ព័ត៌មានជាតិ

មកដល់ម៉ោងនេះ ខេត្តណាខ្លះប្រកាសផ្តល់រង្វាន់ដល់សិស្សនិទ្ទេស A?

បានផុស

៣ years មុន

នៅ

ថ្ងៃសៅរ៍ ១៥ មករា ២០២២

ដោយ

លទ្ធផលប្រឡងសញ្ញាបត្រទុតិយភូមិនាសម័យប្រឡងឆ្នាំសិក្សា ២០២០-២០២១ ឃើញថាមានបេក្ខជនជាង ៦៥ ភាគរយបានជាប់។ ក្នុងនោះមានបេក្ខជនដែលជាប់និទ្ទេស A ទូទាំងប្រទេសមានចំនួន ១ ៧៥៣ នាក់។

ថ្នាក់ដឹកនាំតាមបណ្តាខេត្តមួយចំនួនក៏បានប្រកាសផ្តល់រង្វាន់លើកទឹកចិត្តដល់បេក្ខជនដែលជាប់និទ្ទេស A តាមមូលដ្ឋានរបស់ខ្លួន ដើម្បីលើកទឹកចិត្តដែលបានប្រឹងប្រែងរៀនសូត្រសម្រេចបានលទ្ធផលល្អ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្រ្តីក្រសួងសាធារណការនិងដឹកជញ្ជូន ក៏បានប្រកាសនឹងផ្តល់រង្វាន់លើកទឹកចិត្តម៉ូតូ SCOOPY ដល់សិស្សនៅទូទាំងស្រុកកោះធំ ដែលប្រឡងសញ្ញាបត្រមធ្យមសិក្សាទុតិយភូមិជាប់បាននិទ្ទេស A។

ឯកឧត្តម វ៉ី សំណាង អភិបាលនៃគណៈអភិបាលខេត្តកំពង់ស្ពឺ ក្នុងពេលចូលរួមពិធីបើកកញ្ចប់វិញ្ញាសាប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំសិក្សា២០២០-២០២១ នៅមណ្ឌលប្រឡងវិទ្យាល័យកំពង់ស្ពឺបានសន្យានឹងផ្តល់រង្វាន់ម៉ូតូ ZOOMER X ដល់សិស្សានុសិស្សដែលទទួលបាននិទ្ទេស A។

ឯកឧត្តម គួច ចំរើន អភិបាលនៃគណៈអភិបាលខេត្តព្រះសីហនុ ក៏បានធ្វើការណែនាំឱ្យមន្ទីរអប់រំ យុវជន និងកីឡាខេត្ត ត្រៀមរៀបចំពិធីសំណេះសំណាលជាមួយលោកគ្រូ អ្នកគ្រូដែលបានយកចិត្តទុកដាក់ខិតខំបង្ហាត់បង្រៀនសិស្សតាមសាលានីមួយៗទទួលបាននិទ្ទេស A ច្រើនជាងគេតាមការសន្យាកន្លងមក។

តាមបណ្តាខេត្តផ្សេងទៀត មិនទាន់ទទួលព័ត៌មាននឹងមានរៀបចំឬការផ្តល់រង្វាន់លើកទឹកចិត្តដល់សិស្សដែលជាប់និទ្ទេស A ក្នុងមូលដ្ឋានរបស់ខ្លួននៅឡើយទេ។

ដោយឡែកជារៀងរាល់ឆ្នាំ ប្រមុខរដ្ឋាភិបាលសម្ដេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ក៏តែងតែរៀបចំកម្មវិធីជួបសំណេះសំណាល និងផ្ដល់រង្វាន់លើកទឹកចិត្តដល់ក្មួយៗ ចៅៗ សិស្សានុសិស្សដែលបានប្រឡងជាប់សញ្ញាបត្រមធ្យមសិក្សាទុតិយភូមិ(បាក់ឌុប) ដែលទទួលបាននិទ្ទេស (A)៕

Related Topics:Featured