ពលរដ្ឋ​ ៥៤ គ្រួសារ ​រស់នៅ​ក្នុងទីតាំង​សំណង់​មិនរៀប​រយ​ជាប់របង​មន្ទីរពេទ្យ​ព្រះកុសុមៈ​ស្ម័គ្រចិត្តទទួល​យកដី​នៅ​តំបន់​អភិវឌ្ឍន៍​7NG

ប្រជាពលរដ្ឋចំនួន ៥៤ គ្រួសារ ដែលរស់នៅលើសំណង់មិនរៀបរយ ជាប់របងមន្ទីរពេទ្យព្រះកុសុមៈ ស្ថិតនៅលើផ្លូវ ១៣៨ក្នុងសង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ ជាច្រើនឆ្នាំ បានសម្រេចចិត្ត ទទួលយកដីនៅតំបន់អភិវឌ្ឍន 7NG ហើយកាលពីថ្ងៃទី ១៥ ខែកុម្ភៈ ឆ្នាំ២០២២នេះ។

ក្រុមការងាររដ្ឋបាលរាជធានីភ្នំពេញ និងរដ្ឋបាលខណ្ឌទួលគោក ដឹកនាំដោយ លោកជា​ ពិសី អភិបាលខណ្ឌទួលគោក រួមជាមួយកម្មករជាច្រើននាក់បានចុះទៅជួយសម្របសម្រួល និងរុះរើផ្ទះបងប្អូនប្រជាពលរដ្ឋ ខណៈដែលពួកគាត់ស្នើសុំកម្លាំងជួយរុះរើ និងដឹកជញ្ជូនសម្ភារដើម្បីយកទៅដាក់ទីតាំងដីថ្មីដែលពួកគាត់ស្ម័គ្រចិត្តទទួលយក។

មន្ត្រីរដ្ឋបាលខណ្ឌទួលគោកបានអោយដឹងថា នៅថ្ងៃទី ១៥ ខែកុម្ភៈ ឆ្នាំ២០២២ ប្រជាពលរដ្ឋចំនួន ៥៤គ្រួសារ ដែលរស់នៅលើសំណង់មិនរៀបរយលើផ្លូវ ១៣៨ ជាប់ខាងជើងមន្ទីរពេទ្យព្រះកុសុមៈ (ពេទ្យលោកសង្ឃ) ស្ថិតក្នុងសង្កាត់ទឹកល្អក់ទី១ ខណ្ឌទួលគោក រាជធានីភ្នំពេញព្រមស្ម័គ្រទទួលយកដីនៅតំបន់អភិវឌ្ឍន 7NG ទៅតាមគោលនយោបាយរបស់រាជរដ្ឋាភិបាល តាមរយៈរដ្ឋបាលរាជធានីភ្នំពេញនិងរដ្ឋបាលខណ្ឌទួលគោក។

ពួកគាត់បានរុះរើនៅព្រឹកថ្ងៃទី ១៥ ខែកុម្ភះ ឆ្នាំ២០២២ ដោយចាប់ពីវេលាម៉ោង ៦ព្រឹក រហូតដល់ម៉ោង ៨ និង១៥យប់។

គួរបញ្ជាក់ថា ប្រជាពលរដ្ឋ រស់នៅលើសំណង់មិនរៀបរយជាប់របងមន្ទីរពេទ្យព្រះកុសុមៈ ស្ថិតនៅលើផ្លូវ ១៣៨ក្នុងសង្កាត់ទឹកល្អក់ទី១ ខណ្ឌទួលគោកនេះត្រូវបានអាជ្ញាធរ សង្កាត់ទឹកល្អក់ទី១ និងអាជ្ញាធរខណ្ឌទួលគោកធ្វើការសម្របសម្រួលអោយពួកគាត់ចាកចេញពីតំបន់នេះច្រើនឆ្នាំមកហើយ ប៉ុន្តែពួកគាត់មិនព្រម មកដល់ពេលនេះ ទើបពួកគាត់យល់ព្រមស្ម័គ្រទទួលយកដីនៅតំបន់អភិវឌ្ឍន 7NG៕

អត្ថបទ៖ ស្រីរ័ត្ន