាជនកម្ពុជា ដែលសម្ពោធដាក់ឲ្យប្រើប្រាស់នៅថ្ងៃនេះ គឺជាសមិទ្ធផលថ្មីមួយទៀតនៅក្នុងស្រុករមាសហែក ខេត្តស្វាយរៀង ដែលបម្រើឲ្យរដ្ឋបាលគណបក្ស នៅថ្នាក់មូលដ្ឋាន ហើយអគារនេះ ក៏បានបង្ហាញពីភាពរឹងមាំ និងជាគណបក្ស ដែលមានភាពចាស់ទុំខាងនយោបាយ ក្នុងការដឹកនាំប្រទេស ដែលមានសម្តេចតេជោ ហ៊ុន សែន ជាស្ថាបនិកមគ្គុទេ្ទសឯក និងប្រតិបត្តិករ នយោបាយឈ្នះ-ឈ្នះ ដែលបាននាំមកនូវសន្តិភាព និងការឯកភាពជាតិពេញេលញ។ 

លោកជំទាវ បានអំពាវនាវដល់ប្រជាពលរដ្ឋ ដែលបានចុះឈ្មោះបោះឆ្នោតរួចហើយ សូមអញ្ជើញទៅពិនិត្យ ផ្ទៀងផ្ទាត់ឈ្មោះនៅតាមការិយាល័យ គ.ជ.ប ដែលបានកំណត់នៅតាមមូលដ្ឋាន ឲ្យបានគ្រប់ៗគ្នា ចាប់ពីថ្ងៃទី ៣ ដល់ថ្ងៃទី ១៤ ខែមករា ឆ្នាំ២០២២។ ព្រោះការបោះឆ្នោតនេះ មានសារ:សំខាន់ណាស់សម្រាប់អភិវឌ្ឍន៍មូលដ្ឋាន ពិសេសក៏ជាការចូលរួមថែរក្សាសុខសន្តិភាព ដែលមាននាពេលបច្ចុប្បន្ន ឲ្យនៅគង់វង្សយូរអង្វែង ដើម្បីឲ្យប្រទេសជាតិ កាន់តែមានការអភិវឌ្ឍន៍ រីកចម្រើនថែមទៀត ។

បន្ថែមលើនេះ លោកជំទាវសុំឲ្យប្រជាជនយើង សមាជិកបក្សយើង ត្រូវចូលរួមថែក្សាសមិទ្ធិផលទាំងឡាយ ដែលកើតចេញពីការខិតខំ របស់យើងទាំងអស់គ្នាឲ្យបានគង់វង់ ត្រូវប្រឆាំងដាច់ខាតជនទាំងឡាយណា ដែលមានគំនិតចង់បំផ្លាញសុខសន្តិភាព នៅក្នុងប្រទេស និងត្រូវបន្តចូលរួមគាំទ្រការអនុវត្តន៍កម្មវិធីចតុកោណ ដំណាក់កាលទី ៦ របស់រាជរដ្ឋាភិបាល។

ស្ថិតនៅក្នុងបរិបទប្រឈមនឹងបញ្ហាកូវីដ-១៩ មិនទាន់ឃ្លាតចេញឆ្ងាយ មនុស្សលើសកលលោក លោកជំទាវ ម៉ែន សំអន អនុប្រធានគណបក្សប្រជាជនកម្ពុជា បានអំពាវនាវឲ្យប្រជាជនយើង បន្តអនុវត្តន៍ឲ្យបានទៀងទាត់ តាមការណែនាំរបស់ក្រសួងសុខាភិបាល និងការណែនាំរបស់រាជរដ្ឋាភិបាល ៣កុំនិង៣ការពារ ដើម្បីកុំឲ្យឆ្លងជំងឺកូវីដ-១៩ ទាំងទម្រង់ចាស់ និងថ្មី និងបានជំរុញឲ្យមូលដ្ឋាននីមួយៗ ត្រូវពិនិត្យ​មើលចំពោះប្រជាពលរដ្ឋ ដែលពុំទាន់បានចាក់វ៉ាក់សាំងដូសទី ១ និងជំរុញផ្សព្វផ្សាយសម្រាប់ការចាក់ដូសទី ៣ ឲ្យបានឆាប់រហ័ស។

លោកជំទាវ បានថ្លែងអំណរគុណ ចំពោះលោកនាយឧត្តមសេនីយ៍ សៅ សុខា សមាជិកគណៈអចិន្ត្រៃយ៍គណៈកម្មាធិការកណ្តាល អនុប្រធានក្រុមការងារគណបក្ស ចុះជួយខេត្តស្វាយរៀង ដែលបានរួមគ្នា អគារទីស្នាក់ការគណបក្សប្រជាជនកម្ពុជាដ៏ស្កឹមស្កៃ កម្ពស់ ២ជាន់ រួមជាមួយនឹងការបំពាក់នូវសម្ភារៈបរិក្ខាប្រើប្រាស់តាមបែបឌីជីថល និងតាមបែបប្រព័ន្ធព័ត៌មានវិទ្យា និងហេដ្ឋារចនាសម្ព័ន្ធ ចំណាយថវិកាអស់ជាង ១លានដុល្លារអាមេរិក ដែលបានចំណាយ ពេលសាងសង់ អស់រយៈពេល ២ឆ្នាំ។

សមិទ្ធិផលដែលសម្ពោធដាក់ឲ្យប្រើប្រាស់ថ្ងៃនេះរួមមាន៖

១. អគារកម្ពស់២ជាន់ ទំហំ ១៦ម៉ែត្រx៦១.២៩ម៉ែត្រ។ ២. ការងារក្រាលម៉ាប ដាំស្មៅរៀបចំខឿន (ទំហំ៦,៦៧០ម៉ែត្រការ៉េ) លាបថ្មាំរបង និងដងទង់ជាតិ ៣. កៅអីប្រជុំចំនួន ៨៣០កៅអី ៤. LED Screen៕

អត្ថបទ៖ វិមាន