វិស័យ​យានយន្ត​ និង​អេឡិច​ត្រូនិក​នៅកម្ពុជា​នឹងបង្កើន​ទំហំនាំ​ចេញ​ទឹកប្រាក់​លើសពី ២ ប៊ីលាន​ដុល្លារ​ ​ក្នុងរយៈពេល​៥ ឆ្នាំខាងមុខ

វិស័យធំៗចំនួនពីរនៅកម្ពុជារួមមានវិស័យយានយន្ត និងអេឡិចត្រូនិក នឹងអាចបង្កើនទំហំនាំចេញក្នុងទឹកប្រាក់លើសពី ២ ប៊ីលានដុល្លារអាមេរិក និងអាចបង្កើត ការងារថ្មីជាង ២២ ពាន់កន្លែងក្នុងរយៈពេល ៥ ឆ្នាំខាងមុខ។

វិស័យធំៗទាំងពីរនេះត្រូវបានក្រុមប្រឹក្សាអភិវឌ្ឍន៍កម្ពុជា រៀបចំជាសេចក្តីព្រាងផែនទីបង្ហាញផ្លូវការអភិវឌ្ឍវិស័យយានយន្ត និងអេឡិចត្រូនិកនៅកម្ពុជាហើយត្រូវបានលើកយកមកពិភាក្សា ពិគ្រោះយោបល់កាលពីរសៀលថ្ងៃទី ០១ខែមីនាឆ្នាំ២០២២ ក្រោមវត្តមានលោក សុខ ចិន្តាសោភា រដ្ឋមន្រ្តីប្រតិភូអមនាយករដ្ឋមន្រ្តី អគ្គលេខាធិការក្រុមប្រឹក្សាអភិវឌ្ឍន៍កម្ពុជា និងលោកស្រី Tina Redshaw ឯកអគ្គរាជទូតវិសាមញ្ញ និងពេញសមត្ថភាពរបស់ចក្រភពអង់គ្លេសប្រចាំរកម្ពុជា ដើម្បីប្រមូលធាតុចូល និងមតិយោបល់បន្ថែម។

លោក សុខ ចិន្តាសោភា បានមានប្រសាសន៍ថា ការអនុវត្តដោយជោគជ័យនូវផែនទីបង្ហាញផ្លូវក្នុងវិស័យទាំងពីរនេះ នឹងផ្ដល់បច្ច័យយ៉ាងសំខាន់សម្រាប់កម្ពុជា ដូចជាការអាចបង្កើនទំហំនាំចេញក្នុងទឹកប្រាក់លើសពី ២ប៊ីលានដុល្លារអាមេរិក និងអាចបង្កើតការងារថ្មីជាង ២២ ពាន់កន្លែងក្នុងរយៈពេល ៥ ឆ្នាំខាងមុខ។

លោកបានបន្ថែមថា វិនិយោគិនក្នុងវិស័យយានយន្ត និងអេឡិចត្រូនិកនៅកម្ពុជាក៏នឹងទទួលបាននូវប្រយោជន៍ពីការរៀបចំនេះផងដែរ ដូចជាការបង្កើឲធនធានមនុស្ស ប្រកបដោយជំនាញ ការធ្វើឱ្យប្រសើរឡើងថែមទៀតនូវហេដ្ឋារចនាសម្ព័ន្ធអគ្គិសនី និងភ័ស្តុភារកម្ម ដើម្បីគាំទ្រភាពប្រកួតប្រជែងតម្លៃនៃកម្មន្តសាល និងការផ្តល់នូវកិច្ចសម្របសម្រួលផ្នែកគយ និងពាណិជ្ជកម្មដែលកាន់តែមានប្រសិទ្ធភាពដល់ការនាំចូល និងនាំចេញផលិតផល។

លោក សុខ ចិន្តាសោភា បានបន្ថែមថា វិស័យយានយន្ត និងអេឡិចត្រូនិច ត្រូវបានជ្រើសរើសនិងកំណត់ជាវិស័យអាទិភាពដើម្បីចូលរួមចំណែក ដល់ការងារសេដ្ឋកិច្ចកម្ពុជាក្រោយវិបត្តិជំងឺកូវីដ-១៩ និងជំរុញកំណើនសេដ្ឋកិច្ចរយៈពេលវែង, ព្រមទាំង ការធ្វើទំនើបកម្ម និងពិពិធកម្ម ដែលមានសង្គតិភាពជាមួយ “គោលនយោបាយអភិវឌ្ឍន៍វិស័យឧស្សាហកម្ម កម្ពុជាឆ្នាំ ២០១៥-២០២៥ និង“ក្របខណ្ឌយុទ្ធសាស្ត្រ និងកម្មវិធីស្តារនិងជំរុញ្ជកំណើនសេដ្ឋកិច្ចកម្ពុជា ក្នុងការរស់នៅជាមួយកូវីដ-១៩ តាមគន្លងប្រក្រតីភាពថ្មី សម្រាប់ឆ្នាំ២០២១-២០២៣ ដែលត្រូវបាន ប្រកាសឱ្យប្រើប្រាស់កាលពីពេលថ្មីៗនេះ។

លោក សុខ ចិន្តាសោភា បានគូសបញ្ជាក់ពីការប្តេជ្ញារបស់រាជរដ្ឋាភិបាល តាមរយៈកិច្ចប្រឹងប្រែងរួមរបស់ក្រសួងស្ថាប័នពាក់ព័ន្ធនានា ដើម្បីធានាបាននូវភាពគ្រប់ជ្រុងជ្រោយក្នុងការ កំណត់នូវយុទ្ធសាស្ត្រ, ទិសដៅ និងយន្តការចាំបាច់ដើម្បីធ្វើការអភិវឌ្ឈនិងទាក់ទាញការវិនិយោគលើវិស័យ យានយន្ត និងអេឡិចត្រូភិកនៅកម្ពុជា និងបង្កើនភាពប្រកួតប្រជែងតម្លៃក្នុងប្រតិបត្តិការវិស័យទាំងនេះ។

លោកស្រី Tina Redshaw ឯកអគ្គរាជទូតវិសាមញ្ញ និងពេញសមត្ថភាពរបស់ចក្រភពអង់គ្លេសប្រចាំព្រះរាជា​ណាចក្​រកម្ពុជា បានមានប្រសាសន៍ថាចក្រភពអង់គ្លេសមានក្តីសោមនស្សក្នុងការចូលរួមចំណែកគាំទ្រការរៀបចំពង្រាងផែនទីបង្ហាញផ្លូវសម្រាប់អភិវឌ្ឍន៍ និងទាក់ទាញ ការវិនិយោគក្នុងវិស័យយានយន្ត និងអេឡិចត្រូនិកនៅកម្ពុជា ក៏ដូចជាចូលរួមជាមួយរាជរដ្ឋាភិបាលកម្ពុជា ក្នុងកិច្ចខិតខំប្រឹងប្រែងស្តារសេដ្ឋកិច្ចពីវិបត្តិជំងឺកូវីដ១៩ ការកែទម្រង់សេដ្ឋកិច្ច និងបង្កើនការងារដែល មានភាពធន់នឹងវិបត្តិដែលផ្តល់ប្រាក់ឈ្នួលប្រសើរជាងមុនសម្រាប់ពលករកម្ពុជា៕

អត្ថបទ៖ សំអឿន