សម្ដេចតេជោ ហ៊ុន សែន ៖ បើគ្មានសន្តិភាពទេ គឺប្រជាពលរដ្ឋមិនអាចធ្វើដំណើរ ដោយសុវត្ថិភាពឡើយ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានលើកឡើងថា កត្តាសន្តិភាព បាននាំមកនូវការអភិវឌ្ឍលើគ្រប់វិស័យ ហើយការធ្វើដំណើររបស់ប្រជាពលរដ្ឋ ទោះជាដំណើរកម្សាន្ដក្ដី ឬមិនមែនដំណើរ​កម្សាន្ដក្ដី គឺដោយសារតែប្រទេសជាតិ មានសុខសន្តិភាព។

ការលើកឡើង របស់សម្ដេចតេជោ ហ៊ុន សែន ខាងលើនេះ បានធ្វើឡើងក្នុងពិធីបើកការដ្ឋានសាងសង់ ស្ពានអាកាសលើផ្លូវជាតិលេខ ៥ ក្បែរទីលានប្រជាធិបតេយ្យ នៅព្រឹកថ្ងៃទី ៣១ ខែមករា ឆ្នាំ ២០២២នេះ។ សម្ដេចតេជោនាយករដ្ឋមន្ត្រី មានប្រសាសន៍ថា ប្រសិនបើគ្មានសន្តិភាពទេ គឺប្រជាពលរដ្ឋមិនអាចធ្វើដំណើរ ដោយសុវត្ថិភាពទេ។

សម្ដេចតេជោ ហ៊ុន សែន មានប្រសាសន៍បន្តថា «សន្តិភាពពិតជាសំខាន់ សម្រាប់ជីវិតមនុស្ស សម្រាប់អ្វីៗទាំងអស់ ដែលស្ថិតនៅលើផែនដីនេះ មិនមែនសម្រាប់តែកម្ពុជាម្នាក់ឯងទេ»។ ជាមួយគ្នានេះ ប្រមុខ​​​រាជរដ្ឋាភិបាល ក៏បានបញ្ជាក់ទៅកាន់ អ្នកធ្វើអត្ថាធិប្បាយមួយចំនួន ដែលថា ប្រសិនបើនៅមានការតវ៉ា គឺប្រទេសនោះ មិនទាន់មានសន្តិភាពនោះទេ។ ត្រង់ចំណុចនេះ សម្ដេចតេជោ បានជាសំណួរថា តើមានប្រទេសប៉ុន្មាន នៅលើសកលលោក ដែលគ្មានការតវ៉ា?

សម្ដេចតេជោនាយករដ្ឋមន្ត្រី បានលើកឡើងទៀតថា «ដូចជាអ្នកឡាយសូ ពីអាមេរិកគេថា ស្រុកខ្មែរអត់ទាន់មានសន្តិភាពទេ ដោយសារមានការតវ៉ារឿងនេះ រឿងនោះ បើដូច្នេះនៅអាមេរិក កាន់តែអត់មានសន្តិភាពម៉ង ព្រោះនៅអាមេរិកមិនត្រឹមតែមានការតវ៉ាទេ ថែមទាំងបាញ់គ្នាងាប់ គ្រាន់តែខែមករានេះ ងាប់ប៉ុន្មានមើលបូកសរុបទៅ យកកាំភ្លើងចេញពីឃ្លាំងបាញ់បណ្ដោយ ព្រោះស្រុកអាមេរិកលក់កាំភ្លើងដោយសេរីៗ»។

សម្ដេចតេជោ ហ៊ុន សែន បានគូសបញ្ជាក់ថា នៅថ្ងៃនេះសម្ដេច គ្រាន់តែចង់បញ្ជូនសារទៅកាន់អ្នកវិភាគទាំងឡាយ ដែលថា សម្ដេចអត់ធានាជូនអំពីសន្តិភាពផ្លូវចិត្តនោះទេ សម្ដេចគ្រាន់តែធានាថា ជីវិតមនុស្សត្រូវបានធានា ដោយគ្មានការស្លាប់ ឬរបួស ដោយសារតែចម្បាំងរាំងជល់ ដែលកើតឡើងពីអតីតកាលតែប៉ុណ្ណោះ៕

អត្ថបទ៖ ឃួន សុភ័ក្រ