ព័ត៌មានជាតិ

ឧបនាយករដ្ឋមន្ត្រី ប្រាក់ សុខុន៖ ពិបាកនិយាយជាមួយអ្នកដែលមានអំណាចកាំភ្លើង

បានផុស

៤ សប្តាហ៍ មុន

នៅ

ថ្ងៃសុក្រ ២៧ មីនា ២០២៦

ដោយ

រដ្ឋមន្ត្រីក្រសួងការបរទេស លោកឧបនាយករដ្ឋមន្ត្រី ប្រាក់ សុខុន ថាកម្ពុជាចង់ដោះស្រាយបញ្ហាជម្លោះព្រំដែនដោយសន្តិវិធីជាមួយថៃ តែថាប្រទេសនេះពិបាកនិយាយគ្នាណាស់ដោយសារតែអាងលើអំណាចយោធារបស់ខ្លួន។

ថ្លែងក្នុងជំនួបជាមួយពលរដ្ឋភៀសសឹកនៅក្នុងខេត្តពោធិ៍សាត់ ព្រឹកថ្ងៃទី២៧ ខែមីនា ឆ្នាំ២០២៦នេះ លោកឧបនាយករដ្ឋមន្ត្រី ប្រាក់ សុខុន មានប្រសាសន៍ថាកម្ពុជានឹងបន្តស្វែងរកការគាំទ្រពីអន្តរជាតិតទៅទៀតដើម្បីបង្ហាញការពិតទៅពិភពលោក ជំរុញឱ្យថៃចូលតុចរចាជាមួយកម្ពុជាវិញ។

លោកថា៖ «អ្វីដែលយើងចង់ដោះស្រាយគឺដោះស្រាយដោយសន្តិវិធីដោយផ្លូវច្បាប់។ ប៉ុន្តែពិបាកនិយាយគ្នាណាស់! ពិបាកនិយាយគ្នាជាមួយអ្នកដែលមានអំណាចកាំភ្លើង មានអំណាចយោធា មានអំណាចអាវុធនេះគឺគេមិនចង់ស្ដាប់ទេ! យ៉ាងណាក៏ដោយក៏យើងនៅតែបន្តការតស៊ូ យើងនឹងបន្តស្វែងរកការគាំទ្រពីមិត្តក្នុងតំបន់ មិត្តលើឆាកអន្តរជាតិអ៊ីចឹងហើយទើបសម្ដេចនាយករដ្ឋមន្ត្រីរបស់យើងខិតខំធ្វើការការទូតនៅអាមេរិក នៅអឺរ៉ុប ទៅគ្រប់ទីកន្លែងដែលអាចទៅបានដើម្បីយើងប្រាប់ការពិតទៅកាន់ពិភពលោក»។

លោកឧបនាយករដ្ឋមន្ត្រីបានលើកឡើងថាកម្ពុជាប្រាថ្នាសន្តិភាព មិនជ្រើសរើសយកមធ្យោបាយយោធានោះទេ សូមឱ្យថៃគោរពសន្ធិសញ្ញាដែលខ្លួនធ្វើជាមួយបារាំងលើព្រំដែនកម្ពុជា គោរពច្បាប់អន្តរជាតិ និងចូលខ្លួនមកចរចាជាមួយកម្ពុជាឡើងវិញ។

លោកក៏អំពាវនាវឱ្យពលរដ្ឋភៀសសឹកបន្តទុកចិត្តលើរដ្ឋាភិបាល និងទុកពេលឱ្យរដ្ឋាភិបាលតវ៉ាទាមទារអ្វីដែលបានបាត់បង់ឱ្យពលរដ្ឋវិញ៕