ព័ត៌មានជាតិ

ជប៉ុនផ្តល់ជំនួយឥតសំណងប្រមាណ៤១ លានដុល្លារ ដើម្បីអនុវត្តគម្រោងចំនួន២ នៅកម្ពុជា

បានផុស

៤ years មុន

នៅ

ថ្ងៃចន្ទ ២៨ កុម្ភៈ ២០២២

ដោយ

រដ្ឋាភិបាលជប៉ុន បានផ្តល់ជំនួយឥតសំណងប្រមាណ៤១ លានដុល្លារ ដើម្បីអនុវត្តគម្រោងចំនួន២ នៅកម្ពុជា គឺគម្រោងបោសសម្អាតមីន និងការពង្រីកប្រព័ន្ធផ្គត់ផ្គង់ទឹកស្អាតនៅខេត្តស្វាយរៀង នេះបើតាមការឲ្យដឹងពីក្រសួងការបរទេស នារសៀលនេះ។

ពិធីចុះហត្ថលេខា នឹងធ្វើឡើងនៅថ្ងៃទី០២ ខែមីនា ឆ្នាំ២០២២ ខាងមុខ រវាងលោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា និងលោក មិកាមិ ម៉ាសាហ៊ីរ៉ូ (MIKAMI Masahiro) ឯកអគ្គរាជទូតជប៉ុនប្រចាំព្រះរាជាណាចក្រកម្ពុជា លើលិខិតប្ដូរសារ និងឯកសារពាក់ព័ន្ធ ស្ដីពីការផ្ដល់ហិរញ្ញប្បទានឥតសំណងរបស់ជប៉ុន ដើម្បីអនុវត្តគម្រោងចំនួន០២រួមមាន៖

ទី១. ការបោសសម្អាតមីនប្រកបដោយសមាហរណកម្ម និងសង្គ្រោះជនពិការដោយសារមីនដំណាក់កាលទី២ ដែលមានទឹកប្រាក់ចំនួន២.០០០ លានយ៉េន (ប្រមាណ១៧ លានដុល្លារអាមេរិក) និងទី២. ការពង្រីកប្រព័ន្ធផ្គត់ផ្គង់ទឹកស្អាត នៅខេត្តស្វាយរៀង ដែលមានទឹកប្រាក់ចំនួន២.៧៨៦ លានយ៉េន (ប្រមាណ ២៤ លានដុល្លារអាមេរិក)។

ហិរញ្ញប្បទានឥតសំណងដែលផ្ដល់ដោយរដ្ឋាភិបាលជប៉ុននេះ នឹងចូលរួមចំណែកយ៉ាងសំខាន់ដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការជំរុញការអភិវឌ្ឍសេដ្ឋកិច្ច និងសង្គមកម្ពុជា ព្រមទាំងពង្រឹងបន្ថែមទៀតនូវកិច្ចសហប្រតិបត្តិការល្អដែលមានស្រាប់ និងចំណងមិត្តភាពជាប្រពៃណីរវាងប្រទេសទាំងពីរ៕

ដោយ ៖ កោះកែវ