សម្ដេចធិបតី អរគុណលោក សុខ ចិន្ដាសោភា ក្រសួងពាក់ព័ន្ធ ដែលជួយពលករខ្មែររងគ្រោះនៅបរទេសទាន់ពេល

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា​ បានអរគុណលោក សុខ ចិន្ដាសោភា ដែលកាលពីពេលកាន់តំណែងជារដ្ឋមន្ត្រីក្រសួងការបរទេស បានសហការជាមួយក្រសួងពាក់ព័ន្ធ ដោះស្រាយទាន់ពេល​វេលាលើករណីពលករខ្មែររងគ្រោះ ស្នើសុំឱ្យអន្តរាគមន៍ជួយ ព្រោះរងគ្រោះក្នុងពេលទៅធ្វើការងារនៅក្រៅប្រទេស។ សម្ដេចធិបតី ថ្លែងអរគុណក្រសួងពាក់ព័ន្ធដូច្នេះ ក្នុងឱកាសចូលរួមទិវាប្រយុទ្ធប្រឆាំងអំពើជួញដូរមនុស្ស លើកទី១៨ ក្រោមប្រធានបទ «កម្ពុជាប្រឆាំងដាច់ខាតអំពើជួញដូរមនុស្សគ្រប់ទម្រង់ និងគ្រប់មធ្យោបាយ ក្នុងយុគសម័យឌីជីថល»។

នាព្រឹកថ្ងៃទី១២ នេះ បើទោះជាលោក សុខ ចិន្ដាសោភា មិនកាន់តំណែងជារដ្ឋមន្ត្រីការបរទេស សម្ដេចធិបតី​​ ថ្លែងអរគុណដូច្នេះ៖« ក្នុងឱកាសនេះ ខ្ញុំសូមអរគុណណាស់ ដល់ក្រសួងមហាផ្ទៃ ក្រសួងការងារ ក្រសួងការបរទេស ឯកឧត្ដម សុខ ចិន្ដាសោភា (…) ពីព្រោះតែយើងបានដោះស្រាយការងារមួយចំនួន នៅតាមប្រទេសមួយចំនួនបានទាន់ពេលវេលា នៅពេលដែលយើងបានទទួលការ Complaint  ការសូមអន្តរាគមន៍ តាមហ្វេសប៊ុកភ្លាមៗ។ ប្រជាពលរដ្ឋខ្មែរយើងត្រូវគេបោក រៀបការ ឬមួយទៅធ្វើការ ពេលដែលបានទទួល(បណ្ដឹង)យើងចាត់ចែងភ្លាម។ »។

ជាមួយគ្នានេះ សម្ដេចធិបតី ហ៊ុន ម៉ាណែត ក៏អរគុណ​ស្ថាន​អគ្គរាជទូតកម្ពុជា និងស្ថានអគ្គកុងស៊ុលកម្ពុជាប្រចាំបរទេស ដែលបានខ្នះខ្នែង សហការជាមួយក្រសួងការងារ និងក្រសួងមហាផ្ទៃ ជួយសង្គ្រោះពលរដ្ឋខ្មែររងគ្រោះរហូតបានត្រឡប់មកកម្ពុជាវិញ។

គួររម្លឹកថា កាលពីខែមេសា ឆ្នាំ២០២៤ ពលករខ្មែរមួយក្រុមដែលចំណាកស្រុកទៅធ្វើការនៅប្រទេសអារ៉ាប់ប៊ីសាអ៊ូឌីត បានបង្ហោះវីដេអូតាមបណ្ដាញសង្គមហ្វេសប៊ុកសុំការអន្តរាគមន៍ ដោយអះអាងថាពួកគេត្រូវបានថៅបង្ខំឱ្យធ្វើការជាច្រើនម៉ោង បង្ខាំងធ្វើបាប និងបង្អត់អាហារជាដើម​។

នៅខែឧសភា ពលករខ្មែររងគ្រោះត្រូវបានបញ្ជូនមកកម្ពុជាវិញជាបន្តបន្ទាប់ ក្រោមកិច្ចសហការរវាងក្រសួងមហាផ្ទៃ ក្រសួងការងារ និងស្ថានទូតកម្ពុជាប្រចាំប្រទេសអេស៊ីប។

នៅខែតុលា នារីខ្មែរម្នាក់ បានសុំការអន្តរាគមន៍ពីរដ្ឋមន្ត្រីក្រសួងមហាផ្ទៃកម្ពុជារំដោះចេញពីបន្ទប់បង្ខាំងមួយនៅក្នុងប្រទេសចិន។ ក្រោមកិច្ចសហការបន្ទាន់ ជាមួយស្ថាប័នពាក់ព័ន្ធ ព្រមទាំងស្ថានទូតកម្ពុជា។ រយៈពេលត្រឹមជាង១ម៉ោង ស្ថានទូតកម្ពុជា និងចិន ក៏បានទាក់ទងទៅកាន់នារីរងគ្រោះ រហូតឈានទៅសង្គ្រោះបានដោយកម្លាំងនគរបាលចិន។នារីរងគ្រោះនោះ ត្រូវបានក្រសួងពាក់ព័ន្ធបញ្ជូនមកដល់កម្ពុជាប្រកបដោយសុវត្ថិភាព នៅខែវិច្ឆិកា ឆ្នាំ២០២៤ និងបានជួបជុំគ្រួសារឡើងវិញ។ 

នៅព្រឹកថ្ងៃទី២៨ ខែវិច្ឆិកា ឆ្នាំ២០២៤ នារីរងគ្រោះ ត្រូវបានលោក ស សុខា អនុញ្ញាតឱ្យចូលជួបសំណេះសំណាលសួរសុខទុក្ខ និងបានឧបត្ថម្ភថវិកា ចំនួន ២លានរៀល ដើម្បីជាការលើកទឹកចិត្ត និងជំរុញការខិតខំប្រឹងប្រែងរបស់នារីរងគ្រោះ សម្រាប់បន្តអនាគតវែងឆ្ងាយទៅមុខទៀត៕