​កម្ពុជា រំពឹង​ទាក់​ទាញអ្នកវិនិយោគ និងភ្ញៀវទេសចរ បានកាន់តែច្រើនមកពីប្រទេសម៉ារ៉ុក

ការសម្តែងក្តីសង្ឃឹម​របស់លោក​ឧបនាយករដ្ឋមន្រ្តី ប្រាក់ សុខុន រដ្ឋមន្រ្តីក្រសួងការបរទេស និង​ស​ហ​ប្រតិ​​បត្តិកា​អន្តរជាតិកម្ពុជានេះ បានធ្វើឡើងនៅក្នុងជំនួប​​ពិភាក្សាជាមួយលោក ណាស៊ឺ ប៊ូរីតា (Nasser Bourita) រដ្ឋមន្ត្រីការបរទេស សហប្រតិបត្តិការអាហ្រ្វិក និងជនអន្តោប្រវេសន៍នៃប្រទេសម៉ារ៉ុកកាលពី​រសៀលថ្ងៃទី២៥ ខែមករា ម្សិលមិញ តាមប្រព័ន្ធវីដេអូ។​

លោក​ឧបនាយករដ្ឋមន្រ្តី ប្រាក់ សុខុន​ បានឲ្យដឹងថា នៅក្នុងជំនួបនោះ ក្រោយពីបានពិភាក្សាលើប្រធានបទមួយចំនួនមក ភាគីទាំងពីរជឿជាក់ថា ទំនាក់​ទំនង និង​កិច្ច​សហ​ប្រតិបត្តិការទ្វេភាគី នៅ​មានសក្តានុពលច្រើនដែលគួរចាប់យក។ បើតាម​លោក​​ឧបនា​យក​រដ្ឋមន្រ្តី ប្រាក់ សុខុន​ កម្ពុជា ​សង្ឃឹម​ថា នឹង​អាច​ទាក់​ទាញអ្នកវិនិយោគ និងភ្ញៀវទេសចរមកពីម៉ារ៉ុកឱ្យកាន់តែច្រើន។

​លោក​ឧបនាយករដ្ឋមន្រ្តី ប្រាក់ សុខុន ​ក៏បានបញ្ជាក់ដែរថា នៅក្នុងជំនួបនោះ លោកក៏បានជំរុញរដ្ឋាភិបាលម៉ារ៉ុក ឱ្យចូលរួមកាន់តែសកម្មក្នុងការធ្វើការជាមួយអាស៊ាន ដែលនឹងអាចពន្លឿនការស្នើសុំក្លាយជា​ដៃគូសន្ទនាតាមវិស័យរបស់អាស៊ានក្នុងពេលឆាប់ៗខាងមុខនេះ៕

អត្ថបទ ៖ កោះកែវ