រកឃើញវិជ្ជមានកូវីដ-១៩ បំប្លែងថ្មីអូមីក្រុង៣នាក់នៅខេត្តកោះកុង​

មន្ត្រី​សុខាភិបាល​ខេត្តកោះកុង រកឃើញ​ករណី​ឆ្លង​ជំងឺ​កូ​វីដ​១៩​ប្រភេទ​អូ​មី​ក្រុង​លើ​ពលករ​ខ្មែរ​៣​នាក់​មកពី​ប្រទេស​ថៃ ដោយ​បច្ចុប្បន្នកំពុង​សម្រាក​ពិនិត្យ​តាមដាន​ព្យាបាល​នៅ​មណ្ឌល​ព្យាបាល​កម្រិត​២​ក្នុង​បរិវេនរ​មន្ទីរ​សង្គម​កិច្ច អតីតយុទ្ធជន និង​យុវនីតិសម្បទា​ខេត្ត​។​

ស្ត្រី​វ័យ​៣១​ឆ្នាំ និង​កូន​ចំនួន​២​នាក់ អាយុ​៥​ឆ្នាំ និង​អាយុ​៣​ឆ្នាំ ត្រូវបាន​មន្ត្រី​សមត្ថកិច្ច​ជំនាញ​ប្រចាំការ​ត្រួតពិនិត្យ​ល្បាត​នៅ​ខ្សែបន្ទាត់​ព្រំដែន​ចាំ​យាម​រកឃើញ​ចូល​ឆ្លងដែន​តាម​ច្រក​ធម្មជាតិ ហើយ​ធ្វើ​តេស្ត​រកឃើញ​មេរោគ​អូ​មី​ក្រុង​ក្នុង​ខ្លួន​កាលពី​ថ្ងៃទី​៦ ​ខែកុម្ភៈ ​កន្លងទៅ​។​

លោក​វេជ្ជបណ្ឌិត ទៅ ម៉ឹង ប្រធាន​មន្ទីរ​សុខាភិបាល​ខេត្តកោះកុង បានឱ្យដឹង​រសៀល​ថ្ងៃទី​១៧ ខែ​កុម្ភៈ​ថា បន្ទាប់ពី​ធ្វើតេស្ត​បឋម និង​យក​សំណាក​ទៅពិនិត្យ​នៅ​វិទ្យាស្ថាន​ប៉ាស្ទ័រ ពិតជា​មាន​កូ​វីដ​ប្រភេទ​អូ​មី​ក្រុង​ប្រាកដ​មែន ដោយ​បច្ចុប្បន្ន​ពួកគេ​កំពុង​សម្រាក​ពិនិត្យ​ព្យាបាល​នៅ​មណ្ឌល​ព្យាបាល​កម្រិត​នៅក្នុង​បរិវេណ​មន្ទីរ​សង្គមកិច្ច​ខេត្ត​។​

បើតាម​លោក​ប្រធាន​មន្ទីរ​សុខាភិបាល​ខេត្តកោះកុង អាកា​រៈសុខ​ភាព​ពួកគេ​ទាំង​ម្តាយ​និង​កូន មិន​សូវ​ធ្ងន់ធ្ងរ​អ្វី​នោះទេ ពោលគឺ​គ្រូពេទ្យ​នៅតែ​តាមដាន​ជាប្រចាំ​​។ ទន្ទឹម​នោះ មន្ត្រី​ជំនាញ​ស្នើសុំ​ដល់​ប្រជាពលរដ្ឋ​រស់នៅក្នុង​ខេត្តកោះកុង​ទាំងមូល​ត្រូវ​បន្ត​ចូលរួម​អនុវត្ត​សុខាភិបាល​ឱ្យ​ខ្ជាប់ខ្ជួន​បំផុត​តាម​អ្វី​ដែលជា​សេចក្តីណែនាំ​របស់​ក្រសួងសុខាភិបាល និង​រាជរដ្ឋាភិបាល​កម្ពុជា ទោះបីជា​បាន​ចាក់​វ៉ាក់សាំង​រួចរាល់​ហើយក៏​ដោយ​។​

តាម​របាយការណ៍​សង្ខេប​ពី​ស្ថានភាព​ជំងឺ​កូ​វីដ​១៩​គិត​ត្រឹម​ថ្ងៃទី​១៦ ខែកុម្ភៈ ឆ្នាំ​២០២២​របស់​រដ្ឋបាល​ខេត្តកោះកុង បង្ហាញថា មាន​អ្នក​ចូល​មណ្ឌល​ច​ត្តា​ឡីស័ក​ចំនួន​២​នាក់ អ្នក​ចេញពី​មណ្ឌល​ច​ត្តា​ឡី​ស័ក​១ និង​កំពុងស្នាក់នៅ​ចំនួន​១៦​នាក់​។ ករណី​ឆ្លង​មេរោគ​បំប្លែង​ថ្មី​ប្រភេទ​អា​ហ្វា​ចំនួន​៤១៤​នាក់ និង​ប្រភេទ​Delta​មាន​ចំនួន​៣២៤​នាក់​៕

អត្ថបទ៖ ​សិរី​វឌ្ឍនៈ​