កម្ពុជាត្រៀមបញ្ជូនពលករ ៥ ពាន់នាក់ទៅប្រទេសជប៉ុន ឡើងវិញ បន្ទាប់ពីអាក់ខាន ១ ឆ្នាំ

កម្ពុជានឹងចាប់ផ្តើមបញ្ជួនកម្មសិក្សាការី និងពលករជំនាញពី ៤ ទៅ ៥ ពាន់នាក់ ទៅធ្វើការទៅលើវិស័យផ្សេងៗនៅប្រទេសជប៉ុន នៅខែមីនា ឆ្នាំ២០២២ បន្ទាប់ពីបានផ្អាកកាលពីខែមេសា ឆ្នាំ២០២១ កន្លងទៅ ដោយសារការផ្ទុះរាតត្បាតជំងឺកូវីដ-១៩។

លោក អន ប៊ុនហាក់ ប្រធានសមាគមទីភ្នាក់ងារហត្ថពលកម្មកម្ពុជា បានឱ្យដឹងនៅព្រឹកថ្ងៃទី២៨ ខែកុម្ភៈនេះថា ការបញ្ជួនដំបូងអាចក្នុងរង្វង់ពី ៤ពាន់ ឬ៥ពាន់នាក់ ដោយសារការខកខានបញ្ជួនទៅយូរមកហើយ ដោយសារជំងឺកូវីដ-១៩ ហើយពលករទាំងនោះនឹងត្រូវបញ្ជួនទៅជប៉ុនចាប់ពីខែមីនា ឆ្នាំ២០២២ នេះតទៅ។

លោ អន ប៊ុនហាក់ បានបន្តថា ក្នុងចំណោមពលករខ្មែរទៅធ្វើការនៅជប៉ុន ក្នុងនោះភាគច្រើនជាកម្មសិក្សាការី។ ចំណែកពលករជំនាញមានប្រមាណពី ១០០ ទៅ ២០០នាក់ ដោយពួកគេទៅធ្វើការលើផ្នែកការវេចខ្ចប់ សំណង់ ចំណីអាហារ សវាកម្ម សណ្ឋាគារ ភោជនីដ្ឋាន កសិកម្មដាំដុះ និងចិញ្ចឹមសត្វ។

លោក អន ប៊ុន ហាក់ បានបន្តទៀតថា៖ “ស្ថានទួតជប៉ុនបានផ្តល់ដំណឹងរួចហើយថា កម្ពុជាអាចាប់ផ្តើមបញ្ជូនពលករទៅធ្វើការនៅជប៉ុនចាប់ពីខែមីនា ឆ្នាំ២០២២ នេះតទៅ ហើយស្អែកនេះ យើងអាចដាក់ស្នើសុំវីសារហោះហើរបានហើយក្រោយប្រទេសជប៉ុនមានការបន្ធូរបន្ថយទៅលើវិធានសុខាភិបាលជំងឺកូវីដ-១៩នេះ”។

ប្រធានភ្នាក់ងារហត្ថពលកម្មកម្ពុជា រូបនេះបានបន្ថែមថា ចំពោះនីតីវិធី និងបែបបទសុខាភិបាលក្នុងការបញ្ជួនពលករខ្មែរទៅប្រទេសជប៉ុន មិនខុសពីប្រទេសថៃទេ ដោយសារពលករខ្មែរត្រូវមានលក្ខខណ្ឌមួយចំនួនដូចជា ត្រូវមានកាតចាក់វ៉ាក់សាំង ធ្វើតេស្តរកជំងឺកូវីដ-១៩ រយៈពេល ៧២ ម៉ោង តាមម៉ាស៊ីន PCR ឬតេស្តរហ័សដែលធ្វើដោយគ្រូពេទ្យជំនាញដើម្បីបញ្ជាក់វិញ្ញាបនបត្រថាមិនមានឆ្លងជំងឺកូវីដ-១៩។ ទៅដល់ទីនោះត្រូវអនុវត្តវិធានសុខាភិបាលជប៉ុន ដោយធ្វើចត្តាឡីស័ក និងមានការមកទទួលពីថៅកែជប៉ុនផងដែរ។

គួរបញ្ជាក់ថា កម្ពុជាបានបញ្ជូនពលករទៅធ្វើការងារនៅក្រៅប្រទេសចំនួន ១ ៣០១ ៦០៩ នាក់ បាន និងកំពុងធ្វើការតាមវិស័យផ្សេងៗនៅតាមបណ្តាប្រទេសចំនួន ៧ ក្នុងនោះមានប្រទេសជប៉ុន ចំនួន ១១ ៤៥៣ នាក់៕

អត្ថបទ៖ សំអឿន